Éxodo 9:1-35
9 Jinan Jehová Diosqa Moisesta nirqan: “Phaway faraonta* nimuy: Hebreo runakunaq Diosnin Jehová Diosmi nin: Llaqtayta kachariy adorawananpaq.+
2 Manachus kachariyta munanki, manataqchus lloqsipunankunatapas munanki chayqa,
3 noqa Jehová Diosmi atiyniywan+ uywaykikunata wañuchisaq. Caballoykikuna, asnoykikuna, camelloykikuna, wakaykikuna, ovejaykikuna iman millay onqoywan wañunqa.+
4 Ichaqa noqa Jehová Diosqa Egipto runakunaq uywankunamantan Israel runakunaq uywankunata t’aqasaq, manan Israel runakunaq uywankunaqa wañunqachu,+ nispa”.
5 Chaymantapas Jehová Diosqa jayk’aqchus chaykunata ruwanan karqan chaytawanmi willarqan, nirqanmi: “Paqarinmi noqa Jehová Diosqa chayta ruwasaq”, nispa.
6 Nisqanman jinan Jehová Diosqa qhepantin p’unchay ruwarqan. Egipto runakunaq uywankunan wañuyta qallarirqan,+ Israel runakunaq uywankunan ichaqa mana jujpas wañurqanchu.
7 Faraonqa kamachinkunatan kacharqan Israel runakunaq uywankuna wañurqanchus icha manachus chayta qhawamunankupaq. Chaypin yacharqan Israel runakunaq uywanqa mana jujpas wañusqanta. Chaywanpas faraonpa sonqonqa kaqllan rumiyasqa kasharqan,+ manan Israel runakunata kacharirqanchu.
8 Chaymantan Jehová Diosqa Moisesta Aarontawan nirqan: “Hornomanta juj phoqtuy usphata sapankaykichis aparikuychis, chaytataq Moisesqa faraonpa ñaupanpi wichayman jach’inqa.
9 Chay usphan polvoman tukunqa jinaspa llapa Egiptoman mast’arikunqa, chaytaq Egiptopi llapa runakunata uywakunatawan q’eyayoq ch’upuwan jap’ichinqa”, nispa.
10 Jinan paykunaqa hornomanta usphata orqospa faraonpa ñaupanman rirqanku. Moisestaq chayta wichayman jach’irqan, jinan runakunatapas animalkunatapas q’eyayoq ch’upu jap’irqan.
11 Watuq sacerdotekunaqa manan Moisespa ñaupanman jamuyta atirqankuchu. Paykunaqa llapa Egipto runakuna jinan ch’upuwan junt’a kasharqanku.+
12 Jehová Diosqa jinallatan qhawarqan jujmanta faraonpa sonqon rumiyananta. Jinan faraonqa Jehová Dios Moisesta nisqanman jina mana paykunata kasurqanchu.+
13 Jehová Diosmi Moisesta nillarqantaq: “Paqarin tutallamanta jatarispan faraonwan tupaq rinki, jinaspa nimunki: Hebreo runakunaq Diosnin Jehová Diosmi nin: Llaqtayta kachariy adorawananpaq.
14 Mana chayqa qanta, kamachiykikunata, llaqtayki runakunata iman castigasaq, chhaynapin yachanki kay pachapiqa mana pipas noqa jina kasqanta.+
15 Noqaqa ñachá qantapas llaqtaykitapas millay onqoywan castigaymanña karqan. Ñachá kay pachamantapas chinkapuwaqña karqan.
16 Ichaqa atiyniyta rikuchinaypaq, lliu kay pachapi sutiy reqsisqa kananpaqwanmi jinallata kausachishayki.+
17 ¿Imaraykun kunankama jatunchakushanki, manataq llaqtaytapas kacharinkichu?
18 Paqarinmi kay horasta jina pasaqta chijchichimusaq. Chay chijchi jinaqa manan jayk’aqpas karqanchu Egipto nación jatarisqan p’unchaymantapacha kunankamapas.
