Juan 9:1-41
9 Chayninta purishaspan Jesusqa rikurqan ñausapuni naceq runata.
2 Jinan discipulonkunaqa tapurqanku: “Yachachikuq,*+ ¿pitaq juchallikurqan kay runa ñausa nacenanpaqri? ¿Paychu icha tayta-mamanchu?”, nispa.
3 Jinan Jesusqa nirqan: “Manan kay runachu ni taytanchu ni mamanpaschu juchallikun, aswanmi kayqa kashan Diospa ruwayninkuna paywan rikuchisqa kananpaq.+
4 P’unchayraq kashaqtinmi kachamuwaqniypa munasqan llank’aytaqa ruwananchis,+ tutayaqtinqa manañan pipas llank’ayta atinqachu.
5 Kay pachallapiraq kashaspaqa noqan kay pachapaq k’anchay kani”,+ nispa.
6 Chaykunata nispataq pampaman thoqaspa t’uruta ruwarqan, chaywantaq chay runaq ñawinta llusirqan,+
7 jinaspa nirqan: “Phaway Siloan estanquepi maqchirakamuy”, nispa (Siloan simiqa “phawamuq unu” ninantan nin). Jinan payqa rispa maqchikamurqan, jinaspa ñawin kichasqa kutimurqan.+
8 Payta rikuspan llaqtamasinkunapas mañapakushaqta rikuq runakunapas nirqanku: “¿Manachu kayqa kashan limosna mañapakuq runa?”, nispa.
9 Wakinmi nisharqanku: “Paymi”, nispa. Wakintaq: “Paymanña rijch’akun chaypas, manan paychu”, nispa. Paytaq niq: “Noqan kani”, nispa.
10 Chaymi paykunaqa tapurqanku: “¿Imaynapitaq ñawiykiri kicharukun?”, nispa.
11 Jinan payqa nirqan: “Jesús sutiyoq runan t’uruta ruwaruspa chaywan ñawiyta llusiruwan, jinaspa niwan: Phaway Siloanpi maqchirakamuy,+ nispa. Chaymi noqaqa rispa maqchikamurqani, jinan ñawiyqa kicharukun”, nispa.
12 Jinaqtinmi nirqanku: “¿Maytaq chay runari?”, nispa. Paytaq nirqan: “Manan yachanichu, maypichá kakushanpas”, nispa.
13 Jinan chay runataqa fariseokunaman pusarqanku.
14 Samana p’unchaypin*+ Jesusqa t’uruta ruwaspa chay runaq ñawinta kicharqan.+
15 Fariseokunapas tapullarqankutaqmi imaynapichus ñawin kicharikurqan chayta, jinan payqa paykunata nirqan: “T’uruwanmi ñawiyta llusiruwan, maqchikamuqtiytaqmi ñawiyqa kicharakapun”, nispa.
16 Jinan wakin fariseokunaqa nirqanku: “Chay runaqa manan Diosmantachu kanman. Diosmanta kanman chayqa, waqaychanmanchá samana p’unchayta”,+ nispa. Wakintaq nirqanku: “¿Imaynapitaq juj juchasapa runari milagrokunata ruwanman?”,+ nispa. Chhaynapin paykunaqa yuyayninkupi t’aqanasqa kasharqanku.+
17 Chaymi chay runata tapullarqankutaq: “Ñawiykitataq kicharin chayqa, ¿imaninkitaq qanri paymanta?”, nispa. Jinan chay runaqa nirqan: “Payqa profetapunin kanman”, nispa.
18 Judiokunaqa manan creesharqankuchu ñausapunichus karqan chayta, ni ñawin kicharisqa kasqantapas, chaymi tayta-mamanta wajachimurqanku.
19 Jinaspa tapurqanku: “¿Wawaykichischu kay runa? ¿Ñausachu pay nacerqan? ¿Imaynapitaq kunanri rikushan?”, nispa.
20 Jinan taytanwan mamanpiwanqa nirqanku: “Arí, payqa wawaykun, ñausapunitaqmi nacenpas.
21 Ichaqa manan yachaykuchu imaynapichus ñawin rikushan chaytaqa, ni pitaqchus kicharqan chaytapas. Paytayá tapuychis, payqa machuñan, paymi chaytaqa willanasuykichis”, nispa.
