1 Reyes 15:1-34
15 Nebajpa churin Jeroboán chunka pusaqniyoq wataña Israelpi kamachikushaqtinmi Abiyanqa Judá ayllupi rey kapurqan.+
2 Abiyanqa kinsa watan Jerusalenmanta kamachikurqan. Paypa mamanmi karqan Absalonpa* nietan Macá.+
3 Abiyanqa manan ñaupa taytan David jinachu tukuy sonqowan Jehová Diosta servirqan. Aswanpas Abiyanqa papan jinan imaymana juchakunata ruwarqan.
4 Chaywanpas Davidta khuyapayasqanraykun+ Jehová Diosqa Abiyanpa churinta reyta churaspa payman Jerusalenpi juj lamparata qorqan,+ chhaynapi Jerusalén llaqta ama chinkananpaq.
5 Davidqa tukuy kausasqan tiempopin Jehová Diospa kamachisqanman jina purirqan. Payqa Diospa munasqanman jinapunin imatapas ruwarqan, Het runa Urías contra imachus ruwasqallanmi mana allinqa karqan.+
6 Rehoboamwan Jeroboanwanqa tukuy tiempon guerrallapipuni karqanku.+
7 Abiyanpa wakin ruwasqankunapas lliumi Judá ayllu reykunamanta willaq libropi qelqasqa kashan.+ Abiyanwan Jeroboanwanqa guerrapin kallarqankutaq.+
8 Chaymantataq Abiyanqa ñaupa taytankuna jina wañukapurqan, jinaspa Davidpa Llaqtan nisqapi p’ampapurqanku. Chay qhepamantaq churin Asá+ rey kapurqan.+
9 Jinan Asaqa Judá ayllupi kamachikuyta qallarirqan rey Jeroboán iskay chunka wataña Israelpi kamachikushaqtin.
10 Asaqa tawa chunka jujniyoq watan Jerusalenmanta Judá aylluta kamachirqan. Paypa abuelanmi karqan Absalonpa* nietan Macá.+
11 Asaqa ñaupa taytan David jinan Jehová Diospa munasqanman jina ruwarqan.+
12 Paymi kamachisqan llaqtakunamanta wijch’urqan qharimasinkuman cuerponkuta vendespa idolonkuta yupaychaq qharikunata,+ ñaupa taytankuq ruwasqan millakunapaq llapa idolokunatapas.+
13 Chaymantapas Macá+ abuelantan reina kasqanmanta qarqopurqan millakuna idolota ruwasqanrayku, chay idolotan payqa ruwarqan sayashaq k’ulluta* yupaychanapaq. Chay idolotan Asaqa chhallurqan,+ jinaspa Cedrón wayq’opi+ kanaykurqan.
14 Yupaychana patakunatan* ichaqa mana chinkachirqanchu,+ chaywanpas Asaqa wañupunan p’unchaykaman tukuy sonqowan Jehová Diosta servirqan.
15 Chaymantapas Jehová Diospa wasinmanmi apamurqan qolqeta, qorita, imaymana serviciokunatawan. Chaykunatan paypas papanpas ñaupaqpi Diospaq t’aqarqanku.+
16 Judá ayllu rey Asawan Israel rey Basawanqa+ tukuy tiempon guerrallapipuni karqanku.
17 Israel rey Basaqa Judá ayllu contran jatarirqan, jinaspa Ramá+ llaqtata aswan allinta sayarichiyta qallarirqan, chhaynapi Asapa kamachisqan Judá aylluman+ ama pipas jaykunanpaq nitaq pipas chaymanta lloqsinanpaq.
18 Chaymi Asaqa Jehová Diospa wasinpi valorniyoq cosaskuna waqaychanamanta, reypa wasinpi* valorniyoq cosaskuna waqaychanamantawan orqorqan llapa puchuq qoritapas qolqetapas, chaytataq kamachinkunawan apachirqan Siria rey+ Ben-Adajman. Ben-Adajqa Tabrimonpa churinmi karqan, Tabrimontaq Ezionpa churin karqan. Chay tiempopaqqa Damasco llaqtapin Ben-Adajqa tiyasharqan, paytan Asaqa nirqan:
19 “Yachasqayki jina, noqanchisqa iskayninchismi rimanakurqanchis, papaykipas papaywanmi rimanakurqan. Kunanmi qoritawan qolqetawan regalota apachimushayki. Israel rey Basawan rimanakusqaykichistaqa ama kasuychu, chhaynapi noqamanta karunchakunanpaq”, nispa.
