2 Samuel 11:1-27
11 Wata qallariytan* reykunaqa guerraman maqanakuq lloqsiqku. Chay tiempopin Davidqa kacharqan Joabta, kamachinkunata, llapa Israel soldadokunatawan Anmón runakunata wañuchimunankupaq. Jinan paykunaqa Rabá llaqtata muyuykurqanku,+ Davidtaq ichaqa Jerusalén llaqtapi qhepakurqan.+
2 Juj p’unchaymi tardeyaykuyta jina Davidqa puñunanmanta jatarispa wasin* patapi purikachasharqan. Chayllamanmi wasi patamanta rikurqan juj warmita bañakushaqta, chay warmiqa munay rijch’ayniyoq warmin karqan.
3 Davidmi juj kamachinta kacharqan pichus chay warmi kasqanta yachamunanpaq. Jinan Davidta nirqanku: “Payqa Elianpa+ ususin Bat-Seban,+ Het runaq+ Uriaspa+ esposan”, nispa.
4 Jinan Davidqa kamachinkunata kachallarqantaq chay warmita pusamunankupaq.+ Chaymi chay warmiqa Davidpa kasqanman jaykurqan, Davidtaq paywan puñurqan.+ Chaymantataq chay warmiqa wasinman kutipurqan. (Chayqa pasarqan chay warmi ch’uyanchakushasqan tiempopin).*+
5 Chay warmitaq onqoq kasqanta reparakuspa Davidman willachimurqan: “Onqoqmi kashani”, nispa.
6 Chayta yacharuspan Davidqa Joabman willachimurqan: “Het runa Uriasta kachamuway”, nispa. Jinan Joabqa Uriasta Davidman kacharqan.
7 Urías chayaqtintaq Davidqa payta tapurqan: “¿Imaynan Joabpas soldadokunapas kashanku? ¿Imaynan guerrapas kashan?”, nispa.
8 Chaymantataq Davidqa Uriasta nirqan: “Wasiykiman rispa samakamuy”,* nispa. Jinan Uriasqa reypa wasinmanta lloqsirqan; qhepantataq reypa regalonta* payman aparqanku.
9 Uriasmi ichaqa wasinman mana rirqanchu, aswanpas reypa llapa kamachinkunawan kuskan reypa wasin punkupi puñurqan.
10 Jinan Davidta nirqanku: “Uriasqa manan rinchu wasinman”, nispa. Chaymi Davidqa Uriasta nirqan: “Chayllaraqmá chayamushanki riki, ¿imaraykutaq wasiykimanri mana rirqankichu?”, nispa.
11 Uriastaq Davidta nirqan: “Diospa rimanakuynin arcapas,+ Israel runakunapas, Judá runakunapas karpallapin kashanku; Joab wiraqochaypas runankunapas campollapin kashanku. ¿Noqataqchu wasiyman riyman mijuq, ujaq, esposaywanpas puñuq?+ Wiraqocháy, ñaupaykipin jurayki, ¡manapunin chaytaqa ruwaymanchu!”, nispa.
12 Jinan Davidqa Uriasta nirqan: “Chhaynaqa kunan p’unchaypas kaypi qhepakuy, paqarinña ripunki”, nispa. Chaymi Uriasqa Jerusalenpi qhepakurqan chay p’unchaypas juj kaq p’unchaypas.
13 Chaymantataq Davidqa Uriasta wajachimurqan paywan mijunanpaq ujananpaq ima; chaypin Davidqa Uriasta machachirqan. Ichaqa chay tutapas Uriasqa manan wasinman rirqanchu, aswanpas reypa kamachinkunawan kuskan puñurqan.
14 Tutamantantaq Davidqa juj cartata Joabpaq qelqarqan, jinaspa Uriaswan apachirqan.
15 Chay cartapin nirqan: “Uriasta ñaupaqman churaychis maypichus sinchi maqanakuy kashan chayman, jinaspa sapallanta saqeychis chhaynapi wañuchinankupaq”,+ nispa.
16 Joabqa Rabá llaqtatan makilla qhawasharqan, chaymi allinta yacharqan may ladopichus aswan allin maqanakuq Anmón soldadokuna kasharqan chayta, chaymi Uriasta chay ladoman churarqan.
17 Anmón runakunan llaqtankumanta lloqsimuspa Joab contra maqanakurqanku. Chaypin Davidpa wakin soldadonkunata wañuchirqanku, chaypin Het runa Uriaspas wañupurqan.+
18 Guerrapi tukuy chaykuna pasasqantan Joabqa Davidman willarqan.
19 Willakuy apaqtan Joabqa nirqan: “Guerrapi chaykuna pasasqanta willayta tukuruqtiykiqa
20 yaqapaschá rey Davidqa phiñakunqa, jinaspa nisunki: ¿Imaraykun maqanakunaykichispaq nishuta llaqtaman qayllaykurqankichis? ¿Manachu repararqankichis llaqta perqa patamanta flechamunasuykichista?
21 ¿Manachu yuyarqankichis Jerubesejpa+ churin Abimelectapas imayna wañuchisqankuta?+ Juj warmimá riki Tebez llaqta perqa patamanta kutana rumita chanqaykamuspa wañuchirqan. Chhaynaqa, ¿imaraykun nishuta llaqtaman qayllaykurqankichis?, nispa. Chayta niqtinqa ninkin: Kamachiyki Uriaspas wañupunmi, nispa”.
22 Jinan willakuy apaqqa ripurqan, jinaspa Davidman willarqan Joabpa tukuy nisqanta.
23 Chaymantapas Davidtan nillarqantaq: “Chay runakunan noqaykuwan maqanakuq lloqsimurqanku, paykunaqa kallpasapakunan kasqaku. Chaywanpas llaqta punkukaman noqaykuqa kutiyachirqayku.
24 Jinan Anmón runakunaqa llaqta perqa patamanta flechamuspa wakin kamachiykikunata wañuchimunku. Kamachiyki Uriastapas wañuchipunkun”,+ nispa.
25 Chayta uyarispan Davidqa willakuy apaqta nirqan: “Joabta kallpachaykuy, jinaspapas nimuy: Ama llakikuychu chay pasasqanmantaqa, guerrapiqa runakunaqa wañunkupunin. Aswanpas astawanraq kallpachakuychis, jinaspa chay llaqtata atipaychis,+ nispa”.
26 Uriaspa esposantaq khuyayta waqaykurqan qosan wañupusqanta yacharuspa.
27 Lutopi kasqan tiempo pasaruqtin jinataq Davidqa Bat-Sebata wasinman pusachimurqan. Chhaynapin payqa Davidpa esposan kapurqan,+ juj wawatataq paypaq onqokurqan. Davidpa chay ruwasqanmi ichaqa Jehová Diospaqqa* sinchi mana allin karqan.+
Uraypi willakuykuna
^ Chayqa ch’akiriy tiempo qallariymi karqan, abril killapi jina. Qhaway “Astawan yachanapaq B15” nisqata.
^ Chaypiqa “palacion” nillanmantaqmi.
^ Chayqa yaqapaschá pasarqan killanmanta ch’uyanchakushaqtin.
^ Hebreo rimaypiqa “chakiykita maqchikamuy” ninmi.
^ Chayqa yaqapaschá karqan invitadokunapaq reypa wayk’uchisqan mijuna.
^ Hebreo rimaypiqa “Jehová Diospa ñawinpaqqa” ninmi.
