Daniel 1:1-21
1 Judapi kamachikuq rey Jehoiaquin+ kinsa wataña kamachikushaqtinmi Babilonia rey Nabucodonosorqa Jerusalenman chayarqan jinaspa muyuykurqan.+
2 Chaymantataq Jehová Diosqa Judapi kamachikuq rey Jehoiaquinta entregarqan+ rey Nabucodonosorman, entregallarqantaqmi Diospa wasinpi wakin serviciokunatapas. Nabucodonosortaq chay serviciokunata Sinar* jallp’aman+ apapurqan, jinaspa diosninpa wasinman valorniyoq cosaskuna waqaychananman churarqan.+
3 Chaymantataq rey Nabucodonosorqa palacionpi oficialkunaq umallin Aspenazta kamachirqan wakin Israel runakunata* apamunanpaq. Astawanqa reypa familianmanta kaqkunata palaciopi kamachikuqkunata iman pusamunan karqan.+
4 Paykunaqa munay rijch’ayniyoq qhali waynakunan* kananku karqan; allin yachayniyoq, allin yuyayniyoq, allin reparaq waynakuna;+ reypa palacionpi servinankupaq jina waynakuna. Aspenazmi paykunata yachachinan karqan ima simitachus Caldea llaqtapi rimanku, imaynatachus qelqanku chaykunata.
5 Chaymantapas reyqa kamachillarqantaqmi paypa sumaqllaña mijunan mijuyta, ujanan vinotawan paykunaman sapa p’unchay qonankupaq. Kinsa watan paykunata yachachinanku karqan, chay qhepamantaq waynakunaqa reyta servinanku karqan.
6 Chay waynakuna ukhupin kasharqanku Judá ayllumanta Daniel,*+ Hananías,* Misael,* Azarías*+ ima.
7 Reypa palacionpi oficialmi paykunaman juj sutikunata* churarqan, Danieltan suticharqan Beltsasar+ nispa, Hananiastataq Sadrac nispa, Misaeltataq Mesac nispa, Azariastataq Abednego+ nispa.
8 Danielmi ichaqa sonqonpi allinta yuyaykurqan reypa mijunanta amapuni mijunanpaq, ujanan vinotapas amapuni ujananpaq, chaykuna Diospa kamachikuyninman jinaqa qhelli kasqanrayku. Chaymi palaciopi oficialta valekurqan chay mijuykunata vinotapas amapuni qonanpaq.
9 Cheqaq Diosqa allinpaqmi chay oficialwan Danielta qhawarichirqan khuyapayachirqan+ iman.
10 Ichaqa chay oficialmi Danielta nirqan: “Manchakunin señorniy reyta, paymi ñaupaqmantaña nirqan qankuna imatachus mijunkichis ujankichis chayta. Qhawarispachus wiñaymasiykichis waynakunamanta pisi kallpayoqta rikusunkichis chayqa, qankuna jawan paypa ñaupanpi juchachasqa kasaq”, nispa.
11 Chay oficialmi juj guardiata churasqa Danielta, Hananiasta, Misaelta, Azariastawan qhawarinanpaq, paytan Danielqa nirqan:
12 “Ama jinachu kay, chunka p’unchay noqayku kamachiykikunaman verdurakunallata* qowayku mijunaykupaq, ujanaykupaqpas unullata qowayku; jinaspa qhawarinki imaynallas kasaqku chayta.
13 Chaymantataq reypa mijuyninta mijuq waynakunawan tupanachiwankiku, jinaspa qanña qhawarinki noqayku kamachiykikunawan imatachus ruwanki chayta”, nispa.
14 Guardiaqa allinpaqmi qhawarirqan chay nisqankuta, chaymi chunka p’unchay paykunawan chayta ruwarqan.
15 Chunka p’unchay qhepamanqa paykunan aswan allin* kasharqanku reypa mijuyninta mijuq llapa waynakunamantaqa; aswan kallpasapan kasharqankupas.
16 Chaymi guardiaqa reypa sumaqllaña mijuyninkunata vinontapas qonanmantaqa verdurakunallataña paykunaman qorqan.
17 Diosmi chay tawa waynakunaman qorqan yachayta allin reparaq kaytawan, chaymi paykunaqa ima qelqasqatapas allinta entiendeqku. Danielqa yachaytan chaskirqan llapa rijuriykunapas mosqoykunapas imachus kasqanta sut’inchananpaq.+
18 Reypa kamachisqan kinsantin wata junt’akuqtintaq,+ palaciopi oficialqa Nabucodonosorpa ñaupanman chay waynakunata pusarqan.
19 Jinan reyqa paykunawan rimarqan, ichaqa manan mayqen waynapas Daniel jina, Hananías jina, Misael jina, Azarías+ jinaqa karqanchu. Chaymi paykunaqa reyta servirqanku.
20 Rey imatapas allin yuyaywan yachaywan ruwana kaqkunata tapukuqtinqa paykunan allin yachaywan kutichiqku; chaypin reyqa repararqan kamachisqan suyupi llapa watuq sacerdotekunamantapas suerte qhawaqkunamantapas+ chunka kuti más yachayniyoq kasqankuta.
21 Danielqa rey Ciroq kamachiyta qallarisqan watapipas Babiloniapin kasharqan.+
Uraypi willakuykuna
^ Chaypiqa Babiloniamantan rimashan.
^ Hebreo rimaypiqa “Israelpa churinkunata” ninmi.
^ Hebreo rimaypiqa “erqekunan” ninmi.
^ Hananías sutiqa “Jehová Diosqa khuyapayakuqmi” ninantan nin.
^ Azarías sutiqa “Jehová Diosmi yanapaqqa” ninantan nin.
^ Misael sutiqa yaqapaschá “¿pitaq Dios jinari kanman?” ninanta nin.
^ Daniel sutiqa “juezniyqa Diosmi” ninantan nin.
^ Chaypiqa “Babilonia llaqta sutikunata” nillanmantaqmi.
^ Hebreo rimaypiqa chajrapi wiñaq imaymana clase mijuymantan rimashan.
^ Hebreo rimaypiqa “wirayasqa” ninmi.
