2 Corintios 11:1-33
11 Maytan munayman juj chhikan mana yuyayniyoq jina rimasqayta aguantawanaykichista. Ichaqa ñan aguantashawankichisña kanpas.
2 Imaynan Diosqa mayta sientesunkichis chhaynatan noqapas mayta sienteykichis, noqa kikiy juj qhariwan casarakunaykichispaq rimanachisqayrayku; chaymi ch’uya doncella sipasta* jina payman entregayta munaykichis,+ chay qhariqa Criston.
3 Ichaqa manchakushanin imaynan mach’aqwayqa yuyaysapa kayninpi Evaq sonqonta suwarqan+ chhaynata pipas qankunaq yuyayniykichista pantachinanmanta, jinapitaq Cristopaq junt’aq sonqo kanaykichismanta ch’uya kanaykichismantawan karunchanasuykichismanta.+
4 Qankunaqa aguantankichistaq noqaykuq willasqayku Jesusmanta jujnirayta willaqkunata, chaskisqaykichis espiritumantapas waj espirituta apamuqkunata, noqaykuq allin willakuykuna willasqaykumanta waj willakuyta apamuqkunatapas chayqa,+ noqatapas aguantawaychisyá.
5 Noqaq piensasqayman jinaqa, manan noqaqa ni imapipas chay sumaq apostolniykichiskunamanta pisichu kani.+
6 Manapaschá kusa rimaqchu kani,+ ichaqa allin yachayniyoqmi kani, chaytaqa tukuy imapimá riki allinta qankunamanqa rikuchirqayku.
7 ¿Icha juchatachu ruwasharqani qankuna jatunchasqa kanaykichispaq k’umuykukusqaywan kanpas? Diosmanta allin willakuykunata gratislla willasqaywanpas,+ ¿juchatachu ruwasharqani?
8 Juj iñiq t’aqakunaq qowasqankuta chaskikuspaymi paykunataraq wajchayachirqani,* chhaynapi qankunata servinaypaq.+
9 Arí, qankuna ukhupi mana imayoq rikukushaspayqa manan mayqenniykichistapas gastachirqaykichischu, aswanmi Macedoniamanta jamuq iñiqmasikuna tukuy ima necesitasqaypi yanapawarqanku.+ Noqaqa tukuy atisqaytan ruwarqani qankunamanta mana imatapas mañakunaypaq, chhaynallatapunin ruwashasaqpas.+
10 Cristota qatikushanaykamaqa alabakushallasaqmi chaykunamanta+ jinantin Acaya ladopi.
11 Ichaqa, ¿imaraykutaq chaytari ruwarqani? ¿Qankunata mana munakuspachu? Manan. ¡Diosqa allintan yachan qankuna munakusqayta!
12 Imatachus ruwashani chaytaqa ruwashallasaqmi,+ chhaynapi noqaykuwan igualakuyta munaspa apostolpaq creekuqkuna amaña yanqa alabakushanankupaq.
13 Chay apostolpaq creekuqkunaqa llullakunan kanku, jujkunata engañaspan purinku, Cristoq apostolninkunamantan pasachikunkupas.+
14 Chay ruwasqankuqa manan admirakunapaqchu, kikin Satanaspas pasachikullanmi allin* angelmantaqa.+
15 Chhaynaqa manan admirakunapaqchu serviqninkunapas chanin kaqta ruwaqkunaman tukusqankuqa. Tukukuypin ichaqa imachus ruwasqankuman jina paykunapaqqa imapas kanqa.+
16 Kaytan wajmanta nillaykichistaq: Amayá piensaychischu mana yuyayniyoq kanaypaqqa. Ichaqa chhayna kanaypaqchus piensankichis chayqa, maski chhaynatapas chaskiwaychis, chhaynapi noqapas juj chhikanta alabarikunaypaq.
17 Kunanqa manan Señorpa ejemplonta qatikuspachu rimamusaq, aswanpas mana yuyayniyoq runa jinan rimamusaq, noqa kikiypi confiaspa alabakuspa ima.
