Éxodo 1:1-22
1 Israelqa wawakunantinmi Egiptoman ripurqan, wawankunapas familiantinkaman+ jaykupurqanku. Paykunan karqanku:
2 Rubén, Simeón, Leví, Judá,+
3 Isacar, Zabulón, Benjamín,
4 Dan, Neftalí, Gad, Aser+ ima.
5 Llapanpiqa qanchis chunkan karqan Jacobpa familianqa. Joseqa ñan Egiptopiña+ kasharqan.
6 Tiempoq pasasqanman jinan Josepas+ wayqenkunapas wañupurqanku, wañupullarqankutaqmi paykunaq tiemponpi kausaq runakunapas.
7 Israel runakunaqa* astawan-astawanmi mirarisharqanku, ratullan askhaman kallpasapaman ima tukusharqanku, tiyasqanku jallp’amanpas ñan junt’arqankuña.+
8 Tiempowanmi Joseta mana reqsiq mosoq rey Egiptopi kamachikuyta qallarirqan.
9 Chay reymi llaqtamasin runakunata nirqan: “Qhawariychis, Israel runakunaqa sinchitan askhayashanku. Noqanchismantapas aswan kallpasapamanmi tukupushanku.+
10 Imallatapas ruwasun, chhaynapi amaña askhayanankupaq. Mana chayqa yaqapaschá guerra kaqtin enemigonchiskunawan juñukuspa noqanchis contra maqanakunkuman, chhaynapitaq llaqtanchismanta ripunkuman”, nispa.
11 Chaymi Egipto runakunaqa Israel runakunapaq capatazkunata churarqanku, paykunan sinchita llank’achispa sufrichiqku.+ Chaymantapas faraonpaq* mijuy oqarisqankuta waqaychanankupaqmi Piton llaqtata Ramesés+ llaqtatawan ruwachirqanku.
12 Maytaña Israel runakunata sufrichiqku chaypas, astawanmi paykunaqa askhayasharqanku. Chaywanmi Egipto runakunaqa astawanraq mancharikurqanku.+
13 Chaymi Egipto runakunaqa mana khuyapayaspa astawan Israel runakunata ñak’arichirqanku, sinchitapunin llank’achirqanku.+
14 Nishutapunin Israel runakunataqa sufrichirqanku t’uruta ruwachispa, adobekunata ruwachispa, chajrakunapi llank’achispa ima. Arí, nishu maltratasqapunin karqanku, imaymana llank’anakunapin sinchita llank’achirqanku.+
15 Tiempowanmi Egipto reyqa hebreo warmikunata onqochiqkunawan rimarqan, paykunaq sutinmi karqan Sifrá, Pua ima.
16 Paykunatan nirqan: “Hebreo warmikunata onqochispaqa*+ allintan qhawankichis warmi wawachus qhari wawachus chayta. Qhari kaqtinqa wañuchinkichismi, warmi kaqtintaq ama wañuchinkichischu”, nispa.
17 Chay onqochiq warmikunan ichaqa mana kasukurqankuchu Eqipto reypa kamachisqanta, aswanmi Diosta manchakusqankurayku jinallata qhari wawakunata kausachirqanku.+
18 Chayta reparaspan Egipto reyqa chay warmikunata wajachimurqan, jinaspa nirqan: “¿Imaraykun mana wañuchirqankichischu qhari wawakunata?”, nispa.
19 Chay warmikunataq faraonta nirqanku: “Hebreo warmikunaqa manan Egipto warmikuna jinachu kanku. Paykunaqa kallpasapa warmikunan kanku, manaraq chayashaqtiykun onqorakapunkuña”, nispa.
20 Chayta ruwasqankuraykun Diosqa chay onqochiq warmikunata bendecirqan. Israel runakunapas astawanraqmi askhayasharqanku, aswan kallpasapamantaqmi tukupusharqankupas.
21 Chaymantapas Diosqa payta manchakusqankuraykun chay warmikunaman wawakunata qorqan.
22 Chaymantataq faraonqa llapa runankunata kamachirqan: “Llapa chayraq naceq hebreo qhari wawakunatan Nilo mayuman wijch’uykunkichis, warmi wawakunatan ichaqa ama imanankichispaschu”,+ nispa.
Uraypi willakuykuna
^ Hebreo rimaypiqa “Israelpa wawankunaqa” ninmi.
^ Egipto reykunatan “faraón” nispa niqku.
^ Hebreo rimaypiqa “onqokuna tiyanapi paykunata rikuspaqa” ninmi.
