Jueces 4:1-24
4 Ehúd wañupuqtinmi Israel runakunaqa jujmanta ruwarqanku Jehová Diospa cheqnisqan mana allin ruwaykunata.+
2 Chaymi Jehová Diosqa Israel runakunata entregarqan Canaán rey Jabinman,+ payqa Azor llaqtapin rey karqan. Soldadonkunaq umallintaq karqan Arósej-Ha-Goyimpi+ tiyaq Sísara.
3 Rey Jabinqa isqon pachaj fierro carretakunayoqmi karqan, llantanpi cuchillokunayoq;+ paymi Israel runakunata iskay chunka wata sinchita sufrichirqan.+ Chaymi Israel runakunaqa Jehová Diospa yanapayninta mañakurqanku.+
4 Chay tiempopiqa Lapidojpa warmin profetisa+ Deboran Israel llaqtapi juzgasharqan.
5 Deboraqa palmera* k’uchupin tiyaq, chayqa Efraín orqo-orqopin kasharqan Ramá+ llaqtawan Betel+ llaqtawan tupaypi. Paymanmi Israel runakunaqa ima problemankutapas willaqku pay juzgananpaq.
6 Deboran wajachimurqan Quedes-Neftalí+ llaqtapi tiyaq Abinoanpa churin Baracta,+ paytan nirqan: “Jehová Diosmi nisunki: Phaway Tabor orqota riy, Neftalí ayllumanta Zabulón ayllumantawan chunka waranqa runakunata pusarikuspa.
7 Noqan Jabinpa soldadonkunaq umallin Sisarata pusamusaq Cisón wayq’oman+ llapa carretakunantinta soldadokunantinta, jinan makiykiman entregasayki,+ nispa”.
8 Jinan Baracqa nirqan: “Noqawan kuska rinki chayqa risaqmi, mana rinki chayqa manan risaqchu”, nispa.
9 Deborataq nirqan: “Arí, risaqmi. Ichaqa manan chay guerraqa qanpa sutiykipichu atipasqa kanqa, Jehová Diosqa juj warmiq makinmanmi Sisarata entreganqa”,+ nispa. Jinan Deboraqa Baracwan kuska Quedes+ llaqtaman rirqan.
10 Quedes llaqtapin Baracqa Zabulón ayllumanta Neftalí ayllumantawan+ runakunata juñurqan. Jinan chunka waranqa runakuna Baracwan kuska rirqanku, Deborapas paykunawan kuskan rirqan.
11 Quedes llaqta cercapi Zananin jatun sach’aq ladonpin tiyarqan Héber, payqa wakin quenita runakunamanta+ t’aqakuspan chaypi tiyarqan. Chay runakunaqa Moisespa suegron Obafpa+ wawankunamantan jamurqanku.
12 Sisaramanmi willarqanku: “Abinoanpa churin Baracmi Tabor orqopi+ kashan”, nispa.
13 Jinan Sisaraqa llapa isqon pachaj carretankunata soldadonkunatawan juñurqan Arósej-Ha-Goyimmanta Cisón wayq’oman+ rinankupaq. Chay carretankunaqa llantanpi cuchillokunayoqmi karqan.
14 Deborataq Baracta nirqan: “Jatariy, kunan p’unchaymi Jehová Dios Sisarata makiykiman entregasunki. Jehová Diosqa qanwanmi kashan”, nispa. Jinan Baracqa chunka waranqa runakunantin uraykamurqan Tabor orqomanta.
15 Paykuna phawaykuqtinmi Jehová Diosqa sinchita mancharichirqan+ Sisarata, soldadonkunata, carretakuna manejaqkunatawan, jinan Sisaraqa carretanmanta uraykuspa chakillapiña ayqekurqan.
16 Baracqa Arósej-Ha-Goyimkaman qatiykurqan carretakuna manejaqkunata soldadokunata ima. Chaypin Sisaraq llapa soldadonkunata wañuchirqanku, manan jujpas kausarqanchu.+
17 Sisaraqa chakillapin escapakurqan Jaelpa+ karpankama, Jaelqa Heberpa+ esposanmi karqan. Azor llaqta rey Jabinwan+ Heberpa familianwanqa sumaqpin kausasharqanku.
18 Karpanmanta lloqsispan Jaelqa Sisaraman ayparqan, jinaspa nirqan: “Kayman jaykumuy wiraqocháy, ama manchakuychu”, nispa. Jinan Sisaraqa Jaelpa karpanman jaykurqan. Jaeltaq frazadawan qataykurqan.
19 Chaymantataq Sisaraqa Jaelta nirqan: “Juj chhikan unuchaykita jaywariykuway, ch’akishawanmi”, nispa. Jinan Jaelqa qara p’uyñuta* kichaspa lecheta qorqan,+ chaymantataq kaqta frazadawan qataykurqan.
20 Sisaraqa nillarqantaqmi: “Punkullapi sayanki, pipas jamuspa tapusunki: ¿Pi qharipas kayman jamurqanchu?, nispa chayqa: Manan, nispan ninki”, nispa.
21 Sinchi sayk’usqa kaspan Sisaraqa misk’ita puñurapurqan, jinan Heberpa warmin Jaelqa estacata martillotawan aparikuspa sumaqllata jaykurqan Sisaraq puñushasqanman. Jinaspa chay estacawan Sisaraq umanpi takaspa pampakama pasarachirqan, chhaynapin Sisaraqa wañupurqan.+
22 Baracqa Sisaraq qhepantan phawarqan, Jaeltaq karpanmanta lloqsispa nirqan: “Jamuy kaypin kashan maskhasqayki runaqa”, nispa. Baractaq jaykuspa Sisarata wañusqata rikurqan, estacawan umanpi sat’isqata.
23 Chay p’unchaymi Diosqa Israel runakunawan atipachirqan Canaán rey Jabinta.+
24 Chaymantapachan Israel runakunaqa Canaán+ rey Jabinta guerrapi aswan-aswanta atiparqanku chinkachinankukama.+
Uraypi willakuykuna
^ Hebreo rimaypiqa “Deboraq palmeran” ninmi.
^ Qhaway Explicasqa simikuna nisqapi “Qara p’uyñu” nisqata.
