Hechos 21:1-40
21 Paykunamanta sonqo nanayta t’aqakapuspaykun barcopi ripurqayku, jinan qhepantin p’unchay Cos llaqtaman chayarqayku, qhepantin p’unchaytaq Rodas islaman, chaymantataq Pátara puertoman.
2 Chaypin tarirqayku juj barcota Fenicia llaqtaman riqta, jinan chayman seqaspa ripurqayku.
3 Rishaspaykun lloq’e ladopi rikurqayku Chipre islata, chimpallanta pasaspaykutaq Siria ladoman rirqayku, jinaspa Tiro llaqtaman chayarqayku, chaypi barco cargata saqenan kaqtin.
4 Jinan noqaykuqa iñiqmasikunata chaypi maskharqayku, tarispaykutaq qanchis p’unchayta paykunawan qhepakurqayku. Santo espirituq willasqanmi paykunaqa Pablota yapa-yapamanta nisharqanku amapuni Jerusalén llaqtaman wichananpaq.+
5 Tiempo tukukapuqtintaq chay llaqtamanta lloqsimpurqayku ripunaykupaq; paykunaqa llaqta jawakaman llapanku puriysiwarqanku warmikunantin wawakunantin ima. Lamar-qocha patapitaq qonqoriykukuspa Diosmanta mañakurqayku,
6 jinaspa despedinakapurqayku. Noqaykuqa barcomanmi seqapurqayku, paykunataq wasinkuman kutipurqanku.
7 Chaymi Tiro llaqtamanta ripuspayku Tolemaida llaqtaman chayarqayku, chaypin uraykurqayku iñiqmasikunata napaykuq, jinaspa juj p’unchay paykunawan qhepakurqayku.
8 Qhepantin p’unchaytaq ripuspayku Cesarea llaqtaman chayarqayku, chaypin allin willakuykunata willaq Felipeq wasinman jaykurqayku, jinaspa paywan qhepakurqayku, payqa Jerusalenpi apostolkunaq ajllasqan qanchis runakunamanta+ jujninmi karqan.
9 Paypan karqan tawa ususinkuna, paykunaqa profetizaqkunan karqanku, solterakunataqmi* karqankupas.+
10 Chaypi Pablo askha p’unchaykunaña kashaqtinmi Judeamanta uraykamusqa Ágabo+ sutiyoq profeta.
11 Paymi maypichus kasqaykuman jamuspa Pabloq chumpinta jap’ispa chakinta makintawan watakurqan, jinaspa nirqan: “Khaynatan santo espíritu nin: Kay chumpiq dueñontan Jerusalén llaqtapi judiokuna khaynata watanqaku,+ jinaspa waj nacionkunamanta runakunaman entreganqaku,+ nispa”.
12 Chayta uyarispaykun noqaykuqa chay llaqtapi kaq iñiqmasikunapiwan Pablota rogakurqayku amaña Jerusalén llaqtaman wichananpaq.
13 Pablon ichaqa niwarqanku: “¿Imaraykun khaynata waqashankichis? ¿Icha pisipachiytachu munashawankichis imachus ruway munasqayta amaña ruwanaypaq? Noqaqa manan watasqa kanallaypaqchu listo kashani, aswanpas Señor Jesuspa sutinrayku Jerusalén llaqtapi wañunaypaqwanmi listo kashani”,+ nispa.
14 Manapuni kasukuqtinmi noqaykuqa manaña jark’arqaykuchu, aswanmi nirqayku: “Chhaynaqa, Jehová* Diospa munaynin ruwakuchun”, nispa.
15 Chay p’unchaykuna qhepatan noqaykuqa ripunaykupaq alistakurqayku, jinaspa Jerusalén llaqtaman puririrqayku.
16 Cesarea llaqtamanta wakin iñiqkunapas noqaykuwan kuskan rirqanku, paykunan Chipre islamanta Mnasón sutiyoq iñiqpa wasinman pusawarqanku, jinan chaypi alojakurqayku, payqa unayñan iñiqman tukupusqa.
17 Jerusalén llaqtaman chayaqtiykuqa ancha kusikuywanmi iñiqmasikunaqa chaskiwarqanku.
18 Qhepantin p’unchaytaq Pabloqa noqaykuwan kuska rirqan Santiagowan tupaq,+ chaypin kashasqaku llapa umalliqkunapas.*
19 Jinan Pabloqa paykunata napaykurqan, chaymantataq lliuta willarqan waj nacionkunapi allin willakuykunata willasqanwan imakunatachus Dios ruwarqan chayta.
