2 Crónicas 22:1-12
22 Chaymantataq Jerusalén llaqta runakunaqa Jehorampa sullk’a churin Ocoziasta paypa rantinpi reyta churarqanku. Ocoziaspa kuraq wayqenkunataqa Arabia runakunawan jamuq suwa t’aqa soldadokunan wañuchipurqanku,+ chaymi payta reyta churarqanku. Chhaynapin Jehorampa churin Ocoziasqa Judá ayllupi kamachikuyta qallarirqan.+
2 Ocoziasqa iskay chunka iskayniyoq watanpi kashaspan kamachikuyta qallarirqan, payqa juj watan Jerusalenmanta kamachirqan. Paypa mamanmi karqan Omripa+ nietan* Atalía.+
3 Ocoziasqa Ajabpa familian jinan millay ruwaykunata ruwarqan,+ paytaqa mamanmi mana allin ruwaykunata ruwananpaq yuyaycharqan.
4 Ocoziaspa papanpa wañusqan qhepamanmi Ajabpa familianmanta kaqkuna Ocoziaspa yuyaychaqnin kapurqanku, chaymi payqa Ajabpa familian jina Jehová Diospa cheqnisqan ruwaykunata ruwarqan. Chhaynapin payqa mana allinpi tukurqan.
5 Paykunata kasukuspan Ocoziasqa Israel rey Ajabpa churin Jehoramwan kuska Ramoj-Galaad llaqtata+ rirqanku Siria rey Azaelwan+ maqanakuq. Chay maqanakuypin flechaqkunaqa Jehoramta flechawan jap’ichispa k’irimurqanku.
6 Chaymi Jehoramqa Jezrel llaqtaman+ kutipurqan, chhaynapi Siria rey Azaelwan maqanakuspa Ramá llaqtapi k’irisqankumanta qhaliyapunanpaq.+
Ajabpa churin Jehoramqa+ Jezrel llaqtapin k’irisqa* kasharqan, chaymi Jehorampa+ churin Judá ayllu rey Ocoziasqa* paywan tupaq rirqan.+
7 Chay visitasqanpin Ocoziasqa wañupurqan, Diosmi chay pasanantaqa munarqan. Jezrel llaqtaman chayaspan Ocoziasqa Jehoramwan kuska rirqanku Ninsipa nieton* Jehuwan+ tupaq, Jehová Diosmi ichaqa Jehuta ajllarqanña Ajabpa familianta lliuta wañuchinanpaq.+
8 Ajabpa familianta wañuchinanpaq riqtinmi Jehuqa chaypi tarirqan Judá ayllu autoridadkunata, Ocoziaspa wayqenkunaq churinkunata, Ocoziaspa kamachinkunata ima. Jinan paykunata lliuta wañuchirqan.+
9 Chaymantataq Ocoziastañataq maskhachimurqan, payqa Samaria llaqtapin pakakushasqa, jinan chaypi tarispa Jehupa kasqanman apamurqanku, jinaspa wañuchirqanku. Paykunan nirqanku: “Kay runaqa tukuy sonqowan Jehová Diosta serviq Jehosafatpa nietonmi”,+ nispa. Chaymi Ocoziastaqa p’amparqanku.+ Ocoziaspa familianmantan ichaqa mana pipas kapurqanchu Judá ayllupi kamachikunanpaq.
10 Atalian+ yacharurqan churin Ocoziasta wañuchipusqankuta, chaymi Judá ayllu reypa familianmanta kaqkunata lliuta wañuchirqan.+
11 Rey Jehorampa+ ususin Jehosabeajmi ichaqa Ocoziaspa churin Jehoasta+ pakarqan. Jehosabeajqa reypa churinkunata llapanta wañuchinanku kashaqtinmi chay wawata uywaqnintawan puñuna cuartopi pakarqan, chhaynapin Ataliaqa mana wañuchirqanchu.+ Jehosabeajqa Ocoziaspa pananmi karqan, qosantaq karqan sacerdote Jehoiadá.+
12 Jehoastaqa Diospa wasinpin soqta wata pakarqanku, chaykamataq Atalía Judá ayllupi kamachikusharqan.
Uraypi willakuykuna
^ Hebreo rimaypiqa “ususin” ninmi.
^ Chaypiqa “onqosqa” nillanmantaqmi.
^ Wakin ñaupa hebreo qelqakunapiqa “Azarías” ninmi.
^ Hebreo rimaypiqa “churin” ninmi.
