Esdras 8:1-36
8 Kaymi kashan rey Artajerjes kamachikusqan tiempopi Babiloniamanta noqawan kuska kutimpuq umallikuna.+ Paykunaq sutinmi kaypi qelqasqa kashan piqpa mirayninmantachus kasqankuman jina.
2 Finehaspa+ mirayninmantan karqan Guersom; Itamarpa+ mirayninmantataq karqan Daniel; Davidpa mirayninmantataq karqan Atús;
3 Secaniaspa miraynin Parospa churinkunamantataq karqan Zacarías, payqa pachaj pisqa chunka qharikunawan kuskan listapi churasqa karqan;
4 Pajaj-Moabpa+ mirayninmantataq karqan Zeraiaspa churin Elio-Enái, iskay pachaj qharikunapiwan;
5 Zatupa+ mirayninmantataq karqan Jazielpa churin Secanías, kinsa pachaj qharikunapiwan;
6 Adinpa+ mirayninmantataq karqan Jonatanpa churin Ébed, pisqa chunka qharikunapiwan;
7 Elampa+ mirayninmantataq karqan Ataliaq churin Jesayá, qanchis chunka qharikunapiwan;
8 Sefatiaspa+ mirayninmantataq karqan Miguelpa churin Zebadías, pusaq chunka qharikunapiwan;
9 Joabpa mirayninmantataq karqan Jeyelpa churin Abdías, iskay pachaj chunka pusaqniyoq qharikunapiwan;
10 Banipa mirayninmantataq karqan Josifiaspa churin Selomij, pachaj soqta chunka qharikunapiwan;
11 Bebaipa+ mirayninmantataq karqan Zacarías, iskay chunka pusaqniyoq qharikunapiwan;
12 Azgajpa+ mirayninmantataq karqan Jacatanpa churin Joanán, pachaj chunkayoq qharikunapiwan;
13 Adonicanpa+ mirayninmantataq karqanku: Elifélej, Jeiel, Semaya, soqta chunka qharikunapiwan, paykunan chay familiamanta último kutimpuqkunaqa karqanku;
14 Bigvaipa+ mirayninmantataq karqanku Utaiwan, Zabujwan, qanchis chunka qharikunapiwan.
15 Llapa chay runakunatan juñurqani Ajavaman rishaq mayu patapi,+ chaypin karpakuspa kinsa p’unchay qhepakurqayku. Llapa runakuna ukhupi, sacerdotekuna ukhupi iman Leví runakunata maskharqani, ichaqa manan jujtapas tarirqanichu.
16 Chaymi umalli qharikunata wajachimurqani: Eliezerta, Arielta, Semayata, Elnatanta, Jarifta, Elnatanta, Natanta, Zacariasta, Mesulantawan. Chaymantapas yachachiq Joiarifta Elnatantawanmi wajachimurqani.
17 Paykunatan kacharqani Casifía llaqtapi Idó umalliwan rimamunankupaq. Idota, Diospa wasinpi llank’aqkunaq* mirayninkunatawanmi nichimurqani: “Diosniykuq wasinpi servinankupaq runakunata kachamuwayku”, nispa.
18 Diosqa noqaykuwanmi kasharqan, chaymi paykunaqa Serebiasta+ pusamusqaku, payqa Malipa+ mirayninmanta allin yuyayniyoq runan karqan, Maliqa Levipa nietonmi karqan, Levitaq Israelpa churin karqan. Serebiasqa wawakunantin wayqekunantinmi jampusqa, llapankupiqa chunka pusaqniyoq qharikunan jamusqaku.
19 Chaymantapas Meraripa+ mirayninmanta Asabiasta, Jesayatawanmi wawakunantinta wayqekunantinta pusamusqaku, llapankupiqa iskay chunka qharikunan jamusqaku.
20 Chaymantapas chaypin kasharqanku Diospa wasinpi llank’aqkunapas,* paykunaqa iskay pachaj iskay chunka runakunan sutinkumantakama listapi churasqa karqanku. Paykunaq ñaupa taytankutan Davidwan autoridadkunapiwan churasqaku Leví runakunata yanapanankupaq.
21 Chaymantataq Ajavá mayu qayllapi llapa runakunata nirqani ayunanaykupaq, chaypin juch’uyaykukuspa Diosmanta mañakurqayku wawaykupas tukuy imaykupas allillan kananpaq, purisqaykupipas sumaqta pusariwanankupaq.
22 Reytan nimurqayku: “Diosniykuqa llapa payman asuykuqkunatan yanapan,+ payta saqeqkunapaqtaq sinchita phiñakun”,+ nispa. Chaymi p’enqakurqani enemigoykumanta cuidawanankupaq reymanta soldadokunata, caballopi sillakuq soldadokunata ima mañakuyta.