20 Chayta uyarispan paykunaqa Diosta jatunchayta qallarirqanku, ichaqa nirqankun: “Wayqelláy, yachasqayki jina, judiokuna ukhupiqa waranqanpin iñiqmasinchiskuna kashan, llapankutaqmi Moisespa chaskisqan kamachikuy simiman k’askakunku.+
21 Paykunan qanmanta uyarisqaku: Waj nacionkunapi tiyaq llapa judiokunamansi yachachimushan Moisespa kamachikuyninkunamanta t’aqakunankupaq, wawankuq qhari kaynin qarachata mana kuchunankupaq, costumbrenchiskunatapas mana ruwanankupaqwan, nispa rimaqta.+
22 Paykunaqa yacharunqakupunichá chayamusqaykitaqa. Chhaynaqa, ¿imatataq ruwasunri?
23 Kay nisqaykutayá ruway: Noqayku ukhupin kashan Diosman promesa ruwaq tawa qharikuna.
24 Paykunata pusarikuspa paykunawan kuska ch’uyanchakamuy, imakunatachus gastanqaku chaytaqa qanmi paganki, chhaynapi chujchankuta p’aqlata rutuchikunankupaq. Chhaynapin llapanku yachanqaku qanmanta rimaqta uyarisqankuqa mana cheqaqchu kasqanta, aswanpas allinta kausasqaykita, kamachikuy simitapas waqaychashasqaykita.+
25 Yachasqayki jina, waj nacionkunamanta iñiqkunamanqa ñan apachikunña juj cartata, chhaynapi idolokunaman jaywasqa mijunakunamanta,+ yawarmanta,+ seq’osqa aychamanta,*+ qhelli juchamantawan* karunchakunankupaq”,+ nispa.
26 Jinan Pabloqa qhepantin p’unchay chay qharikunata pusarikurqan, jinaspa paykunawan kuska ch’uyanchakamurqan,+ chaymantataq temploman jaykurqanku jayk’aqchus ch’uyanchakunanku p’unchaykuna junt’akunanta willakuq, chhaynapi sapankankumanta ofrendata jaywakunanpaq.
27 Qanchis p’unchaykuna tukukunanpaqña kashaqtinmi Asia provinciamanta judiokunaqa templopi payta rikuspanku llapa runakunata ch’aqwachirqanku, payta jap’ispataq
28 qaparirqanku: “¡Israel runakuna, yanapawayku! Kay runan jinantinpi llapa runakunaman yachachimushan llaqtanchis contra, kamachikuy simi contra, kay templo contra ima. Chaymantapas griego runakunataraqmi temploman pusaykun, chhaynapin kay ch’uya wasita qhellichashan”,+ nispa.
29 Chaytaqa nirqanku Éfeso llaqtayoq Trofimota+ llaqtapi Pablowan kuska purishaqta rikusqankuraykun, paykunaqa temploman payta pusaykunanpaqmi piensasharqanku.
30 Jinan llaqtantin runakuna ch’aqwarqanku, llapanku phawamuspankutaq Pablota jap’irqanku, jinaspa templo jawaman aysarqanku, punkukunapas kaq ratun wisq’asqa karqan.
31 Paykunaqa Pablota wañuchiyta munaspan maqayta qallarirqanku, chayllamanmi tropata umalliq comandanteman willarqanku Jerusalén llaqtantin ch’aqwarishasqanmanta.
32 Jinan payqa kaq ratu soldadonkunata capitankunatawan pusarikuspa phawaylla phawaykamurqan. Chay comandanteta* soldadokunatawan rikuspañan runakunaqa manaña Pablota maqarqankuchu.
33 Jinan comandanteqa qayllaykuspa Pablota presota jap’ichirqan, jinaspa iskay cadenawan watachirqan,+ chaymantataq runakunata tapurqan pichus kasqanta imatachus ruwasqantawan willanankupaq.
34 Runakunan ichaqa ch’aqwarirqanku, wakinmi jujta qaparirqanku, wakintaq jujnirayta. Chhayna ch’aqwa kasqanraykun comandanteqa mana imatapas entienderqanchu, chaymi kamachikurqan soldadokunaq cuartelninman Pablota apanankupaq.
35 Gradasman chayaqtintaq soldadokunaqa Pablota marq’asparaq aparqanku runakuna jap’iytapuni munasqankurayku,
36 paykunaqa askhapunin qhepankuta tanqapakamusharqanku “¡chay runata wañuchiychis!” nispa qaparispanku.
37 Soldadokunaq cuartelninman apaykunankupaqña kashaqtinmi Pabloqa ejercitopi comandanteta nirqan: “¿Juj ratulla qanwan rimariymanchu?”, nispa. Jinan comandanteqa nirqan: “¿Yachankichu griego rimayta?
38 Chhaynaqa, ¿manachu qan kashanki qayna-unchaykunalla gobierno contra jatariypi umallispa runa wañuchiqkunata tawa waranqata ch’inneqman pusaq Egipto runa?”, nispa.
39 Jinan Pabloqa nirqan: “Noqaqa Ciliciapi kaq allin reqsisqa Tarso llaqtamanta+ judío runan kani.+ Chayrayku valekuyki, permisota qoway kay runakunata rimapayanaypaq”, nispa.
40 Rimapayananpaq permisota qoqtintaq Pabloqa gradaspi sayaykuspa makinwan llaqta runakunata ch’inyachirqan. Llapanku upallaqtinkutaq hebreo rimaypi paykunata nirqan:+
Uraypi willakuykuna
^ Griego rimaypiqa “doncella sipaskunataqmi” ninmi.
^ Qhaway “Astawan yachanapaq A5” nisqata.
^ Qhaway Explicasqa simikuna nisqapi “Umalliq, kuraq runa” nisqata.
^ Chaypiqa “yawarnin mana sut’uchisqa aychamanta” nillanmantaqmi.
^ Qhaway Explicasqa simikuna nisqapi “Qhelli jucha” nisqata.
^ Comandantekunaqa waranqa soldadokunatan kamachiqku.
