1 Reyes 3:1-28
3 Salomonmi Egipto rey faraonwan rimanakurqan ususinwan casarakunanpaq. Jinan Salomonqa faraonpa ususinwan casarakurqan,+ jinaspa Davidpa Llaqtan+ nisqaman pusarqan. Chaypin tiyarqanku Salomonpa wasinta,+ Jehová Diospa wasinta,+ Jerusalén llaqta muyuriq perqankunatawan+ ruwayta tukunankukama.
2 Chay p’unchaykunapiqa manaraqmi karqanchu Jehová Diospa sutinta jatunchanapaq wasiqa,+ chaymi runakunaqa Diosta yupaychanapaq ajllasqa patakunapi* sacrificiokunata jaywaqku.+
3 Salomonqa papan Davidpa nisqanta kasukuspan rikuchisharqan Jehová Diosta munakusqanta, ichaqa yupaychana patakunapin sacrificiokunata jaywaq, ofrendakunatapas ruphachiq.+
4 Rey Salomonmi Gabaón llaqtata rirqan sacrificiokunata jaywaq, chay llaqtapin karqan allin reqsisqa Diosta yupaychanapaq ajllasqa pata.+ Chaypin Salomonqa waranqa ruphachina sacrificiokunata jaywarqan altar patapi.+
5 Gabaón llaqtapi kashaqtinmi Jehová Diosqa juj tuta Salomonman mosqoyninpi rijurirqan, chaypin nirqan: “Ima munasqaykitapas qosaykin, mañakullaway”,+ nispa.
6 Jinan Salomonqa nirqan: “Kamachiyki Davidqa ñanniykikunapin purirqan kamachikuyniykikunata kasukuspa, chaninta kausaspa, tukuytapas allinta ruwaspa, chaymi qanqa mana tukukuq jatun munakuyniykita papay Davidman rikuchirqanki. Chay munakuyniykitaqa kunankaman rikuchishallanki paypa churinta trononpi tiyaykachispayki.+
7 Kunantaq Jehová Diosníy, kay kamachiykitan papay Davidpa rantinpi rey kanaypaq churawanki, ichaqa waynallaraqmi kani, manaraqmi imatapas allintaraqchu yachani.*+
8 Diosníy, kay ajllakusqayki llaqtaqa+ sinchi jatunmi mana yupay atiyraqmi, chay llaqtata kamachinaypaqmi qanqa churawarqanki.
9 Chayrayku Diosníy, yanapaway sonqomanta kasukuq kanaypaq, allin kaqta mana allin kaqtapas reparanaypaq,+ chhaynapi kay llaqtaykita allinta juzganaypaq.+ Kay llaqtaykipi runakunaqa sinchi askhapunin, manan pipas payllamantaqa juzgayta atinmanchu”, nispa.
10 Salomonpa chay mañakusqantan Jehová Diosqa allinpaq qhawarirqan.+
11 Chaymi Diosqa Salomonta nirqan: “Qanqa manan unay kausaytachu, qhapaq kaytachu nitaq enemigoykikunata wañuchinaytachu mañakuwarqanki, aswanmi qanqa allinta juzganaykipaq yachayta mañakuwarqanki.+
12 Chaymi mañakuwasqaykiman jina qosayki+ allin yachayta allin yuyayniyoq kaytapas.+ Qan jinaqa manan ñaupa tiempopipas, kunan tiempopipas ni jamuq tiempopipas kanqachu.+
13 Chaymantapas qhapaq kayta jatunchasqa kayta+ iman qosayki manaña chaykunata mañakuwarqankichu chaypas.+ Kausasqayki p’unchaykunapiqa manan pipas qan jina kamachikuqqa kanqachu.+
14 Jinaspapas sichus papayki jina kamachikuyniykunata kasukunki, ñanniykunapipas purinki chayqa,+ unaytan kausanki”,+ nispa.
