Jueces 16:1-31
16 Juj kutinmi Sansonqa Gaza llaqtata rirqan, chaypin rikurqan juj ramera warmita jinaspa chay warmiq wasinman jaykurqan.
2 Chayta rikuspan Gaza runakunaqa ninakurqanku: “¡Sansonmi jamurusqa!”, nispa. Jinaspa chay llaqtata muyuykurqanku, llaqta punkupitaq tutantin qhepakurqanku Sansón lloqsimuqtin qonqaylla phawaykunankupaq. Paykunaqa tutantinmi chayllapi kasharqanku, paykunapurataq ninakusharqanku: “Inti lloqsimuqtin jina wañuchisunchis”, nispa.
3 Sansonqa kuska tutakamallan chaypi puñurqan, jatarimuspataq payqa llaqta punkuta, punkuq ladonkunapi iskaynin k’aspikunantinta, k’ullumanta aldabantinta ima khakarqan jinaspa chayta q’epirikuspa Hebrón llaqtaq chimpanpi orqo patakama aparqan.
4 Chaymantataq Sansonqa Sorec wayq’opi tiyaq Dalila sutiyoq warmimanta enamorakurqan.+
5 Chay warmitan Filistea runakunaq umallinkunaqa nirqanku: “¿Maymantan chay runa chhaynaniraq kallpayoq? ¿Imaynatan wataykuman? ¿Imaynatan atipaykuman? ¿Manachu chayta engañollawan+ tapuruspa rimarachiwaq? Chayta ruwanki chayqa sapankaykun waranqa pachaj qolqeta qosaykiku”, nispa.
6 Chay qhepamantaq Dalilaqa Sansonta nirqan: “Ama jinachu kay, willaway. ¿Maymantan chhaynaniraq kallpayoq kanki? ¿Imawan wataspan pipas vencesunkiman?”, nispa.
7 Sansontaq nirqan: “Mana ch’akisqa jank’umanta qanchis cordelwanchus watawankuman chayqa, común runakuna jinallan mana kallpayoq kapuyman”, nispa.
8 Jinan Filistea runakunaq umallinkunaqa mana ch’akisqa jank’umanta qanchis cordelkunata apamurqanku, chaywanmi Dalilaqa Sansonta watarqan.
9 Chaykamataq Filistea runakunaqa Dalilaq wasin ukhupi Sansonta jap’inankupaq pakakurqanku. Jinan Dalilaqa Sansonta fuerteta nirqan: “¡Sansón, Filistea runakuna jap’irusunkiku!”, nispa. Jinan Sansonqa chay jank’umanta cordelkunata p’itirparirqan, imaynan ninaqa linomanta hilota ratulla rupharparin chhaynata.+ Chhaynapin mana yacharqankuchu imaynapichus kallpasapa kasqanta.
10 Dalilataq Sansonta nirqan: “Pujllapayashawankichu imaynachu kanpas, ¿imaraykun chhaynata llullakuwanki? Kunanqa sut’inta willaykuway, ¿imawanmi pipas watasunkiman?”, nispa.
11 Jinan Sansonqa nirqan: “Sichus mana jayk’aq utilizasqa mosoq waskhakunawan watawanqaku chayqa, común runakuna jinallan mana kallpayoq kapuyman”, nispa.
12 Chaymi Dalilaqa mosoq waskhakunawan Sansonta watarqan, jinaspa fuerteta nirqan: “¡Sansón, Filistea runakuna jap’irusunkiku!”, nispa. Jinan Sansonqa rijch’arispa waskhakunata hilota jinalla p’itirparirqan.+ (Tukuy chay tiempon Sansonta jap’iyta munaq runakunaqa wasi ukhullapi pakakusharqanku).
13 Chay qhepamanmi Dalilaqa Sansonta nirqan: “¿Imaraykun sapa kuti llullakuwanki? ¿Imaraykun sapa kuti engañawanki?+ ¡Niway! ¿Imawanmi pipas watasunkiman?”, nispa. Jinan Sansonqa nirqan: “Watawayta munaspaqa simp’aykunatan qanchisnintinta telarpi allwisqa q’aytukunawan simp’anayki”, nispa.
14 Jinan Dalilaqa Sansonpa nisqanman jina ruwarqan, simp’ankunata telar estacaman jap’irachispataq fuerteta nirqan: “¡Sansón, Filistea runakuna jap’irusunkiku!”, nispa. Chaymi Sansonqa usqhaylla rijch’arispa estacata orqorparirqan, allwisqa q’aytukunatapas p’itirparirqan.
15 Chay qhepamanmi Dalilaqa nirqan: “Qanqa yanqallan munakuykin niwanki,+ munakuwankiman chayqa sut’intachá willawankiman. Kinsa kutitañan llullakushawanki, manataq willawankichu maymantas chhaynaniraq kallpayoq kanki chayta”,+ nispa.
