Daniel 3:1-30
-
Rey Nabucodonosor qori idolota ruwasqanmanta (1-7)
-
Ruwachisqan idolota yupaychanankupaq reypa kamachikusqan (4-6)
-
-
Kinsantin hebreo waynakuna mana kasukuqmanta tumpasqa kasqankumanta (8-18)
-
“Manapunin diosniykikunataqa yupaychasaqkuchu” (18)
-
-
Ruphashaq hornoman wijch’uykusqa kasqankumanta (19-23)
-
Ruphashaq hornomanta salvasqa kasqankumanta (24-27)
-
Hebreo waynakunaq Diosninta rey jatunchasqanmanta (28-30)
3 Rey Nabucodonosormi ruwarqan qorimanta juj jatun idolota, altonmi karqan soqta chunka codo,* anchontaq soqta codo.* Chaytan Babilonia provinciapi Dura nisqa pampapi sayachirqan.
2 Chaymantataq rey Nabucodonosorqa wajachimurqan jatun kamachikuqkunata, prefectokunata, gobernadorkunata, kamachikuqpa yuyaychaqninkunata, tesorerokunata, juezkunata, umallikunata, provinciakunapi encargakuqkunatawan. Paykunan jamunanku karqan Nabucodonosorpa ruwachisqan ídolo inaugurayman.
3 Jinan jatun kamachikuqkunapas, prefectokunapas, gobernadorkunapas, kamachikuqpa yuyaychaqninkunapas, tesorerokunapas, juezkunapas, umallikunapas jinallataq provinciapi encargakuqkunapas Nabucodonosorpa sayachisqan ídolo inaugurayman juñukamurqanku. Chaypin paykunaqa idoloq ñaupanpi sayaykurqanku.
4 Chaymantataq willaq runaqa alto kunkawan nirqan: “Llapa llaqtakunamanta, nacionkunamanta, imaymana rimayniyoq runakuna, qankunatan niykichis:
5 Waqrata, flautata,* askha cuerdayoq tocanata, arpata, cuerdayoq tocanata, gaitata, waj tocanakunatawan tocaqta uyarispaykichismi rey Nabucodonosorpa sayachisqan qorimanta idoloman qonqorikunkichis, jinaspa chayta yupaychankichis.
6 Pipas mana qonqorikunqachu nitaq yupaychanqapaschu chayqa, kaq ratun raurashaq hornoman wijch’uykusqa kanqa”,+ nispa.
7 Jinan llapa llaqtakunamanta, nacionkunamanta, imaymana rimayniyoq runakunaqa waqrata, flautata, askha cuerdayoq tocanata, arpata, cuerdayoq tocanata, waj tocanakunatawan tocaqta uyarispa jina Nabucodonosorpa sayarichisqan qori idoloman qonqorikurqanku, jinaspa yupaycharqanku.
8 Chay ratun wakin Caldea runakunaqa reyman asuykurqanku, jinaspa judío runakuna contra rimarqanku.
9 Rey Nabucodonosortan nirqanku: “¡Wiñaypaq kausachun reyqa!
10 Reyniyku, qanpa kamachisqaykiman jinaqa llapa runakunan waqrata, flautata, askha cuerdayoq tocanata, arpata, cuerdayoq tocanata, gaitata, waj tocanakunatawan tocaqta uyarispa jina chay qori idoloman qonqorikunanku karqan, jinaspa yupaychananku karqan.
11 Pipas mana qonqorikuqqa mana yupaychaqqa raurashaq hornomanmi wijch’uykusqa kanan karqan.+
12 Ichaqa reyniyku, Babilonia provinciapi kamachikuqpaq churasqayki judío runakunan mana kasukunkuchu chay kamachisqaykita. Paykunan kanku Sadrac, Mesac, Abednego+ ima, paykunaqa manan diosniykikunata yupaychankuchu, manataqmi qorimanta ruwachisqayki idolotapas yupaychayta munankuchu”, nispa.
13 Jinan rey Nabucodonosorqa sinchita phiñakurqan, jinaspa Sadracta, Mesacta, Abednegotawan wajachimurqan. Chaymi paykunata reypa ñaupanman apamurqanku.
14 Jinan Nabucodonosorqa paykunata nirqan: “Yau Sadrac, Mesac, Abednego, ¿cheqachu diosniykunata+ mana yupaychankichis? ¿Cheqachu qorimanta ruwachisqay idolotapas mana yupaychayta munankichis?
15 Sichus kunan waqrata, flautata, askha cuerdayoq tocanata, arpata, cuerdayoq tocanata, gaitata, waj tocanakunatapas tocaqta uyarispa ruwachisqay idoloman qonqoriykukunkichis jinaspa yuypaychankichis chayqa, manan imanasaykichispaschu. Ichaqa manachus yupaychankichis chayqa, kaq ratun raurashaq hornoman wijch’uykusqa kankichis. ¿Pi diostaq qankunatari makiymanta librasunkichisman?”,+ nispa.
