Jeremías 25:1-38
25 Josiaspa churin Judá rey Jehoiaquin tawa wataña kamachikushaqtinmi,+ rey Nabucodonosorpas Babiloniapi juj wata kamachikushaqtinmi Jeremiasqa Judá runakunapaq willakuykunata chaskirqan.
2 Judá runakunata llapa Jerusalenpi tiyaq runakunatawanmi profeta Jeremías nirqan:
3 “Amonpa churin rey Josías Judapi chunka kinsayoq wataña+ kamachikusqanmanta kunankaman, kay iskay chunka kinsayoq watakunaña Jehová Diosmanta chaskisqay willakuykunata qankunaman willashallarqaykichis, qankunan ichaqa mana uyarikuyta munarqankichischu.+
4 Jehová Diosqa llapa kamachin profetakunatan sapa kutilla kachamurqasunkichis, qankunan ichaqa mana kasukurqankichischu ni uyarikuqpas tukurqankichischu.+
5 Paykunan nirqasunkichis: Ama jinachu kaychis, sapankaykichis mana allin ñanta saqepuychis, mana allin ruwayniykichista qonqapuychis,+ chhaynapin unay tiempo kausankichis Jehová Diospa qosqasuykichis jallp’api, ñaupa taytaykichiskunaman unay tiempomantaña qosqan jallp’api.
6 Amaña waj dioskunata serviychischu nitaq k’umuykuychispaschu, ruwasqaykichis idolokunawanmi Diosta phiñachishankichis, sichus chaykunata ruwashallankichis chayqa ñak’ariytan chayachimusunkichis, nispa.
7 ”Jehová Diosmi nin: Qankunaqa manan uyariyta munawarqankichischu, aswanmi mana allinnillaykichispaqtaq ruwasqaykichiskunawan phiñachiwarqankichis,+ nispa.
8 ”Chayraykun ejercitokunata kamachiq Jehová Dios khaynata nin: Simiykunata mana kasukusqaykichisraykun
9 wichay lado llaqtakunata wajachisaq,+ kay suyu contra, kay suyupi tiyaqkuna contra,+ muyuriqninkupi tiyaq nacionkuna contran+ kamachiy Babilonia rey Nabucodonosorta wajachisaq.+ Lliutan thunisaq, mancharikunamanmi tukuchisaq, silbapayanamanmi, asipayanamanmi tukuchisaq, wiñaypaqmi thunisqa kanqa, ninmi Jehová Dios.
10 Kusikuyninkutapas q’ochukuyninkutapas chinkachipusaqmi,+ casarakuq qhariq kusikuynintapas casarakuq warmiq kusikuynintapas chinkachipusaqmi,+ manañan kutanapi kutasqankupas uyarikunqañachu, mecheropas* manan k’anchanqañachu.
11 Llapa kay suyun thunisqa kanqa, mancharikunan kapunqa, Babilonia reytan kay nacionkunaqa qanchis chunka wata servinqaku,+ nispa.
12 ”Jehová Diosmi nin: Qanchis chunka wata junt’akuqtintaq+ Babilonia reymanta chay nacionmantawan cuentata mañasaq,+ mana allinkuna ruwasqankumantan cuentata mañasaq,* wiñaypaqmi Caldea runakunaq jallp’antaqa purunyachipusaq.+
13 Chay suyu contra llapa rimasqaytan chayachimusaq kay qelqapi qelqakusqanman jina, llapa nacionkunaq contranpi Jeremiaspa profetizasqanman jina.
14 Askha nacionkunan, atiyniyoq reykunan+ paykunataqa kamachinkuman tukuchinqaku,+ noqan juchankumanta mana allinkuna ruwasqankumanta kutichipusaq,+ nispa”.
15 Jehová Diosmi, Israelpa Diosninmi niwarqan: “Kay phiñakuyniy vinoyoq copata jap’iy, jinaspa kachasqay llapa nacionkunaman ujachimuy.
16 Ujaspankun thampiykachanqaku, espadata paykunaman chayachisqayraykun loco jina purinqaku”,+ nispa.
17 Jinan noqaqa Jehová Diospa makinmanta chay copata chaskirqani, jinaspan Jehová Diospa kachawasqan llapa nacionkunaman ujachirqani.+
18 Ñaupaqtaqa ujachirqani Jerusalenman, Judá llaqtakunaman,+ reyninkunaman, autoridadninkunaman iman, chhaynapi ch’usaqyachisqa, mancharikuna, silbapayasqa, asipayasqa, ñakasqa kanankupaq,+ imaynan kunan p’unchay junt’akunanpaqña kashan jinata.
