Daniel 8:1-27
8 Rey Belsasar+ kinsa wataña kamachikushaqtinmi noqa Danielqa jujmanta juj rijuriyta rikullarqanitaq.+
2 Chay ratupaqqa muyuriq perqayoq Susapin+ kasharqani, chayqa kashan Elam provinciapin.+ Chay rijuriy rikusqaypin noqaqa Ulái mayu* patapi kashasqani.
3 Ñaupayta qhawarinaypaqmi chay mayu patapi iskay waqrayoq+ anejo sayashasqa,+ iskaynin waqrankunan jatunkaray kasqa, jujninmi jujninmanta aswan jatun kasqa. Chay jatun waqraqa qhepatañan wiñarqan.+
4 Chay anejoqa inti jaykuy ladoman, wichay ladoman, uray ladoman iman takapakushasqa. Manan mayqen salqa animalpas chay anejotaqa atipayta atirqanchu, manataqmi pipas paypa makinmantaqa pitapas kacharichiyta atirqanchu.+ Ima munasqantan ruwarqan, sinchitan jatunchakurqan.
5 Chayllamanmi rikullarqanitaq juj orqo cabrata,+ chay cabraqa inti jaykuy ladomantan lliu pachantinta phawaylla phawamushasqa, pampatapas mana sarusparaqmi phawamushasqa. Chaymantapas chay cabraqa mat’inpi jatun waqrayoqmi kasqa.+
6 Chay cabraqa mayu patapi rikusqay iskay waqrayoq anejomanmi phawaykurqan, sinchi phiñasqan phawaykurqan.
7 Sinchi phiñasqapuni phawaykuspan takaspa chay anejoq iskaynin waqrankunata p’akirqan, jinaspa pampaman wijch’uspa sarurqan. Anejoqa manan imanaytapas atirqanchu, manan pipas chay cabraq atiyninmantaqa kacharichiyta atirqanchu.
8 Chay orqo cabraqa jatunchakuytan qallarirqan, ichaqa atiyniyoq kapuqtin jinan chay waqranqa p’akikapurqan, chay waqraq rantinpitaq tawa waqrakuna wiñamurqan, janaq pacha tawantin wayrakuna ladomanmi wiñarqan.+
9 Jujnin waqramantan juj juch’uy waqra wiñamurqan. Chay waqraqa uray ladoman, inti lloqsimuy ladoman, Munay Jallp’a nisqa ladomanwanmi sinchitapuni wiñarqan.+
10 Nishutapuni wiñaspan janaq pacha ejercitokamaraq chayarqan, jinaspan chay ejercitomanta wakinta wakin ch’askakunatawan urmaykachimuspa sarurqan.
11 Chaymantapas ejercitota kamachiq umalli contran sayarirqan, chay umalliman sapa kuti jaywana sacrificiopas jark’asqan karqan, allin sayarichisqa ch’uya wasinpas thunisqan karqan.+
12 Jucharaykun ejercitopas sapa kuti jaywana sacrificiopas chay waqraman entregasqa karqan. Payqa cheqaq kaqtapas pampamanmi wijch’urqan. Tukuy ima ruwasqanpas paypaqqa allinkaman lloqsirqan.
13 Chayllamanmi uyarirqani juj angelpa* rimamusqanta, chay angeltan juj ángel nimurqan: “¿Jayk’a unaymi kanqa sapa kuti sacrificio jaywanamanta, jucha jawa thuniy kasqanmanta,+ ejercitopas ch’uya wasipas sarunchasqa kasqanmanta rijuriy rikukusqan?”, nispa.
14 Jinan payqa nimuwarqan: “Iskay waranqa kinsa pachaj p’unchaykuna* pasanankaman chhayna kanqa, chaymantañan chay ch’uya wasiqa ch’uya kapunqa”, nispa.
