Deuteronomio 7:1-26
7 ”Jehová Diosniykichis jap’ikapunaykichis jallp’aman pusaykuspaqa,+ jaykusqaykichisman jinan payqa ñaupaykichispi nacionkunata chinkachinqa.+ Qankunamanta aswan askha aswan kallpasapa nacionkunatan chinkachinqa, qanchis nacionkunatan chinkachinqa:+ Het runakunata, guirgaseo runakunata, amorreo runakunata,+ Canaán runakunata, perizita runakunata, heveo runakunata, Jebús runakunatawan.+
2 Jehová Diosniykichisqa makiykichismanmi paykunata entregasunkichis, jinan qankunaqa paykunata atipankichis.+ Llapankutan paykunataqa chinkachinkichis.+ Aman paykunawanqa ima acuerdotapas ruwankichischu, aman khuyapayankichischu.+
3 Aman ususiykichiskunata paykunaq churinkunawan casarachinkichischu, aman churiykichiskunatapas paykunaq ususinkunawan casarachinkichischu,+ chhaynapin paykunawanqa mana familiachu kankichis.
4 Sichus paykunawan casarachinkichis chayqa, wawaykichiskunatan aysanqaku waj dioskunaman, jinaspa Diosniykichista saqepunqaku.+ Chay pasanqa chayqa qankunawanmi Jehová Diosqa phiñakunqa, jinaspa manaraq imapi chinkachisunkichis.+
5 ”Chayta ruwanaykichismantaqa aswanmi paykunaq altarninkunata thuninkichis, yupaychana sayashaq ruminkunata iman ñut’unkichis;+ wit’unkichismi yupaychana sayashaq k’ullunkunatapas,*+ kanankichismi yupaychasqanku thupasqa idolokunatapas.+
6 Qankunaqa Jehová Diosniykichispa ch’uya llaqtanmi kankichis. Kay pachapi llapa llaqtakuna ukhumantan Jehová Diosniykichisqa qankunata ajllarqasunkichis llaqtan kanaykichispaq, munakusqan llaqta kanaykichispaq.+
7 ”Jehová Diosqa manan aswan askha kasqaykichisraykuchu munakurqasunkichis ajllarqasunkichispas,+ aswanpas qankunaqa llapan llaqtakunamantapas aswan juch’uyllan karqankichis.+
8 Jehová Diosqa ajllakurqasunkichis qankunata munakusqasuykichisraykun, ñaupa taytaykichiskunaman imachus jurasqanta junt’ananraykun.+ Chayraykun Jehová Diosqa Egiptopi esclavo kasqaykichismantapas atiyninwan orqomurqasunkichis.+ Chaypin qankunaqa Egipto rey faraonpa makinpi kasharqankichis.
9 Yachasqaykichis jina, Diosniykichis Jehová Diosqa cheqaq Diosmi, junt’aq Diosmi. Payqa waranqa-waranqa miraykunawanmi rimanakusqanta junt’an, munakuqninkunawanmi, kamachisqanta kasukuqkunawanmi rimanakusqanta junt’an. Mana tukukuq munakuynintapas* rikuchishallanmi.+
10 Pipas cheqnikuqnintan ichaqa chinkachinqa.+ Mana imata suyaspan payqa usqhaylla castiganqa, usqhayllan chinkachinqa.
11 Chayrayku qankunaqa tukuy atisqaykichista ruwaychis kay qosqay kamachikuykunata leykunatapas kasukunaykichispaq, llapantan chaykunataqa kasukunkichis.
12 ”Kay kamachikuy simikunata uyarinkichis, kasukunkichis, junt’ankichis chayqa, ñaupa taytaykichiskunaman jurasqanman jinan Jehová Diosniykichisqa rimanakusqanta junt’anqa, mana tukukuq munakuynintapas rikuchisunkichis.