22 Judío umallikunata manchakusqankuraykun paykunaqa chhaynata nirqanku;+ chay judiokunaqa ñan rimanakusqakuña pipas Jesusta “Cristo” niqqa sinagogamanta* qarqosqa kananpaq.+
23 Chaymi chay runaq tayta-mamanqa nirqanku: “Payqa machuñan, paytayá tapuychis”, nispa.
24 Jinaqtinmi paykunaqa chay runata wajmanta wajachimurqanku, jinaspa nirqanku: “Cheqaqta willakuspa Diosta jatunchay; noqaykuqa allintan yachayku chay runaqa juchasapapuni kasqanta”, nispa.
25 Jinan payqa nirqan: “Noqaqa manan yachanichu juchasapachus imaynachus chaytaqa, ñausa kashaspay kunan qhawashasqallaytan yachani”, nispa.
26 Chaymi paykunaqa nirqanku: “¿Imanarqasunkitaqri? ¿Imaynatan ñawiykita kicharqasunki?”, nispa.
27 Jinan payqa paykunata nirqan: “Ñataq niykichisña, qankunataq ichaqa mana uyariqpas tukuwankichischu. ¿Imapaqñataq wajmantari uyariyta munashankichis? Icha, ¿paypa discipulon kaytachu qankunapas munashankichis?”, nispa.
28 Jinan paykunaqa pisichaspa nirqanku: “Qanchá chay runaq discipulonqa kanki; noqaykuqa Moisespa discipulonkunan kayku.
29 Noqaykuqa yachaykun Diosqa Moisesman rimaykusqanta, pichus chay runata kachamurqan chaytan ichaqa mana yachaykuchu”, nispa.
30 Chaymi chay runaqa paykunata nirqan: “Admirakunapaqmá kayqa, maypis mana yachawaqchischu pichus kachamurqan chayta, ¿manachu chayta reparankichis ñawiyta kichawasqanpi?
31 Yachanchismá riki Diosqa juchasapakunata mana uyarisqanta,+ pichus payta manchakuspa munayninta ruwaqtan ichaqa uyarin.+
32 Manamá riki jayk’aqpas ñausapuni naceqpa ñawintaqa pipas kicharirqanchu.
33 Manachus kay runa Diosmanta kanman chayqa, manachá ima ruwaytapas atinmanchu”,+ nispa.
34 Jinan paykunaqa nirqanku: “¿Qan juchasapapuni naceq kashaspaykichu noqaykuta yachachiwankikuman?”, nispa. Jinaspa qarqopurqanku.+
35 Jesusqa chay runata qarqomusqankuta yachaspan, paywan tupaspa tapurqan: “¿Iñinkichu runaq Churinpi?”, nispa.
36 Jinaqtinmi payqa nirqan: “Wiraqocha, pitaq chay runari, chhaynapi paypi iñinaypaq”, nispa.
37 Jesustaq payta nirqan: “Paytaqa ñan rikurqankiña. Noqa rimapayaqniykin chayqa kashani”, nispa.
38 Jinan chay runaqa nirqan: “Iñinin, Señor”, nispa. Jinaspataq payman k’umuykurqan.
39 Jesustaq nirqan: “Noqaqa kay pachaman jamurqani runakuna juzgasqa kananpaqmi, chhaynapi mana rikuqkuna rikunankupaq,+ rikuqkunataq ñausa kapunankupaq”,+ nispa.
40 Chayta uyarispan chaypi kashaq fariseokunaqa nirqanku: “Chhaynaqa, ¿noqaykupas ñausachu kayku?”, nispa.
41 Jinan Jesusqa paykunata nirqan: “Ñausa kawaqchis chayqa, manachá juchayoqchu kawaqchis. Qankunan ichaqa rikuykun ninkichis, chayraykun juchallapi kashankichis”,+ nispa.
Uraypi willakuykuna
^ Chaypiqa “Rabí” nillanmantaqmi. Qhaway Explicasqa simikuna nisqapi “Rabí, raboni” nisqata.
^ Qhaway Explicasqa simikuna nisqapi “Samana p’unchay” nisqata.