23 Chayraykun noqaykuqa ayunarqayku, Diosmantapas mañakurqayku ñanpi cuidawanankupaq; payqa uyariwarqankun mañakusqaykuta.+
24 Chaymantataq sacerdotekuna ukhumanta ajllarqani chunka iskayniyoq umalli sacerdotekunata. Paykunan karqanku Serebiaswan, Asabiaswan,+ chunka wayqenkunapiwan.
25 Paykunamanmi pesaspa qorqani qorita, qolqeta, serviciokunatawan. Chaykunatan Diosniykuq wasinpaq qorqanku+ reywan, yuyaychaqninkunawan, autoridadkunawan, Babiloniapi tarimusqayku llapa Israel runakunapiwan.
26 Pesopin qorqani soqta pachaj pisqa chunka talento* qolqeta, iskay talento valeq qolqemanta pachaj serviciokunata, pachaj talento qorita,
27 waranqa dárico* valeq qorimanta iskay chunka juch’uy p’ukukunata, puka k’ancharishaq iskay serviciokunata, chaykunaqa allin cobremanta ruwasqan karqan, qori jinataqmi valerqanpas.
28 Chaymantataq paykunata nirqani: “Qankunaqa Jehová Diospaq t’aqasqa runakunan kankichis,+ kay serviciokunapas paypaq t’aqasqan. Kay qoripas qolqepas ñaupa taytaykichiskunaq Diosnin Jehová Diospaq sonqomanta qosqanku ofrendan.
29 Kay qosqaykunatan allinta waqaychankichis Jerusalenman chayachispa Jehová Diospa wasin cuartopi pesanaykichiskama. Chaykunataqa pesakunqa umalli sacerdotekunaq, Leví runakunaq, familiapi umallikunaq ñaupanpin”,+ nispa.
30 Sacerdotekunawan Leví runakunawanqa pesasqatan chaskirqanku qoritapas, qolqetapas, llapa serviciokunatapas, chaykunatan apananku karqan Jerusalenpi Diospa wasinman.
31 Chaykuna qhepamanñan, ñaupaq kaq killapi chunka iskayniyoq p’unchaypi,+ Ajavá mayu patamanta+ Jerusalenman puririrqayku. Diosniykuqa noqaykuwanmi kasharqan, paymi purisqayku ñanpi pakaykuwarqanku enemigokunamantapas suwakunamantapas.
32 Jerusalenman chayaspataq+ kinsa p’unchay chaypi qhepakurqayku.
33 Tawa kaq p’unchaytaq qorita, qolqeta, serviciokunata Diospa wasinpi pesarqayku,+ jinaspa Uriyaq churin sacerdote Meremojman+ entregarqayku; paywanmi kasharqanku Finehaspa churin Eleazar, Leví ayllumanta Jesuaq churin Jozabaj,+ Binuipa+ churin Noadiaspas.
34 Llapa apakamusqantan yupakurqan pesakurqan ima, jinaspa llapanpi jayk’achus kasqanta anotakurqan.
35 Chaymantataq Babiloniamanta kutimpuqkunaqa Israelpa Diosninman ruphachina ofrendakunata jaywarqanku: isqon chunka soqtayoq carnerokunata,+ qanchis chunka qanchisniyoq ovejakunata, jucha pampachay ofrendapaq chunka iskayniyoq orqo cabrakunata,+ llapa Israel ayllukunapaqtaq chunka iskayniyoq torokunata.+ Llapa chaykunatan ruphachina ofrendata jina Jehová Diosman jaywarqanku.+
36 Chaymantataq reypa qelqamusqan cartata entregarqayku+ reypa churasqan jatun kamachikuqkunaman* Éufrates mayuq+ inti jaykuy ladonpi kamachikuqkunamanwan. Jinan paykunaqa Israel runakunata yanaparqanku, Diospa wasin ruwakunanpaqpas imaymanatan qorqanku.+
Uraypi willakuykuna
^ Chaypiqa “netineo runakunaq” nillanmantaqmi. Hebreo rimaypiqa “entregasqa runakunaq” ninmi.
^ Chaypiqa “netineo runakunapas” nillanmantaqmi. Hebreo rimaypiqa “entregasqa runakunapas” ninmi.
^ Juj talentoqa 34,2 kilotan pesaq. Qhaway “Astawan yachanapaq B14” nisqata.
^ Dárico qolqeqa qorimanta ruwasqa Persia qolqen karqan. Qhaway “Astawan yachanapaq B14” nisqata.
^ Chaypiqa llapa Persia provinciakunapi kamachikuq umalli runakunamantan rimashan.