18 Askhataq kay pacha kaqkunawan alabakushanku chayqa, noqapas alabakusaqyá.
19 “Allin yuyayniyoqmi kayku” ninkichistaq chayqa, ¿imaynapitaq qankunari mana yuyayniyoqkunata gustowanraq aguantashankichis?
20 Arí, qankunaqa kusatamá aguantashankichis kamachiman tukuchiqniykichiskunata, kaqniykichiskuna tukuqkunata, kaqniykichiskuna qechuqniykichiskunata, qankunata pisichaspa jatunchakuqkunata, uyaykichispi ch’aqlasuqniykichiskunatapas.
21 P’enqaymá chaykunamanta rimayqa; wakinniykichisqa manchalikunata jinapaschá rikuwankiku manapas imatapas autoridadwanchu ruwaykuman jinata.
Mana p’enqarikuspataq wakinqa alabakushankichis chayqa, noqapas mana p’enqakuspayá alabakusaq, jinaña mana yuyayniyoqta jina wakin qhawariwanqa chaypas.
22 ¿Hebreo runakunachu paykuna kanku? Noqapas hebreo runan kani.+ ¿Israel runakunachu kanku? Noqapas Israel runallataqmi kani. ¿Abrahanpa mirayninmantachu kanku? Noqapas Abrahanpa mirayninmantan kani.+
23 ¿Cristoq serviqninkunachu kanku? Noqaqa paykunamanta aswanraqmi kani, arí, chaytaqa loco jinaraqmi nini. Noqaqa paykunamanta mastaraqmi llank’ani,+ aswan askha kutitan carcelpipas wisq’asqa karqani,+ mana yupay kutitan jasut’isqapas karqani, askha kutipin wañuy patapipas tarikurqani.+
24 Judiokunapas pisqa kutipin waqtawarqanku, sapanka kutipi kinsa chunka isqonniyoq kutita.+
25 Kinsa kutipin k’aspikunawan waqtasqa karqani,+ juj kutinmi rumikunawan ch’aqesqa karqani,+ kinsa kutipin barcopas viajashaqtiy t’ijrakurqan,+ juj tutata juj p’unchaytawanmi lamar-qocha ukhupi pasarqani.
26 Sapa kuti viajasqaypin imaymana mana allinkunapi tarikurqani mayu apawananmanta, suwakuna suwawananmanta, llaqtamasiy runakunamanta,+ waj nación runakunamantawan;+ sasachakuykunapin tarikullarqanitaq llaqta ukhukunapi,+ ch’inneqkunapi, lamar-qochapi, yanqa iñiqkuna ukhupi ima.
27 Chaymantapas noqaqa jump’ipas jump’iraqmi llank’arqani, askha kutipin mana puñuqpaschu kani,+ jinaspapas yarqasqa ch’akisqa iman tarikurqani,+ maychá mana ima mijunayoq tarikusqaypas kashan,+ chaymantapas chiriq atisqan pisi p’achasqa* iman tarikurqani.
28 Chaymantapas sapa p’unchaymi noqaqa llapa iñiq t’aqakunapi piensaspa llakisqa tarikuni.+
29 Noqaqa sinchitan llakipayani pisi kallpayoqkunata, pipas jujta urmachiqtinpas sonqoyraqmi phiñakuymanta raurarin.
30 Alabakunay kaqtinqa imakunachus pisi kallpa kayniyta rikuchin chaykunamantan alabakusaq.
31 Señorninchis Jesuspa Taytan Diosqa allintan yachan mana llullakuspa rimasqayta, payqa wiñaypaq jatunchana Diosmi.
32 Damasco llaqtapi kashaqtiymi rey Aretaspa mandonpi kashaq llaqta kamachikuqqa llaqta punkukunaman guardiakunata churasqa jap’iwanankupaq.
33 Jinan llaqta perqa ventananta canastapi uraykachiwarqanku,+ chhaynapin chay kamachikuqpa makinmanta ayqekurqani.
Uraypi willakuykuna
^ Doncella sipastaqa “qhariwan mana jayk’aq puñuq sipas” nillankutaqmi.
^ Griego rimaypiqa “suwarqani” ninmi.
^ Griego rimaypiqa “k’anchashaq” ninmi.
^ Griego rimaypiqa “q’alalla” ninmi.