19 Chayrayku wasiman juñuchimuy uywaykikunata, kamachiykikunata, campopi ima kaqniykikunatapas. Pi runapas ima animalpas campopi qhepakunqa chayqa wañunqan chijchiwan, nispa”.
20 Faraonpa serviqninkunamanta Jehová Diospa siminta manchakuqkunallan uywankutapas kamachinkutapas wasiman juñurqanku.
21 Jehová Diospa siminta mana kasukuqkunan ichaqa jinallata kamachinkutapas uywankutapas campopi saqerqanku.
22 Chaymantataq Jehová Diosqa Moisesta nirqan: “Varaykita altoman oqariy, jinan lliu Egiptopi chijchi chijchimunqa.+ Runakunaman, animalkunaman, campopi llapa plantakunaman iman chayamunqa”,+ nispa.
23 Jinan Moisesqa varanta altoman oqarirqan, Jehová Diostaq rayokunata t’ojachimurqan chijchichimurqan ima. Ninakunaraqmi* kay pachaman chayamurqan. Jehová Diosqa astawan-astawanraqmi lliu Egiptoman chijchichimurqan.
24 Chijchiqa ninawan iman chayamurqan. Manan jayk’aqpas Egipto nación qallarisqanmantapachapas chhaynaniraqtaqa chijchirqanchu.+
25 Chay chijchiqa campokunapi qhepakuq llapa runakunata animalkunatawanmi wañuchirqan. Campopi plantakunatapas lliutan ñut’urqan, sach’akunatapas lliutan chaqorqan.+
26 Israel runakunaq tiyasqan Gosén jallp’atan ichaqa mana chijchirqanchu.+
27 Chaymantan faraonqa Moisesta Aarontawan wajachimuspa nirqan: “Juchallikunin kay kutipiqa. Jehovaqa chaninmi, noqawan runaykunapiwanmi ichaqa mana allinta ruwashayku.
28 Jehovamanta mañakuychis amaña phuyukunapi t’ojay kananpaq ni chijchipas chayamunanpaq. Noqaqa kacharipusaykichismi, manañan jark’asaykichischu”, nispa.
29 Moisestaq nirqan: “Kay llaqtamanta lloqsispay jinan Jehová Diosmanta mañakusaq,* jinan phuyukunapi t’ojaypas chijchipas thanipunqa, chhaynapin yachanki kay pachaqa Jehová Diospa kasqanta.+
30 Ichaqa chaykunataña rikuspapas qanpas serviqniykikunapas manan Jehová Diostaqa manchakunkichischu, allintan chaytaqa yachani”, nispa.
31 Linotapas* cebadatapas lliutan chijchiqa ñut’upurqan. Cebadaqa ñan poqosharqanña, linopas t’ikasharqanñan.
32 Trigotawan espeltatawanmi* ichaqa mana imanarqanpaschu, chaykunaqa qhepa t’akayñan karqan.
33 Faraonpa kasqanmanta lloqsimuspan Moisesqa makinta jaywarispa Jehová Diosmanta mañakurqan, chhaynapin manaña phuyukunapi t’ojay karqanñachu ni chijchipas chayamurqanñachu; manañan paramurqanchu.+
34 Manaña parapas, phuyukunapi t’ojaypas ni chijchipas kaqtinmi faraonqa jujmanta juchallikullarqantaq. Sonqontan payqa rumiyachirqan,+ chhaynatan ruwarqanku serviqninkunapas.
35 Jehová Dios Moisesta nisqanman jinan faraonqa manapuni sonqonta llamp’uyachirqanchu, manataqmi Israel runakunatapas kacharirqanchu.+
Uraypi willakuykuna
^ Egipto reykunatan “faraón” nispa niqku.
^ Chaypiqa yaqapaschá rayokunamanta rimashan.
^ Hebreo rimaypiqa “Jehová Diosman makiyta jaywarisaq” ninmi.
^ Linoqa juj plantan, Egiptopin chayqa wiñan, chaywanmi lino p’achata ruwakun.
^ Espeltaqa trigo jinan.