15 Chay rijuriyta qhawashaqtiymi, entiendeytapuni munashaqtiymi qonqaylla runa rijch’ayniyoq ñaupaypi rijurirqan.
16 Chayllamanmi Ulái mayumanta+ juj kunka fuerteta nimurqan: “Gabriel,+ chay rikusqan imachus chayta sut’inchay”,+ nispa.
17 Jinan payqa maypichus kashasqayman jamurqan. Chaymi noqaqa manchakuymanta pampaman k’umurparirqani. Paytaq niwarqan: “Runaq churin, chay rikusqaykiqa tukukuy tiempopaqmi”,+ nispa.
18 Chayta rimashaqtinmi noqaqa pampaman wijch’ukuspa uyanpamanta misk’ita puñurapusqani, chaymi payqa llamiykuwaspa jujmanta sayarichiwarqan.+
19 Chaymantataq niwarqan: “Willasayki Diospa phiñakuynin p’unchaypa tukukuyninpi imachus pasanqa chayta, chayqa señalasqa tiemponpin, tukukuy tiempopin chayamunqa.+
20 ”Chay rikusqayki iskay waqrayoq anejoqa Media nación Persia nación reykunan kanku.+
21 Pelosapa orqo cabra rikusqaykitaq Grecia nación rey.+ Mat’inpi kaq waqraqa ñaupaq kaq reymi.+
22 Rantinpitaq tawa waqrakuna wiñamurqan.+ Chay reypa nacionninmantan tawa gobiernokuna paqarimunqa, ichaqa manan ñaupaq rey jina atiyniyoqchu kanqaku.
23 ”Chay reykuna kamachikuyta tukushaqtinkun, mana allinkunatapas ruwayta tukushaqtinkun juj millay rijch’ayniyoq, mana entiendena kaqkunatapas entiendeq* rey paqarimunqa.
24 Chay reyqa ancha atiyniyoqmi kanqa, ichaqa manan paypa kallpanwanchu. Musphanapaq jinan imaymana mana allinkunata ruwanqa,* tukuy chay ruwasqankunaqa allinkaman lloqsinqa. Atiyniyoqkunatapas ch’uya runakunayoq llaqtatapas mana allinkunatan ruwanqa.+
25 Yuyaysapaman tukuspan engañaspa imatapas ruwanqa ima ruway munasqanpas allin lloqsinanpaq. Sonqonpi jatunchakuspan askha runakunata thajpi kashaqtinku* mana allinkunata ruwanqa. Kamachikuqkunaq kamachiqnin contra imaraqmi sayarinqa, chaymi chay reyqa chinkachisqa kanqa, ichaqa manan runaq atiyninwanchu.
26 ”Rijuriypi p’unchaykunamanta* uyarisqaykiqa cheqaqmi, chay rikusqaykitaqa sonqollaykipin jap’ikunki, chayqa unay tiempokunamantaraqmi junt’akunqa”,+ nispa.
27 Noqaqa sinchi sayk’usqan kasharqani, askha p’unchaykunan onqorqanipas,+ chaymantataq sayarispa reypaq imachus ruwanay chayta ruwayta qallarirqani,+ ichaqa chay rikusqaywanmi muspharqaniraq, chay rikusqayqa mana entiendey atiymi karqan.+
Uraypi willakuykuna
^ Chaypiqa “yarqha” nillanmantaqmi. Yarqhataqa “larqha, sanja” nillankutaqmi.
^ Hebreo rimaypiqa “ch’uya kaqpa” ninmi.
^ Hebreo rimaypiqa “tardenkuna, tutamantankuna” ninmi.
^ Chaypiqa “engañananpaq yachaysapa” nillanmantaqmi.
^ Chaypiqa “imaymanakunata chinkachinqa” nillanmantaqmi.
^ Chaypiqa “qonqaylla” nillanmantaqmi.
^ Hebreo rimaypiqa “tardenkunamanta, tutamantankunamanta” ninmi.
