CAPÍTULO 25

¿Imaynatan saqepuyman masturbación nisqata?

“Noqaqa pusaq watayoq kasqaymantapachan masturbakuyta qallarirqani. Qhepamanmi ichaqa yacharqani chay ruwayta Dios cheqnikusqanta. Chaymi chay qhelli ruwayman jujmanta urmaspaqa sinchita llakikuq kani. Diosqa manan jayk’aqpas munakuwanqachu nispataqmi piensaqpas kani”. (Luis)

Wayna-sipaskunaqa wiñasqankuman jinan warmiwan otaq qhawariwan puñuyta munanku, chaymi wakinqa masturbakuyta qallarinku. * Wakin runakunan ichaqa ninku: “Masturbakuyqa manan juchachu, chayta ruwaspaqa manan pitapas dañota ruwashankichu”, nispa. Chay nisqankuqa manan cheqaqchu. Masturbakuspaqa sinchi sasachakuykunapin tarikuwaq. Apóstol Pablon nirqan: “Wañuchiychis aycha cuerpoykichista, chhaynapi [...] ama sinchi warminayachikuywan otaq qharinayachikuywan vencechikunaykichispaq”, nispa (Colosenses 3:5). Masturbakuq runakunaqa astawanmi warminayachikunku otaq qharinayachikunkupas.

● Masturbakuq runaqa cuerponta kusirichiyllapin piensan.

● Masturbakuq runaqa cuerponta kusirichinallanpaqmi warmiwanpas qhariwanpas kayta munan.

● Masturbakuq runaqa payllapi piensasqanraykun esposanwan otaq qosanwan puñushaspa mana kusisqachu kanku.

Chaymi mana masturbakunanchischu, yachananchismi cuerponchis kamachiyta (1 Tesalonicenses 4:4, 5). Chhaynaqa, ¿iman yanapasunkiman cuerpoykita kamachinaykipaq? Bibliaq nisqanman jinaqa chayman apaq ruwaykunamanta piensaykunamantan karunchakunayki, chhaynapi qhelli ruwayman ama urmanaykipaq (Proverbios 5:8, 9). Ichaqa sichus chay qhelli ruwayman urmaspa mana atipayta atishankichu chayqa, manan pisikallpayanaykichu. Pedro sutiyoq waynan nirqan: “Chay qhelli ruwayman jujmanta urmaspaqa nishutan llakikuq kani. Chaymi Diosmanta mañakunaypaqpas mana kallpay kaqchu”, nispa.

Sichus Pedro jina kashanki chayqa ama pisikallpayaychu. Askha runakunan qan jina tarikurqanku, ichaqa Diospa yanapayninwanqa atirqankun chay qhelli ruwayta saqepuyta, chhaynaqa qanpas atillankin.

Chayta ruwasqankumanta juchachakunku

Masturbakuq runakunaqa juchachakunkun chayta ruwasqankumanta. 2 Corintios 7:11 textopipas ninmi juchata ruwaqkunaqa chay ruwasqankumanta llakikusqankuta. Chhayna sientekusqankuqa yanapanmi chay ruwaykunata saqepunankupaq. Ichaqa sichus chaykunamanta nishuta llakikunkuman chayqa manañan kallpanku kanmanchu chayta saqepunankupaq (Proverbios 24:10).

Masturbakuyqa qhelli ruwaymi, juj vicio jinataqmi kanpas. Masturbakuq runakunaqa mana allin ruwaykunamanmi urmankuman, jinaspa sasachakuykunapi tarikunkuman (Tito 3:3). Masturbakuyqa manan juj runawan pantay jina jatun juchachu (Judas 7). Sichus masturbakuyman urmarqanki chayqa ama pisikallpayaychu, Diosqa perdonasunkin. Chayrayku kallpachakushallay cuerpoykita kamachinaykipaq.

Sichus chay ruwayman jujmanta urmanki chayqa manan pisipanaykichu. Yuyariy Proverbios 24:16 * textoq nisqanta. Chaypin nin: “Qanchis kutitaña chanin runa urmanqa chaypas, payqa sayaripullanqapunin, millay runakunatan ichaqa jatun llaki jap’inqa”, nispa. Manan chayta ruwasqaykiraykuqa piensanaykichu millay runa kanaykipaqqa. Aswanpas piensay imaraykuchus chay ruwayman urmarqanki chayta, imatas ruwawaq chay ruwayman jujmanta ama urmanaykipaq chaytapas.

