Jeremías 50:1-46
50 Babilonia nacionmantan,+ Caldea runakunaq jallp’anmantan Jehová Diosqa profeta Jeremiaswan khaynata willachirqan:
2 “Nacionkunapi rimariychis, nacionkunaman willaychis.
Juj k’aspita señalta jina sayachispa willaychis.
¡Ama imatapas pakaychischu!
Niychis: Babilonian atipasqa kapun.+
Bel diosninkun p’enqachisqa kapun.+
Merodacmi sinchi mancharisqa kashan.
Idolonkunan p’enqachisqa kashan.
Millakunapaq* idolonkunan sinchi mancharisqa kashan, nispa.
3 Wichay ladomantan juj nación jamun phawaykunanpaq.+
Mancharikunamanmi jallp’anta tukuchin;manan pipas chaypiqa tiyanñachu.
Runapas uywakunapas ayqekapunmi, lliumi ripun”, nispa.
4 Jehová Diosmi nin: “Chay p’unchaykunapin, chay tiempopin Israel llaqta Judá llaqtawan kuska jampunqaku.+ Purishaspan waqanqaku,+ kuskan Jehová Diosninkuta maskhawanqaku.+
5 Sion ladota qhawarispan Sionman riq ñanmanta tapukunqaku,+ ninqakutaq: Jamuychis, Jehová Dioswan wiñaypaq rimanakuyta ruwasun wajmanta llaqtan kananchispaq,+ nispa.
6 Llaqtayqa chinkasqa t’aqa ovejakuna jinan kasharqan,+ michiqnillankutaqmi chinkachirqan.+ Orqokunamanmi aparqanku, moqo patakunapin comunta purichirqanku. Ovejakunaqa maychus samakunankutapas qonqapurqankun.
7 Pi tariqmi mijupuq,+ enemigonkunan niqku: Manan juchayoqchu kayku, paykunaqa Jehová Dios contran, chanin tiyana contran juchallikurqanku, ñaupa taytankuq suyakunan Jehová Dios contran juchallikurqanku, nispa”.
8 “Babiloniamanta ayqeychis,Caldea runakunaq jallp’anmanta lloqsiychis,+ñaupaqta puriq anejo jina, orqo cabra jina kaychis.
9 Wichay lado jallp’amantan juj t’aqa jatun nacionkunata wajachishani,+Babilonia contran kachamushani.
Ordenpin maqanakunankupaq jamunqaku,chay ladomantan Babiloniaqa atipasqa kanqa.
Flechankuqa guerrapi maqanakuqpa jinan,tayta-mamakunatan mana churiyoqta saqen,+flechankuwanqa jap’ichillankupunin.
10 Caldea suyuqa ch’utisqan kanqa,+llapa ch’utiqninkunan kusisqa kashanqaku”+ ninmi Jehová Dios.
11 Diosmi nin: “Herenciayta ch’utispan+ qankunaqa kusikurqankichis,+fiestatan ruwarqankichis.
Pastopi saltaykachaq uña waka jinan saltaykacharqankichis,orqo caballokuna jinan wijijijirqankichis.
12 Mamaykichisqa p’enqachisqan kapun.+
Wachakuqniykichisqa llakisqan kashan.
¡Qhawariychis! Payqa nacionkunamanta aswan juch’uy kaqmi,mana unuyoq ch’aki pampan, ch’inneq pampan kapun.+
13 Jehová Dios phiñakusqanraykun mana pipas tiyanqañachu,+lliumi purunyachisqa kapunqa.+
Babilonianta llapa puriqkunan mancharisqa qhawanqaku,imaynapi tarikusqanta rikuspan admirasqa qhawanqaku.+
14 Maqanakuypaq ordenpi Babiloniaman tukuy ladomanta phawaykuychis,llapa flechana arcota chutaqkuna phawaykuychis,ama mich’akuspa flechaychis,+Jehová Dios contran payqa juchallikun.+