16 Jinan Sadracwan, Mesacwan, Abednegowanqa reyta nirqanku: “Reyniyku Nabucodonosor, manan kaymantaqa imatapas rimanayku kanchu.
17 Chhaynata ruwanayki kaqtinqa yupaychasqayku Diosqa atiyniyoqmi raurashaq hornomantapas makiykimantapas librawanankupaq.+
18 Manaña librawankumanchu chaypas, manapunin diosniykikunataqa yupaychasaqkuchu nitaqmi qorimanta sayachisqayki idolotapas yupaychasaqkuchu”,+ nispa.
19 Chaymi Nabucodonosorqa sinchita phiñakurqan Sadracpaq, Mesacpaq, Abednegopaqwan, uyanpas millaymanraqmi tukurqan. Chaymi kamachikurqan parichisqankumantapas* qanchis kuti mastaraq hornota parichinankupaq.
20 Chaymantapas wakin kallpasapa soldadonkunatan kamachirqan Sadracta, Mesacta, Abednegotawan watanankupaq, jinaspa chay hornoman wijch’uykamunankupaq.
21 Jinan paykunaqa wataruspanku kaq p’achallantinta, mantallantinta, gorrollantinta hornoman wijch’uykurqanku.
22 Reypa chhaynata kamachikusqanraykun, hornopas nishuta ruphashasqanraykun Sadracta, Mesacta, Abednegotawan apaq runakunaqa ninaq parisqallanwan wañupurqanku.
23 Sadracwan, Mesacwan, Abednegowanmi ichaqa hornoman watasqa urmaykurqanku.
24 Chaymantan rey Nabucodonosorqa mancharisqa sayarispa palacionpi umallikunata tapurqan: “¿Manachu kinsa runakunata watasqata hornoman wijch’uykurqanchis?”, nispa. Paykunataq nirqanku: “Arí reyniyku”, nispa.
25 Reytaq nirqan: “¡Qhawariychis! Tawa runakunan horno ukhupi puriykachashanku ninaq mana imanasqan, tawa kaqqa dioskunaq wawanmanmi rijch’akun”, nispa.
26 Chaymantataq Nabucodonosorqa hornoq punkunman asuykuspa paykunata wajarqan: “¡Sadrac, Mesac, Abednego! ¡Ancha jatun Diosta serviqkuna!+ ¡Lloqsimuychis! ¡Kayman jamuychis!”, nispa. Jinan Sadracwan, Mesacwan Abednegowanqa nina ukhumanta lloqsimurqanku.
27 Ninaqa manan paykunataqa imanasqapaschu,+ manan chujchankutapas imanasqachu, manan q’asparillasqapaschu,* manan p’achankutapas ni mantankunatapas imanasqapaschu nitaqmi q’osñi-q’osñimanpas asnasqakuchu. Chaytaqa rikurqankun chaypi juñunasqa kashaq jatun kamachikuqkuna, prefectokuna, gobernadorkuna, reypa palacionpi umallikuna ima.+
28 Jinan Nabucodonosorqa nirqan: “Alabasqa kachun Sadracpa, Mesacpa, Abednegoq Diosninqa,+ paymi angelninta kachamusqa serviqninkunata librananpaq. Paykunaqa Diosninkupin confiarqanku, manataqmi reypa kamachisqantapas kasukurqankuchu, manan wañuytapas manchakurqankuchu Diosnillankuta adoranankurayku, servinankurayku.+
29 Chaymi kayta kamachikuni: Pi runapas may llaqtamantaña, may nacionmantaña, ima rimayniyoqña kanman chaypas, Sadracpa, Mesacpa, Abednegoq Diosninku contra imatapas rimanqa chayqa, cuerponmi askhaman kuchusqa kanqa, wasinpas jisp’ana wasin* kapunqa. Manan Diosninku jina libraq diosqa kanchu”,+ nispa.
30 Chaykuna qhepamantaq reyqa Sadracta, Mesacta, Abednegotawan Babilonia provinciapi aswan allin puestoman churarqan.*+
Uraypi willakuykuna
^ Chayqa karqan yaqa 27 metron. Qhaway “Astawan yachanapaq B14” nisqata.
^ Chayqa karqan 2,7 metro jinan. Qhaway “Astawan yachanapaq B14” nisqata.
^ Flautaqa qenaman rijch’akuqmi.
^ Parichiytaqa “q’oñichiy, q’olachiy” nillankutaqmi.
^ Q’aspaytaqa “q’estiy, chheqchiy, qhoslay” nillankutaqmi.
^ Chaypiqa yaqapaschá “q’opa wijch’unan” nillanmantaq.
^ Hebreo rimaypiqa “qhapaqyachirqan” ninmi.