13 Payqa munakusunkin, bendicionnintapas churamusunkin, jinan askhaman tukunkichis. Askhatan wawakunata qosunkichis;+ jallp’aykichispas sumaqtan rurunqa, askhan kanqa trigoykichispas, vinoykichispas, aceiteykichispas.+ Askhan kanqa wakaykichispa uñankunapas, ovejaykichispa uñankunapas. Chhaynan kanqa ñaupa taytaykichiskunaman jurasqan jallp’apiqa.+
14 Qankunaqa llapa llaqtakunamantapas aswan bendecisqan kankichis.+ Qankuna ukhupiqa manan mayqen qharipas ni warmipas mana wawayoqqa kanqachu. Uywaykichiskunapas llapanmi uñayoqkama kanqa.+
15 Jehová Diosqa llapa onqoyniykichiskunatan chinkachinqa, manan Egiptopi rikusqaykichis onqoykunatapas chayachimusunkichischu.+ Aswanmi llapa chaykunataqa cheqnikuqniykichis runakunaman chayachinqa.
16 Jehová Diosniykichispa jap’ichisqasuykichis llapa llaqtakunatan ch’usaqyachinkichis.+ Aman paykunataqa khuyapayankichischu,+ aman diosninkunatapas servinkichischu,+ mana chayqa trampa jinan chaykunaqa qankunapaq kanqa.+
17 ”Jayk’aqllapas sonqoykichispi ninkichis: Kay nacionkunaqa noqanchismanta aswan askhamá kasqaku, ¿imaynatataq kay runakunatari qarqoyta atisunman?,+ nispa chayqa,
18 imatachus Jehová Diosniykichis Egipto llaqtatapas faraontapas ruwarqan chaytan yuyarinkichis.+ Aman paykunataqa manchakunkichischu.+
19 Yuyarinkichismi imaynatachus Jehová Diosniykichisqa imaymana castigowan, señalkunawan, milagrokunawan,+ kallpanwan, atiyninwan ima Egiptomanta orqomurqasunkichis chayta.+ Chay llaqtata jinan Jehová Diosniykichisqa ruwanqa chay manchakusqaykichis llaqtakunatapas.+
20 Jehová Diosniykichismi paykunataqa sinchita mancharichinqa; llapa qhepaqkunan wañunqa,+ qankunamanta pakakuqkunapas wañunqan.
21 Aman manchakunkichischu paykunataqa, Diosniykichis Jehová Diosqa qankunawanmi kashan.+ Payqa manchakuna jatun Diosmi.+
22 ”Jehová Diosqa pisi-pisimantan chay nacionkunata qayllaykichismanta qarqonqa.+ Aman jujllapichu paykunataqa chinkachinkichis, mana chayqa campopi salqa animalkunan qankuna contra askhayanman.
23 Diosniykichis Jehová Diosqa llapantan chay llaqtakunata makiykichisman entregasunkichis, paypa yanapayninwanmi llapanta atipankichis, manan jujpas qhepanqachu.+
24 Chay llaqtakunapi reykunatapas entregasunkichismi,+ chhaynapin qankunaqa paykunaq sutinta kay pachamanta chinkachinkichis.+ Llapanta chinkachinaykichiskaman+ mana pipas qankuna contraqa sayariyta atinqachu.+
25 Llapa thupasqa idolonkunatan kanapunkichis,+ aman chay idolokuna forrasqanku qoritapas qolqetapas munapayankichischu,+ aman chaykunawanqa qhepakunkichischu, chaykunaqa trampa jinan qankunapaq kanman. Chaymantapas Jehová Diosniykichisqa cheqnikunmi chaykunataqa.+
26 Aman ima millakunapaq kaqtapas wasiykichismanqa apankichischu, mana chayqa chaykunawan kuskan chinkachisqa kankichis. Chaykunataqa cheqnikunkichismi millakunkichismi, chinkachisqan chaykunaqa kanqa.
Uraypi willakuykuna
^ Qhaway Explicasqa simikuna nisqapi “Sayashaq k’ullu” nisqata.
^ Qhaway Explicasqa simikuna nisqapi “Mana tukukuq munakuy” nisqata.