15 Pay contra tukuy ladomanta guerrapaq qapariychis,payqa atipasqan kapun.
Columnankunapas urmaykapunmi, perqankunapas ñut’usqan kapun,+Jehová Diospa vengakusqanmi chayqa.+
Paymanta vengakuychis,imayna ruwasqanta jina payta ruwaychis.+
16 Babiloniamanta tarpuqta chinkachiychis,cosecha tiempopi ichhuna jap’iqta chinkachiychis.+
Millay espada jawan sapanka llaqtankuman kutipunqaku,sapankan jallp’ankuman ayqekunqaku.+
17 ”Israel runakunaqa ch’eqechisqa ovejakunan kanku,+ leonkunan ch’eqechirqan.+ Ñaupaqtaqa Asiria reymi mijurqan,+ chaymantataq Babilonia rey Nabucodonosor tullunkuta k’uturqan.+
18 Chayraykun ejercitokunata kamachiq Jehová Dios, Israelpa Diosnin khaynata nin: Babilonia reymantan jallp’anmantawan cuentata mañasaq, imaynan Asiria reymanta cuentata mañarqani chhaynata.+
19 Israeltan pastonkunaman kutichimpusaq,+ Carmelo orqopin, Basán orqopin mijukunqaku.+ Efrainpa orqonkunapin,+ Galaadpa orqonkunapin sajsaykunqaku,+ nispa”.
20 Jehová Diosmi nin:
“Chay p’unchaykunapin, chay tiempopin Israelpa juchanqa maskhasqa kanqa,ichaqa manan ni jujpas kanqachu,Judapa juchankunaqa manan tarikunqachu,noqan qhepachisqay runakunata perdonasaq”,+ nispa.
21 Jehová Diosmi nin: “Meratain jallp’aman, Pecojpi tiyaqkunaman phawaykuy.+
Wañuchisqa, ch’usaqyachisqa kachunku.
Llapa kamachisqayta ruway.
22 Suyupin guerrapaq ch’aqway uyarikun,jatun ñak’ariymi uyarikun.
23 ¡Ikiraqmi, imaynatan pachantinta ñut’uq martillota p’akirqanku!+
¡Imaynapin Babilonia llapa nacionkunaq mancharikunanman tukupurqan!+
24 Yau Babilonia, trampatan churarqayki,qantaq mana cuentata qokuspa chayman urmarqanki.
Tarisqan karqanki, jap’isqan karqanki,+Jehová Dios contran qanqa jatarirqanki.
25 Jehová Diosmi arma waqaychananta kichan,chaymantan phiñakuyniy armakunata orqomun.+
Tukuy munayniyoq Señorpan, ejercitokunata kamachiq Jehová Diospan,Caldea runakunaq jallp’anpi juj ruwanan kashan.
26 Karukunamantaraq jamuspa Babiloniaman phawaykuychis.+
Mijuy waqaychanankunata kichaychis.+
Paymanta qechusqaykichista trigota jina montoychis.
Lliuta chinkachiychis,+ama pipas paymanta qhepachunchu.
27 Llapa malta toronkunata wañuchiychis,+ñak’anaman uraykamuchunku.
¡Imaraqmi paykunamanta, p’unchayninkun chayamun!
¡Cuentata qonanku tiempon chayamun!
28 Ayqekuqkunatan uyarikun,Babilonia jallp’amanta escapaqkunatan uyarikun,Jehová Diospa vengakuyninta Sionpi willanankupaqmi escapashanku,templonmanta vengakuyta willanankupaqmi ayqekushanku.+
29 Babilonia contra flechaqkunata wajachimuychis,llapa flechana arco chutaqkunata wajachimuychis.+
Paypa muyuriqninpi karpakuychis, ama pitapas escapachiychischu.
Imachus ruwasqanmanta kutichipuychis,+ruwasqanta jina payta ruwaychis,+Jehová Diospa ñaupanpin jatunchakurqan,Israelpa ch’uya Diosninpa ñaupanpin k’ankaykacharqan.+
30 Chayraykun waynankunaqa plazankunapi urmanqaku,+chay p’unchaymi llapa soldadonkuna wañunqaku”* nispan nin Jehová Dios.
31 Tukuy munayniyoq Señormi, ejercitokunata kamachiq Jehová Diosmi nin:
“Yau mana kasukuq k’ullu+ Babilonia, ¡qhawariy! Qan contran kashani.+
P’unchayniykiqa jamunanmi, cuentata mañanay tiempoqa chayamunanmi.
32 Yau k’ulluchakuq, misk’aspan urmanki,manan pipas sayarichisunkichu.+
Llaqtaykikunatan kanaykusaq,llapa muyuriqniykipi kaqkunatan ruphaykunqa”, nispa.