19 Chaymantataq ujachirqani Egipto rey faraonman, kamachinkunaman, autoridadninkunaman, llapa runankunaman,+
20 chay suyupi tiyaq waj llaqta runakunaman; Uz jallp’a reykunaman; Filistea jallp’a reykunaman,+ Asquelonman,+ Gazaman, Ecronman, Asdojpi qhepaqkunaman;
21 Edomman,+ Moabman,+ Anmonman;+
22 Tiro reykunaman, Sidón reykunaman,+ lamar-qocha isla reykunaman;
23 Dedanman,+ Temaman, Buzman, llapa ninri pata chujchanku rutukuqkunaman;+
24 Arabia reykunaman,+ ch’inneq lado llaqtakunapi reykunaman;
25 Zimrí reykunaman, Elam reykunaman,+ Media reykunaman;+
26 wichay lado reykunaman, qayllapi kaqman karupi kaqmanpas. Llapallankun ch’ulla-ch’ullamanta ujanqaku, llapa pachantinpi gobiernokunapas; chay qhepamantaq Sesac* rey+ ujanqa.
27 Diosmi niwarqan: “Khaynatan ninki: Ejercitokunata kamachiq Jehová Diosmi, Israelpa Diosninmi nin: Ujaychis, machaychis, aqtupakuychis, mana sayariy atinaykichiskama wijch’ukuychis,+ espadatan qankuna contra chayachimusaq, nispa.
28 Sichus chay copata mana chaskikuyta munanqakuchu chayqa, khaynatan ninki: Ejercitokunata kamachiq Jehová Diosmi nin: ¡Ujanaykichispunin!
29 Qhawariychis, sutiyta apaq llaqtamantaq ñak’ariyta chayachimusaq+ chayqa, ¿manachu qankunamanpas ñak’ariyta chayachimunallaytaq?,+ nispa.
”Manan castiganaymantaqa salvakunkichischu, pachantinpi tiyaq runakunamanmi espadata chayachimusaq, ninmi ejercitokunata kamachiq Jehová Dios.
30 ”Llapa kay simikunatan profetizanki:
Altomantan Jehová Dios qaparimunqa,ch’uya tiyananmantapachan kunkanta uyarichimunqa.
Tiyanan contran kallpawan qaparimunqa.
Uvas saruqkuna jinan qaparinqa,kay jallp’api llapa tiyaqkunata atipaq jinan takinqa.
31 Kay pachaq k’uchunkunakamaraqmi qapariy uyarikunqa,Jehová Diosmi nacionkuna contra juiciota ruwanqa.
Pay kikinmi llapa runakunata juzganqa,+millay runakunatan espadaman entreganqa, ninmi Jehová Dios.
32 Ejercitokunata kamachiq Jehová Diosmi khaynata nin:
¡Qhawariychis! Ñak’ariymi nacionkunaman mast’arikushan,+sinchi wayran kay pachaq k’uchunkunamantaraq jatarimunqa.+
33 ”Chay p’unchaypi Jehová Diospa wañuchisqankunaqa pachantinpin wijch’u-wijch’u kashanqaku, manan pipas paykunamantaqa waqanqachu nitaq oqarisqapaschu ni p’ampasqapaschu kanqaku. Jallp’apaq wanu jinan kapunqaku, nispa.
34 ”¡Michiqkuna waqaychis, qapariychis!
¡Ñaupaq puriq ovejakuna pampapi qhospaychis,ñak’asqa ch’eqechisqa kanaykichis tiempon chayamun,ancha valorniyoq p’uyñu jinan urmankichis!
35 Michiqkunapaqqa manan mayman ayqenanku kanchu,ñaupaq puriq ovejakunaqa manan imayna ayqekuyta atinqakuchu.
36 ¡Uyariychis! Michiqkunan qaparimushan,ñaupaq puriq ovejakunan waqamushan,Jehová Diosmi pastonkuta ch’usaqyachipun.
37 Sumaq thajpi tiyakuna ladokunaqa wañusqa jinan kashan,Jehová Dios k’araqta phiñakusqanraykun chhayna kashan.
38 Noqaqa tiyananmanta lloqsimuq malta león jinan tiyanayta saqepuni,+wañuchiq espadaraykun,k’araq phiñakuyniyraykun jallp’ankuqa mancharikuna kapun”, nispa.
Uraypi willakuykuna
^ Chaypiqa “lamparapas” nillanmantaqmi.
^ Chaypiqa “castigasaq” nillanmantaqmi.
^ Yaqapaschá chay sutiqa Babiloniaq juj kaq sutin karqan.
