Ezequiel 11:1-25
11 Juj espiritun* oqariwaspa Jehová Diospa wasin punkuman apawarqan, inti lloqsimuy ladopi punkuman.+ Chaypin punku jaykunapi kashasqa iskay chunka pisqayoq runakuna, chaypin kashasqa Azurpa churin Jazaniaspas, Benayaq churin Pelatiaspas; paykunaqa llaqtapi umallikunan karqanku.+
2 Chaypin Diosqa* niwarqan: “Runaq churin, kay runakunan mana allinkunata yuyaykushanku, mana allin yuyaykunatan kay llaqta runakunamanpas qarashanku.
3 Paykunan nishanku: ¿Manachu wasi ruway tiempo kashan?+ Kay llaqtaqa* manka jinan,+ noqanchistaq aycha jina kanchis, nispa.
4 ”Chhaynaqa, runaq churin, paykuna contra rimay”,+ nispa.
5 Chayllamanmi Jehová Diospa espiritun noqaman jamurqan,+ jinan Diosqa* niwarqan: “Khaynatan ninki: Jehová Diosmi nin: Yau Israel runakuna, imachus nisqaykichisqa cheqaqmi, allintan yachani imachus piensasqaykichista.
6 Causaykichispin kay llaqtapi askha runakuna wañun, callekunatapas wañusqakunawanmi junt’achirqankichis,+ nispa.
7 Chayraykun tukuy munayniyoq Señor Jehová Diosqa nin: Callekunapi wijch’usqaykichis ayakunan kay llaqtapi aycha kanku; kay llaqtataq manka.+ Ichaqa orqosqan kankichis chaymanta, nispa.
8 ”Tukuy munayniyoq Señor Jehová Diosmi nin: Espadatan qankunaqa manchakunkichis,+ espadatan kachamusaykichis.
9 Chay llaqtamanta orqospan waj llaqta runakunaman entregasaykichis. Castigotan qankunaman chayachimusaykichis.+
10 Espadawanmi wañuchisqa kankichis.+ Israelpa linderonpin* juchachasaykichis,+ chhaynapin qankunaqa yachankichis noqa Jehová Dios kasqayta.+
11 Kay llaqtaqa manan mankaykichischu kanqa, qankunapas manan manka ukhupi aychachu kankichis. Israelpa linderonpin juchachasaykichis,
12 chhaynapin qankunaqa yachankichis noqa Jehová Dios kasqayta. Qankunaqa manan kamachisqayman jinachu kausarqankichis, manataqmi chaninchayniykunatapas kasukurqankichischu,+ aswanmi qankunaqa muyuriqniykichispi nacionkunaq chaninchayninkunaman jina kausarqankichis,+ nispa”.
13 Rimayta tukuqtiy jinan Benayaq churin Pelatiasqa wañupurqan, jinan noqaqa uyanpamanta pampaman kumpakuspa qaparirqani: “¡Ay tukuy munayniyoq Señor Jehová Dios! ¿Israelmanta llapa puchuqkunatachu wañuchinki?”,+ nispa.
14 Jujmantan Jehová Diosqa rimapayamuwarqan, paymi niwarqan:
15 “Runaq churin, Jerusalenpi tiyaqkunan rantinanpaq derechoyoq wayqeykikunata Israel runakunatapas ninku: Jehová Diosmanta karunchakuychis. Kay jallp’aqa noqaykuqmi, noqaykumanmi qosqa karqan, nispa.
16 Qanmi ichaqa ninki: Tukuy munayniyoq Señor Jehová Diosmi nin: Karumanña aparqani chaypas, karu nacionkunamanña karu llaqtakunamanña ch’eqechirqani chaypas,+ chay llaqtakunapin noqaqa juj tiempo paykunapaq templo jina kasaq,+ nispa.
17 ”Nillankitaqmi: Tukuy munayniyoq Señor Jehová Diosmi nin: Paykunatan karu llaqtakunamanta kutichimpusaq, maypichus kashanku chay nacionkunamantan juñumpusaq, jinaspa Israel jallp’ata qopusaq.+
18 Kutimuspan paykunaqa llapa millakunapaq kaqkunata chinkachinqaku, chinkachinqakun llapa millay ruwaykunatapas.+
19 Paykunatan ch’ulla sonqollaman tukuchisaq,+ mosoq yuyaytan qosaq.+ Chaymantapas rumi sonqonkutan orqosaq,+ jinaspan kasukuq sonqota paykunaman churasaq,+
20 chhaynapi kamachisqaykunata kasukunankupaq, chaninchayniykunatapas junt’anankupaq. Chhaynapin paykunaqa llaqtay kanqaku, noqataq Diosninku kasaq, nispa.
21 ”Ichaqa, pipas millakunapaq kaqkunaman jap’ipakunqa, manataq millay ruwayninkunatapas saqenqachu chayqa, llapa ima ruwasqanmi payman chayamunqa, ninmi tukuy munayniyoq Señor Jehová Diosqa, nispa”.
22 Chaymantataq querubín angelkunaqa rafrachakurqanku, ruedakunapas paykunaq ladonpin kasharqanku,+ altonkupitaq Israelpa Diosninpa k’anchaynin kasharqan.+
23 Chaymantan Jehová Diospa k’anchayninqa llaqtamanta oqarikurqan,+ jinaspa llaqtaq inti lloqsimuy ladonpi kaq orqopi sayaykurqan.+
24 Noqatataq Diospa espiritunwan rijuriy rikusqaypi juj espíritu* oqariwarqan, jinaspa maypichus preso apasqa runakuna kasharqanku chayman apawarqan, Caldea runakunaq jallp’anmanmi apasqa karqani. Chaymantataq chay rijuriyqa chinkaripurqan.
25 Chaykuna qhepamantaq Jehová Diospa llapa rikuchiwasqankunata preso apasqa kaqkunaman willarqani.
Uraypi willakuykuna
^ Hebreo rimaypiqa Diospa espiritunmantan otaq juj angelmantan rimashanman.
^ Hebreo rimaypiqa “payqa” ninmi.
^ Chaypiqa Jerusalén llaqtamantan rimashan. Judío runakunaqa chaypi allin waqaychasqa kanankupaqmi piensasharqanku.
^ Hebreo rimaypiqa “payqa” ninmi.
^ Linderotaqa “colinda, qorpa” nillankutaqmi.
^ Hebreo rimaypiqa Diospa espiritunmantan otaq juj angelmantan rimashanman.
