Oseas 4:1-19
4 Israel runakuna, Jehová Diospa siminta uyariychis,Jehová Diosmi kay ayllu runakunata juzganqa,+kay ayllupiqa manan kanchu honrado kaypas, mana tukukuq munakuypas,* Diosta reqsiypas.+
2 Tukuy ladopin kashan llullakuspa juraypas, llullakuypas,+ runa wañuchiypas,+suwakuypas jujwan pantaypas+ manan faltanchu.
Sapa ratun runakunatapas wañuchishanku.+
3 Chayraykun kay jallp’aqa sinchi llakisqa kanqa,+chaypi tiyaq runakunapas pisipapunqakun.
Salqa animalkunapas altonta phalaq animalkunapas wañupunqakun,lamar-qochapi challwakunapas wañupunqakun.
4 Diosmi nin: “Ama pipas phiñachinakuchunchu nitaq k’aminakuchunpaschu,+llaqtaykiqa sacerdote contra sayariq runakuna jinan kanku.+
5 P’unchay kashaqtinmi tutapi jina wijch’ukunki,profetapas qanwanmi tutapi jina wijch’ukunqa.
Mamaykitapas chinkachisaqmi.
6 Kay llaqtayqa manan reqsiwanchu, chaymi chinkachipusaq.
Manataq paykuna reqsiyta munawankuchu chayqa,+manañan sacerdoteychu kanqaku.
Kamachikuyniykunatataq* qonqapunku chayqa,+noqapas qonqapusaqmi wawankuta.
7 Yapakusqankuman* jinan astawan noqa contra juchallikurqanku.+
Paykunaq jatunchakuq kayninkutan sarusaq.*
8 Paykunaqa llaqtaypa juchallikusqanwanmi sajsa kanku,llaqtay astawan juchallikunantan munanku.
9 Llaqtamantapas sacerdotemantapas cuentatan mañasaq,imachus ruwasqankuman jinan cuentata mañasaq,ruwasqankuman jinan juzgasqa kanqaku.+
10 Paykunaqa mijunqakun, ichaqa manan sajsanqakuchu.+
Qhelli juchapin* purinqaku, ichaqa manan miranqakuchu.+
Jehová Diosta mana respetasqankuraykun chhaynapi tarikunqaku.
11 Ramera warmi jina juchapi* puriypas, vinopas, mosoq vinopasmana yuyayniyoqmanmi tukuchikun.*+
12 Llaqtayqa k’ullumanta idolokunaq yanapaynintan mañakun,watunapaq varankuq* willasqantan ruwan.
Paykunataqa ramera warmi jina* puriyta munasqankun noqa Diosninkumanta t’aqan,ramera warmi jina* purispan mana kasukuwankuchu.
13 Orqo patakunapin sacrificiota jaywanku,+moqo patakunapin roble sach’a k’uchukunapin sacrificiota q’osñichinku,estoraque sach’a k’uchukunapin jatun sach’a k’uchukunapin q’osñichinku.+
Chay sach’akunaq llanthunpin chayta ruwanku.
Chaykuna jawan ususinkunapas qhelli juchata ruwanku,*qhachuninkunapas jujwan pantanku.
14 Ususinkunamantaqa manan ramera warmi jina* purisqankumanta cuentata mañasaqchu,qhachuninkunamantapas manan jujwan pantasqankumanta cuentata mañasaqchu.
Qharikunan ramera warmikunawanqa purinku,idolonkuta yupaychaq ramera warmikunawanmi sacrificiota jaywanku.
Kay llaqta jina mana yuyayniyoq llaqtaqa+ chinkachisqan kanqa.
15 Israel, qanña ramera warmi jina kanki* chaypas,+ama Judá aylluqa juchachasqa kachunchu.+
Aman Guilgal llaqtamanpas+ ni Bej-Aven llaqtamanpas jamunkichischu.+
Aman, ¡wiñaypaq kausaq Jehová Diospa sutinpin jurani!,+ nispapas jurankichischu.
16 Israel llaqtaqa mana kasukuq waka jinan kapun.+
¿Chaychu Jehová Dios campopi malta ovejata jina michinman?
17 Efrainqa idolokunamanmi k’askakun.+
¡Jina imatapas ruwachun!
18 Payqa cervezata* tukuruspan qhelli jucha ruwaymanñataq jaykun.*
Kamachiqninkunapas millay ruwaykunatan munakunku.+
19 Wayran rafranwan k’uyuykunqa,*payqa sacrificiokuna jaywasqanmantan p’enqakunqa”, nispa.
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “Yachachikuyniykunatataq” nillanmantaqmi.
^ Chaypiqa sacerdotekunamantan rimashanman.
^ Chaypiqa yaqapaschá “Jatunchawanankumantaqa pisichawankun” nillanmantaq.
^ Chaypiqa “Ramera warmi jinan” nillanmantaqmi.
^ Hebreo rimaypiqa “sonqotan qechun” ninmi.
^ Chaypiqa “Qhelli juchapi” nillanmantaqmi.
^ Hebreo rimaypiqa “taunankuq” ninmi.
^ Chaypiqa “qhelli juchapi” nillanmantaqmi.
^ Chaypiqa “qhelli juchapi” nillanmantaqmi.
^ Chaypiqa “ramera warmikuna jina purinku” nillanmantaqmi.
^ Chaypiqa “qhelli juchapi” nillanmantaqmi.
^ Chaypiqa “qhelli juchata ruwanki” nillanmantaqmi.
^ Chaypiqa “trigomanta cervezata” nillanmantaqmi.
^ Chaypiqa “ramera warmi jina purin” nillanmantaqmi.
^ Chaypiqa “Wayran phukurparinqa” nillanmantaqmi.