16 Dalilaqa sapa p’unchay tapupayaspan nishuta Sansonta renegachiq, chaymi Sansonqa manaña aguantayta atispa wañuytaraq munaq.+
17 Jinan Sansonqa sut’inta willapurqan: “Noqaqa nacesqaymantapachan Diospaq t’aqasqa nazareo* runa kani, chaymi mana jayk’aqpas chujchaytaqa rutuwarqankuchu.+ Sichus chujchayta ruturuwankuman chayqa, común runakuna jinallan mana kallpayoq kapuyman”, nispa.
18 Chayta uyarispan Dalilaqa repararqan Sansón cheqaqta nishasqanta, jinaspa Filistea runakunaq umallinkunaman usqhaylla willachimurqan:+ “Jamuychis, kunanqa sut’intan willaruwan”, nispa. Jinan Filistea runakunaq umallinkunaqa qolqeta aparikuspa Dalilaq kasqanman rirqanku.
19 Chaymantataq Dalilaqa Sansonta moqon* patapi puñuchirqan, jinaspa juj runata wajaspa simp’ankunata qanchisnintinta rutuchirqan. Jinan Dalilaqa Sansonpa kallpan pisiyasqanman jina dominayta qallarirqan.
20 Jinaspan fuerteta nirqan: “¡Sansón, Filistea runakuna jap’irusunkiku!”, nispa. Sansontaq rijch’arispa sonqollanpi nirqan: “Manan imanawanqakupaschu, qaynakuna jinan noqaqa chhafchirikuspalla librarukusaq”,+ nispa. Ichaqa manan yacharqanchu Jehová Dios saqerparipusqanta.
21 Jinan Filistea runakunaqa jap’iruspa iskaynin ñawinkunata orqorqanku jinaspa Gaza llaqtaman apaykurqanku. Chaypin cobremanta iskay jap’ichinakunawan makinkunaman churarqanku, jinaspa carcelpi molino rumita muyuchispa llank’achirqanku.
22 Qhepamanmi ichaqa chujchanqa jujmanta wiñapullarqantaq.+
23 Filistea runakunaq umallinkunan juñukurqanku Dagón* idolonkuman+ jatun sacrificiota jaywanankupaq, fiestata ruwanankupaqwan. Paykunan nisharqanku: “¡Diosninchis Dagonmi enemigonchis Sansonta makinchisman entregawanchis!”, nispa.
24 Jinan llaqtapi runakunaqa idolonkuta rikuspa alabayta qallarirqanku: “Diosninchis Dagonmi enemigonchista makinchisman entregapuwanchis. Chay enemigonchismi llaqtanchista dañota ruwaq,+ askha llaqtamasinchiskunatataq wañuchirqanpas”,+ nispa.
25 Paykunaqa kusisqan kasharqanku, chaymi nirqanku: “Sansonta kayman apamuychis paymanta burlakunanchispaq”, nispa. Chaymi Sansonta carcelmanta orqomurqanku paymanta burlakunankupaq. Jinan sayachirqanku wasiq columnankunaq chaupinpi.
26 Sansontaq makinmanta pusaqnin waynata nirqan: “¿Maypin kay wasita jap’iq columnakuna kashan chayman jap’ipakunaypaq?”, nispa.
27 (Chay wasipiqa junt’an runakunaqa kasharqan, qharikunapas warmikunapas. Filistea runakunaq umallinkunapas llapankun chaypi kasharqanku. Wasi patapipas yaqa kinsa waranqa warmi-qharikunan Sansonta asipayaspa qhawamusharqanku).
28 Chay ratun Sansonqa+ Jehová Diosmanta rogakurqan: “Tukuy munayniyoq Señorníy Jehová, amayá qonqawaychu. Diosnilláy, ama jinachu kay, kay kutillatawan kallpaykita qoykuway.+ Juj kaq ñawillaymantapas kay Filistea runakunata vengarukusaq”,+ nispa.
29 Chaymantataq Sansonqa wasi chaupipi kaq iskaynin columnakunaman jap’ipakurqan. Jujnin columnamanmi paña makinta churaykurqan, jujninmantaq lloq’e makinta.
30 Chaymantataq Sansonqa fuerteta qaparirqan: “¡Filistea runakunawan kuska wañusaq!”, nispa. Jinaspan tukuy kallpanwan chay columnakunata tanqarqan, jinan chay wasiqa chay llaqta umallikuna pataman, llapa runakuna patamanwan urmaykurqan.+ Chay p’unchaymi Sansonqa askha runakunata wañuchirqan, kausashaspa wañuchisqanmantapas astawanraq.+
31 Qhepamantaq Sansonpa wayqenkunapas papanpa llapan familiankunapas paypa ayanta apapuq jaykumurqanku. Jinaspan Zorá+ llaqtawan Estaol llaqtawan tupaypi p’ampapurqanku, maypichus papan Manoata+ p’ampapurqanku chaypi. Sansonqa iskay chunka watan Israel llaqtapi juez karqan.+
Uraypi willakuykuna
^ Moqotaqa “qonqori” nillankutaqmi.
