Éxodo 11:1-10
11 Jehová Diosmi Moisesta nirqan: “Juj castigotawanmi faraonman* Egiptomanwan apachimusaq. Chay qhepamanmi faraonqa kacharisunkichis,+ manan kacharillasunkichischu, qarqosunkichismi.+
2 Chayrayku llaqta runakunata nimuy qharikunapas warmikunapas wasimasinkumanta qolqe cosaskunata qori cosaskunatawan qochikunankupaq”,+ nispa.
3 Jehová Diosmi Israel runakunata Egipto runakunawan allinpaq qhawarichirqan. Moisespas ancha respetasqa runan kapurqan faraonpa serviqninkunapaq, llapa Egipto runakunapaqpas.
4 Moisesmi faraonta nirqan: “Jehová Diosmi nin: Kuska tutata jinan llapa Egiptota purisaq.+
5 Egiptopi llapa phiwi* wawakunan wañunqa,+ tronopi tiyashaq faraonpa phiwi wawanmanta kutanapi kutaq warmi kamachiq phiwi wawankama. Ñaupaq wachay uywakunapas wañunqan.+
6 Chaykuna pasaqtinmi Egiptopi llapa runakuna qaparinqaku. Manan jayk’aqpas chhayna waqayqa karqanchu, manataqmi jujmantaqa jayk’aqpas kanqañachu.+
7 Israel runakunata uywankunatawanmi ichaqa mana imapas pasanqachu.* Chhaynapin qankunaqa yachankichis Jehová Diosqa Israel runakunata Egipto runakunamanta t’aqasqanta,+ nispa.
8 Chaykuna pasaqtinmi llapa kamachiykikuna jamuwanqaku, noqaman qonqoriykukuspataq niwanqaku: Ripuychis qanpas llaqtayki runakunapas,+ nispanku. Jinan noqapas llaqtay runakunapas ripusaqku”, nispa. Chaykunata nispan Moisesqa sinchi phiñasqa faraonpa ñaupanmanta lloqsimpurqan.
9 Jehová Diosmi Moisesta nirqan: “Faraonqa manan uyarisunkichischu,+ chhaynapi Egiptopi astawanraq milagrokunata ruwanaypaq”,+ nispa.
10 Moiseswan Aaronwanqa askha milagrokunatañan ruwarqanku faraonpa ñaupanpi.+ Jehová Diosmi ichaqa jinallata qhawarqan faraonpa sonqon rumiyananta, chhaynapi Israel runakunata Egiptomanta mana kacharinanpaq.+
Uraypi willakuykuna
^ Egipto reykunatan “faraón” nispa niqku.
^ Chaypiqa “mana juj alqopas kaninqachu” nillanmantaqmi.