33 Ejercitokunata kamachiq Jehová Diosmi nin:
“Israel runakunan, Judá runakunan sarunchasqa kashan,llapa apaqninkunaq makinpin kashan.+
Manan kachariyta munankuchu.+
34 Wajmanta rantiqqa kallpasapan,+ejercitokunata kamachiq Jehová Diosmi sutinqa.+
Noqan quejakuyninkuta uyarispa defiendesaq,+thaj kaytan suyunkuman qosaq,+Babiloniapi tiyaqkunatataq khatatatachisaq”,*+ nispa.
35 Jehová Diosmi nin: “Caldea runakuna contran juj espada jamunqa,Babiloniapi tiyaqkuna, autoridadninkuna, yachaysapa runankuna contran jamunqa.+
36 Falso profetakuna contran espada jamunqa, mana yuyayniyoqkuna jinan kanqaku.
Soldadonkuna contran espada jamunqa, sinchi manchakuymi paykunata atipanqa.+
37 Caballonkuna, carretankuna contran espada jamunqa,chaypi kaq tukuy ladomanta runakuna contran jamunqa,sinchi mancharisqa warmi jinan kanqaku.+
Paypa valorniyoq cosasninkuna contran espada jamunqa,lliutan valorniyoq cosasninkunata apakapunqaku.+
38 ¡Ikiraqmi ununmanta! Ch’akichisqan kapunqa.+
Babiloniaqa thupasqa idolokunaq jallp’anmi,+manchakunapaq rijuriykunata rikuspan paykunaqa loco jina kashanku.
39 Chayraykun chaypiqa ch’inneqpi kaq animalkuna aullaq animalkunawan tiyanqaku,avestruzkunan chaypi tiyanqaku.+
Chaypiqa manan jayk’aqpas runaqa tiyanqañachu,wiñay-wiñaypaqmi purun kanqa”,+ nispa.
40 Jehová Diosmi nin: “Thunisqay Sodoma llaqta, Gomorra llaqta jinan,+ qayllanpi llaqtakuna jinan ch’usaqyachisqa kanqa,+ manan pipas chaypiqa tiyanqañachu, manan pipas chaypiqa wasichakunqañachu.+
41 ¡Qhawariychis! Wichay ladomantan juj llaqta jamunqa,sinchi karumantan jatun nación jamunqa,+sinchi karumantan atiyniyoq reykuna jamunqa.+
42 Flechana arcontin juch’uy lanzantin iman jamunqaku.+
Paykunaqa millaymi kanku, manan pitapas khuyapayanqakuchu.+
Caballo sillapi rispaqa lamar-qocha jinaraqmi qaparinku.+
Yau Babilonia llaqta, juj runa jinallan qan contra phawaykamunankupaq ordenpi kashanku.+
43 Babilonia reymi paykunamanta willakuyta uyarin,+manañan makinkunapi kallpa kapunchu.+
Manchakuymi payta atipashan,nanaywan jap’ichikuq onqoq warmi jinan kashan.
44 ”Jujmi Jordán sach’a-sach’amanta lloqsimuq león jina, Babiloniaq allin pastonkuna contra wichamunqa, usqhayllan paykunata* jallp’ankumanta qatirparisaq. Ajllasqay umallitan chayman churasaq.+ ¿Pin noqa jina kanman, pin churapakuwanman? ¿Mayqen michiqmi noqa contra sayarinman?+
45 Chayrayku Jehová Dios Babiloniata imachus ruway munasqanta,+ Caldea runakunaq jallp’an contra imachus yuyaykusqayta uyariychis;uña ovejakunatan pampanta aysaspa apakapunqaku.
Mana allinkuna ruwasqankuraykun tiyasqanku jallp’a purunyachisqa kanqa.+
46 Babilonia nación atipasqa kaqtin suenaywanmi jallp’a chhafchikunqa,nacionkunapin qapariy uyarikunqa”,+ nispa.
Uraypi willakuykuna
^ Hebreo rimaypiqa uywa phusnumantapas rimashanman jinan kashan. Chaywanmi rikuchishan chay idolokunaqa sinchi millaypuni kasqanta.
^ Hebreo rimaypiqa “ch’inyachisqa kanqaku” ninmi.
^ Khatatataytaqa “kharkatiy” nillankutaqmi.
^ Chaypiqa Babilonia runakunamantan rimashanman.
