2 Samuel 5:1-25
5 Tiempowanmi Israelpi kaq llapa ayllukunamanta runakuna Davidwan rimaq Hebrón+ llaqtaman jamurqanku, jinaspa nirqanku: “¡Kaypin kashayku! Noqaykuqa wayqeykikunan kayku.*+
2 Saúl reyniyku kashaqtinraqmi qanqa ñaupaqmantaña umallirqanki Israel soldadokuna guerraman riqtin.+ Qantan Jehová Diosqa nirqasunki: Qanmi Israel llaqtayta michinki, qanmi Israel runakunaq umallinpas kanki,+ nispa”.
3 Llapa Israel umalliqkunan* Hebrón llaqtata jamurqanku rey Davidwan tupaq. Chaypin rey Davidqa Jehová Diospa ñaupanpi juj acuerdota paykunawan ruwarqan.+ Chaymantataq paykunaqa Davidta Israelpi rey kananpaq aceitewan jich’aykurqanku.+
4 Davidqa kinsa chunka watayoqmi kasharqan rey jina kamachikuyta qallarispaqa, tawa chunka watataq kamachikurqan.+
5 Payqa Hebrón llaqtamantan Judá aylluta kamachirqan qanchis watata soqta killatawan, Jerusalén+ llaqtamantataq llapa Israel llaqtata Judá ayllutawan kamachirqan kinsa chunka kinsayoq watata.
6 Chaymantataq rey Davidqa runankunapiwan Jerusalén llaqtata rirqanku Jebús runakunawan maqanakuq,+ chay runakunaqa chay ladokunapin tiyasharqanku. Jebús runakunataq Davidmanta burlakuspa nirqanku: “¡Manan jayk’aqpas kaymanqa jaykumunkichu! Qantaqa ñausakunallaraqchá wist’ukunallaraqchá mancharichisunkiman”, nispa. Paykunaqa nisharqankun: “Davidqa manan jayk’aqpas jaykumunqachu”,+ nispa.
7 Davidmi ichaqa Sion orqopi kaq allin perqasqa llaqtata jap’ikapurqan, chaytan kunanqa sutichakun Davidpa Llaqtan+ nispa.
8 Chay p’unchaymi Davidqa nirqan: “¡Pikunachus Jebús runakunawan maqanakuq riqkunaqa unu purina t’oqonta jaykuchunku, jinaspa chay wist’ukunata ñausakunata wañuchichunku, paykunatan noqaqa cheqnikuni!”, nispa. Chayraykun rimaypas kan: “Ñausakunapas wist’ukunapas wasimanqa manan jayk’aqpas jaykunqakuchu”, nisqa.
9 Jinan Davidqa chay allin perqasqa llaqtapi tiyapurqan, chay llaqtatan suticharqanku* Davidpa Llaqtan nispa. Chaypin Davidqa wasikunatapas perqakunatapas ruwayta qallarirqan Miló* nisqa moqomanta+ ukhu ladoman.+
10 Chhaynapin Davidqa pisi-pisimanta aswan atiyniyoqman tukupusharqan.+ Ejercitokunata kamachiq Jehová Diosqa* Davidwanmi kasharqan.+
11 Tiro llaqtaq reynin Hirammi+ willaqkunata Davidman kacharqan. Chaymantapas cedro maderakunatan apachirqan.+ Perqakunata jatarichinankupaqtaq kacharqan wasi sayarichiqkunata maderawan llank’aqkunatawan. Chay runakunan Davidpaq juj wasita* ruwayta qallarirqanku.+
12 Jinan Davidqa repararqan Jehová Diospuni kamachikuyninta Israel llaqtapi tajyachisqanta,+ Israel llaqtanrayku paypa gobiernonta jatunchasqantapas.+
13 Hebrón llaqtamanta kutipuspan Davidqa Jerusalén llaqtapi askha esposakunata yapakurqan,+ yapakullarqantaqmi tiyaqmasin warmikunatapas.* Chay warmikunapin churinkunapas ususinkunapas kallarqantaq.+
14 Jerusalén llaqtapi naceq wawankunaqa kaykunan karqan: Samúa, Sobaf, Natán,+ Salomón,+
15 Ibar, Elisúa, Néfeg, Jafía,
16 Elisamá, Eliadá, Elifelejpiwan.
17 Davidta Israelpi reyta churasqankuta yacharuspan+ Filistea runakunaqa Davidwan maqanakuq rirqanku.+ Chayta yacharuspan Davidqa pakakamurqan.+
18 Jinan Filistea runakunaqa Refaín wayq’oman chayamuspanku wayq’ontinpi kasharqanku.+
19 Chaymi Davidqa Jehová Diosta tapurqan:+ “¿Risaqchu Filistea runakunawan maqanakuq? ¿Makiymanchu paykunata entregawanki?”, nispa. Jehová Diostaq Davidta nirqan: “¡Arí, rillay! Noqan makiykiman Filistea runakunata entregasayki”,+ nispa.
20 Jinan Davidqa Baal-Perazinman rispa Filistea runakunata atipamurqan. Chay qhepamanmi Davidqa nirqan: “Jehová Diosmi enemigoykunata atipamun,+ imaynan mayu unu perqata thunin jinaraq”, nispa. Chaymi chay cheqasta suticharqan Baal-Perazin+ nispa.
21 Filistea runakunaqa chaypin idolonkuta saqerparipurqanku, chaytan Davidqa runankunapiwan apapurqanku.
22 Chaymantataq Filistea runakunaqa jujmanta jamullarqankutaq, jinaspa Refaín wayq’ontinpi kasharqanku.+
23 Chaymi Davidqa Jehová Diosta tapurqan, jinan Diosqa nirqan: “Ama uyapura tupaqqa riychu, aswanpas qhepankuta muyuramuy, jinaspa bacá nisqa sach’a-sach’a ukhumanta lloqsimuspa phawaykunki.
24 Bacá nisqa sach’akunaq umanpa kuyusqanmi runaq purisqan jina uyarikunqa, chayta uyarispaqa ama iskayaspan phawaykunki, chay ratun noqa Jehová Diosqa ñaupaykita lloqsisaq Filistea soldadokunata atipanaypaq”, nispa.
25 Jinan Davidqa Jehová Diospa kamachisqanman jina ruwarqan, chhaynapin Filistea runakunata qatipaspa wañuchirqanku+ Gueba+ llaqtamanta Guézer+ llaqtakama.
Uraypi willakuykuna
^ Chaypiqa “yawarniykin kayku” nillanmantaqmi.
^ Chaypiqa “Israelpi kuraq runakunan” nillanmantaqmi.
^ Chaypiqa yaqapaschá “chay llaqtatan pay suticharqan” nillanmantaq.
^ Qhaway Explicasqa simikuna nisqapi “Ejercitokunata kamachiq Jehová Dios” nisqata.
^ Chaypiqa “palaciota” nillanmantaqmi.
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