15 Puñusqanmanta rijch’arispataq Salomonqa repararqan mosqoypi chaykunata rikusqanta. Jinan Jerusalén llaqtaman rispa Jehová Diospa rimanakuynin arcaman qayllaykurqan, jinaspa ruphachina sacrificiokunata, sumaq kausay ofrendakunatawan Diosman jaywarqan.+ Chaymantapas llapa kamachinkunapaqmi sumaq mijunata askhata wayk’uchirqan.
16 Chay p’unchaykunapin iskay ramera warmikuna rey Salomonpa kasqanman rirqanku.
17 Jinan jujnin kaq warmiqa Salomonta nirqan: “Wiraqocháy, kay warmiwanmi kaq wasillapi tiyayku. Kuska kashaqtiykun juj wawata onqokurqani.
18 Onqokusqaymanta kinsa p’unchay qhepamantaq paypas onqokullarqantaq. Chay kutiqa iskaynillaykun wasipi kasharqayku, manan pipas noqaykuwanqa karqanchu.
19 Juj tutan kay warmi puñushaspa wawanta ñit’irusqa, jinan wawaqa wañupusqa.
20 Chaymi kay warmiqa kuska tutata jatariruspa puñushanaykama wawayta puñunanman* aparusqa, wañusqa wawantataq ladoyman churarusqa.
21 Tutamantan wawayta ñuñunaypaq qhawaykuqtiytaq wañusqa kapushasqa. Allinta qhawaykuqtiymi ichaqa mana onqokusqay wawaychu kasqa”, nispa.
22 Juj kaq warmin ichaqa nirqan: “¡Manan, noqaqmi kausashaq wawaqa, wañusqa wawataq qanpa!”, nispa. Jujnin kaq warmitaq nirqan: “¡Manan, noqaqmi kausashaq wawaqa, qanpan wañusqa wawaqa!”, nispa. Chhaynatan iskayninku reypa ñaupanpi jap’inakusharqanku.
23 Chaymi rey Salomonqa nirqan: “Kay warmin nin: ¡Noqaqmi kausashaq wawaqa, wañusqa wawataq qanpa!, nispa. Juj kaqtaq nin: ¡Manan, noqaqmi kausashaq wawaqa, qanpan wañusqa wawaqa!, nispa”.
24 Jinan rey Salomonqa nirqan: “¡Juj espadata apamuwaychis!”, nispa. Chaymi juj espadata apamurqanku.
25 Jinan rey Salomonqa nirqan: “Chay kausashaq wawata iskayman kuchuychis, jinaspa sapankaman kuskanta qoychis”, nispa.
26 Chayta niqtin jinan chay wawaq mamanqa wawanta munakusqanrayku reyta valekurqan: “¡Ama jinachu kay wiraqocháy! ¡Ama kay wawata wañuchiychu! ¡Aswanpas kay warmiman qopuy!”, nispa. Juj kaq warmin ichaqa nisharqan: “¡Kuchuychis iskayman! ¡Ni qanpaqpas ni noqapaqpas kananpaq!”, nispa.
27 Chayta uyarispan rey Salomonqa nirqan: “¡Ama wañuchiychischu chay wawata! Ñaupaq kaq warmiman qopuychis, paymi chay wawaq mamanqa”, nispa.
28 Llapa Israel runakunan Salomonpa chhayna juzgasqanta yacharuspa anchata admirakurqanku,*+ repararqankutaq justicia ruwananpaqqa Diospuni yachayta qosqanta.+
Uraypi willakuykuna
^ Hebreo rimaypiqa “alto patakunapi” ninmi. Qhaway Explicasqa simikuna nisqapi “Yupaychana patakuna” nisqata.
^ Hebreo rimaypiqa “waynachallaraqmi kani, manan jaykuytapas ni lloqsiytapas yachaniraqchu” ninmi.
^ Chaypiqa “marq’ayninman” nillanmantaqmi.
^ Hebreo rimaypiqa “mancharikurqanku” ninmi.
