Deuteronomio 26:1-19
26 ”Jehová Diosniykichispa herencia qonan jallp’aman jaykuspaqa, chayta jap’ikapuspa chaypi tiyaspaykichisqa,
2 Jehová Diosniykichispa qosqasuykichis jallp’api llapa llank’asqaykichismantan ñaupaq rurukunata oqarinkichis, chaytataq wakinta juj canastaman churankichis, chayta aparikuspan rinkichis maytachá Jehová Diosniykichis ajllakunqa sutin jatunchasqa kananpaq chayman.+
3 Jinaspa mayqen sacerdotechá chay p’unchaykuna llank’ashan chayman rinkichis. Paytan ninkichis: Kunanmi Jehová Diosninchispa ñaupanpi rimarini: Ñan jaykuniña ñaupa taytanchiskunaman Jehová Diospa prometesqan jallp’amanqa,+ nispa.
4 ”Jinan sacerdoteqa apasqayki canastata chaskisunki, chaytataq Jehová Diosniykiq altarninpa ñaupanman churanqa.
5 Chaymantataq Jehová Diosniykiq ñaupanpi ninki: Taytaykuqa Aram runan karqan,+ purikuq runan karqan.* Payqa pisi runakunallawanmi+ forastero jina Egipto llaqtaman jaykurqan,+ chaypin jatun nacionman, kallpasapa nacionman, askhaman tukupurqan.+
6 Egipto runakunan ichaqa sinchita sufrichiwarqanku ñak’arichiwarqanku ima, mana khuyapayaspan sinchita llank’achiwarqanku.+
7 Jinan noqaykuqa ñaupa taytaykuq Diosnin Jehová Diosta wajakurqayku, paypa yanapaynintan mañakurqayku. Jehová Diosqa uyariwarqankun mañakusqaykuta, rikurqanmi ñak’arisqaykuta, llakipi tarikusqaykuta, jujkuna sarunchawasqankutapas.+
8 Jinan Jehová Diosqa Egiptomanta orqomuwarqanku jatun atiyninwan, kallpanwan,+ manchakuy ruwaykunawan, señalkunawan, milagrokunawan ima.+
9 Chaymantataq kayman pusamuwarqanku jinaspa kay jallp’ata qowarqanku, lechepas mielpas askha kasqan jallp’ata.+
10 Chaymi kunanqa Jehová Diosniypa qowasqan jallp’api ñaupaq rurukunata apamushani,+ nispa.
”Chaykunatan churanki Jehová Diosniykiq ñaupanman, jinaspa Jehová Diosniykiq ñaupanpi qonqoriykukunki.
11 Chaymantataq kusikunki Jehová Diosniyki qanmanpas wasiykipi kaqkunamanpas tukuy allinkuna qosqasuykichismanta. Leví runakunawan, qankuna ukhupi tiyaq waj llaqtayoq runakunawan iman kusikunkichis.+
12 ”Kinsa kaq watapi, diezmo qona watapi, llapa llank’asqaykichismanta chunka kaq parteta t’aqayta tukuspan,+ t’aqasqaykichista Leví runakunaman, waj llaqtayoq runakunaman, mana taytayoqkunaman, viuda warmikunaman ima qonkichis, paykunan chayta llaqtaykichis ukhupi mijunqaku sajsanankukama.+
13 Chaymantataq Jehová Diosniykichista ninkichis: Qanpaq t’aqasqayta wasiymanta orqomuspan qoniña Leví runakunaman, waj llaqtayoqkunaman, mana taytayoqkunaman, viuda warmikunaman ima.+ Kamachiwasqaykiman jinan chaykunataqa ruwani. Manan chaykunataqa p’akinichu, manataqmi jujpas mana junt’asqaqa kanchu.
14 Diezmo t’aqasqaymantaqa manan wañuqmanta llakisqa kashaspaqa mijurqanichu, manan qhelli kashaspapas chaytaqa tupaykurqanichu, manataqmi chaytaqa wañusqakunamanpas jaywarqanichu. Diosníy Jehová, simiykiman jinan noqaqa llapa imatapas ruwarqani, llapantan kamachiwasqaykitaqa kasukurqani.
15 Kunanqa janaq pachapi ch’uya wasiykimantayá qhawarimuwayku, jinaspa ñaupa taytaykuman jurasqaykiman jina+ kay Israel llaqtaykiman, kay qowasqaykiku jallp’aman, lechepas mielpas askha kasqan+ jallp’aman bendicionniykita churaykamuy,+ nispa.
16 ”Kunanmi Jehová Diosniykichis kamachishasunkichis kay kamachikuykunata leykunatapas kasukunaykichispaq. Chaykunatan tukuy sonqowan+ tukuy almawan* kasukunkichis junt’ankichispas.
17 Kunanmi Jehová Diosqa promesata ruwashan qankunaq Diosniykichis kananpaq, chaypaqmi ichaqa ñanninkunallapi purinaykichis, kasukushanallaykichismi kamachikuyninkunatapas,+ leyninkunatapas,+ chaninchayninkunatapas,+ llapa ima nisqantapas uyarikunkichismi.
18 Chaymantapas Jehová Diosqa uyarinñan llaqtan kanaykichispaq, munakusqan llaqta kanaykichispaq promesa ruwasqaykichista.+ Promesa ruwasqanman jinan paypa llaqtan kankichis, kasukunkichismi llapa kamachikuyninkunatapas.
19 Sichus qankuna tukuy tiempo rikuchinkichis Jehová Diospa ch’uya llaqtan kasqaykichista chayqa,+ promesa ruwasqanman jinan payqa llapa jatarichisqan nacionkunamanta aswan altoman churasunkichis.+ Qankunamanmi qosunkichis jatunchayta, alabayta ima; allin reqsisqa llaqtan kankichis”, nispa.
Uraypi willakuykuna
^ Chaypiqa yaqapaschá “wañuy patapiñan kasharqan” nillanmantaq.