20 Jinan Ben-Adajqa Asá reyta kasuspa soldadonkunaq umallinkunata kacharqan Israel runakunawan maqanakunanpaq. Jinan Israel runakunata atipaspa jap’ikapurqanku Dan+ llaqtata, Abel-Bej-Macá llaqtata, Ijonta,+ llapa Kineret-ta, llapa Neftalí ayllu jallp’atawan.
21 Chaykunata yacharuspan Basaqa Ramá llaqtapi ruwashasqanta wijch’upuspa Tirzá+ llaqtaman kutipurqan.
22 Chaymi rey Asaqa llapa Judá ayllu runakunata wajachirqan, jinaspa Ramá llaqtata allichananpaq Basapa apasqan rumikunata maderakunata lliuta apapurqanku. Chaykunawanmi Asaqa Benjamín ayllupi kaq Gueba+ llaqtatapas Mizpá+ llaqtatapas aswan allinta allicharqan.
23 Asá reymanta wakin willakuykunapas, atiyninwan ruwasqankunapas, llaqtakuna jatarichisqanpas, tukuy imaymana ruwasqankunapas Judá ayllu reykunamanta willaq libropin qelqasqa kashan. Kuraqña kapuspataq Asaqa chakinmanta onqopurqan.+
24 Chaymantataq Asaqa ñaupa taytankuna jina wañukapurqan, jinaspa paykunawan kuskata Davidpa Llaqtan nisqapi p’ampapurqanku. Chay qhepamantaq churin Jehosafat+ rey kapurqan.
25 Israelpitaq Jeroboanpa churin Nadab+ rey kapurqan Judá ayllupi rey Asá iskay wata kamachikushaqtin. Nadabqa iskay watan Israelpi kamachikurqan.
26 Payqa Jehová Diospa cheqnisqan ruwaykunatan ruwarqan. Papan jinan juchallikurqan,+ papan imaynatachus Israel runakunata juchallichirqan chay juchakunatan paypas ruwallarqantaq.+
27 Nadabwan lliu Israel runakunapiwan Filistea runakunawan maqanakunankupaq Guibetón+ llaqtata muyuykuqtinkun, Isacar ayllumanta Aiyaq churin Basaqa Nadab contra jatarispa chay llaqtapi Nadabta wañuchipurqan.
28 Rey Asá kinsa wataña Judá ayllupi kamachikushaqtinmi Basaqa Nadabta wañuchipurqan. Chay qhepamantaq pay Israelpi rey kapurqan.
29 Basaqa rey kaspa jinan Jeroboanpa familianmanta kaqkunata lliuta wañuchirqan, manan pipas qheparqanchu. Chayqa junt’akurqan Siló llaqtayoq profeta Aiyawan Jehová Diospa willachisqanman jinan.+
30 Chaykunaqa pasarqan Jeroboanpa juchallikusqanraykun, jinallataq Israel runakunata juchallichisqanrayku, Israelpa Diosnin Jehová Diosta sinchita phiñachisqanrayku ima.
31 Nadabpa wakin ruwasqankunapas lliumi Israel reykunamanta willaq libropi qelqasqa kashan.
32 Judá ayllu rey Asawan Israel rey Basawanqa tukuy tiempon guerrallapipuni karqanku.+
33 Rey Asá kinsa wataña Judá ayllupi kamachikushaqtinmi Aiyaq churin Basaqa Tirzá llaqtamanta lliu Israelta kamachiyta qallarirqan, kamachirqantaq iskay chunka tawayoq watata.+
34 Basaqa Jehová Diospa cheqnisqan ruwaykunatan ruwarqan.+ Jeroboán jinan juchallikurqan, imaynatachus Israel runakunata Jeroboán juchallichirqan chay juchakunatan paypas ruwallarqantaq.+
Uraypi willakuykuna
^ Hebreo rimaypiqa “Abisalonpa” ninmi. Yaqapaschá Absalonta chhaynata sutichallaqkutaq.
^ Hebreo rimaypiqa “Abisalonpa” ninmi. Yaqapaschá Absalonta chhaynata sutichallaqkutaq.
^ Qhaway Explicasqa simikuna nisqapi “Sayashaq k’ullu” nisqata.
^ Hebreo rimaypiqa “Alto patakunatan” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “palacionpi” nillanmantaqmi.