Sichus chay mana allin ruwayman urmarqanki chayqa, Jehová Diospa munakuq khuyapayakuq kasqanpin yuyaymanayki. Rey Davidqa manan cuerponta kamachirqanchu, chaymi jatun juchaman urmarqan. Ichaqa chay qhepamanmi qelqarqan: “Imaynan taytaqa wawankunata khuyayta munakun, ajinatan Señor Diosqa manchakuqninkunata khuyayta munakun. Payqa reqsiwanchismi imayna kasqanchista, yuyarikuwanchismi ñut’u jallp’a kasqanchista”, nispa (Salmos 103:13, 14). Jehová Diosqa yachanmi juchasapa kasqaykita, chaymi listo kashan perdonanasuykipaq (Salmos 86: 5). Ichaqa munanmi chay ruwaykunata saqepunaykipaq kallpachakunaykita. Kunanqa yachasun imakunatas ruwanayki chay ruwayta saqepunaykipaq chayta.

Allinta qhawariy imawanchus kusirikusqaykita. Manan telepipas, peliculapipas, internepipas qhelli ruwaymanta videokunataqa qhawanaykichu. Chaykunata qhawayqa manan yanapasunkichu chay qhelli ruwayta atipanaykipaqqa. Salmos librota qelqaqmi Jehová Diosmanta mañakurqan: “Jark’aykuway ama yanqa kaqkunata qhawanaypaq”, nispa (Salmos 119:37). *

Juj ruwaykunapi piensay. Jehová Diosta serviq William sutiyoq waynan nin: “Manaraq puñushaspan Bibliata estudiani. Allinpunin manaraq puñushaspa Diospi piensaypas Bibliata leeypas”, nispa (Filipenses 4:8).

Confiasqayki runaman chay sasachakuyniykita willakuy. Chaykunamanta jujkunaman willakuyqa sasan kanman, ichaqa allinniykipaqmi kanqa. Chaytan David sutiyoq waynapas ruwarqan. Paymi nirqan: “Papaymanmi kallpata jap’ispa willakurqani. Papayqa manan phiñakurqanchu, aswanpas kusikurqanmi paypi confiasqaymanta, jinaspa sumaqta rimapayawarqan. Chaymi yanapawarqan chay mana allin ruwayta saqepunaypaq”, nispa.

Nillarqantaqmi: “Papayqa ñaupaqtan Bibliawan kallpachawarqan chay ruwasqaymanta ama nishuta llakikunaypaq. Chaymantapas sumaqllatan reparachiwarqan chay ruwasqay mana allinchu kasqanta. Papayqa niwarqanmi juj tiempo pasaqtin chaymanta rimanaykupaq, ichaqa chaykaman kallpachakunay karqan chay ruwayta saqenaypaq. Ichaqa niwallarqantaqmi jujmanta chay ruwayman urmaspaqa ama pisikallpayanaypaq. Papayman willakusqaymi allinta yanapawarqan chay ruwayta saqepunaypaq”, nispa. *

QATIMUQ YACHACHIKUYPI

¿Allinchu kanman juj ratu kusirikunallapaq jujwan puñuy?

[Willakuykuna]

KAYPI NISQANTA AMA QONQAYCHU

“Ayqekuy qanqa wayna-sipaskunaq munapayayninmanta, aswanpas ch’uya sonqowan Señorta wajakuqkunawan kuska kallpachakuy chanin kanaykipaq” (2 Timoteo 2:22)

KAYTAN RUWAWAQ

Masturbakunaykipaq cuerpoyki tanqasuqtiykin usqhaylla Jehová Diospa yanapayninta mañakunayki. Mañakuy “runakunaq mana aypay atisqan atiyta qonasuykipaq” (2 Corintios 4:7).

¿YACHARQANKICHU?

Cuerponchisqa tanqawanchismi qhelli ruwaykunata ruwananchispaq. Allin yuyayniyoq runan ichaqa cuerponta kamachin mana allinkunata ama ruwananpaq. Astawanqa jujkunaq mana rikushasqanmi cuerponta kamachin.

¡KAYKUNATA RUWAY!

¿Imakunatan ruwayman allin kaqkunapi piensanaypaq? ․․․․․

¿Iman yanapawanman chay qhelli ruwayman jujmanta ama urmanaypaq? ․․․․․

¿Imatan taytaytapas mamaytapas tapuyman chay ruwayta saqepunaypaq? ․․․․․

QANRÍ, ¿IMANINKIN?

● Jehová Diosqa liston kashan perdonawananchispaq, ¿imaraykun chayta yuyarinanchis? (Salmos 86:5.)

● Jehová Diosqa kamawarqanchis warmi-qhari puñuyta munananchispaq jinan, ichaqa niwanchismi cuerponchista kamachinanchispaq. Chaytaqa ruwaytaqa atisunmanmi ¿riki?

[Recuadro]

“Chay qhelli ruwayta saqepusqaymantapachan thaj allin concienciayoq kani, chaymi kusisqa kashani’’ (Sara)

[Recuadro]

Juj carrerapi phawaspaqa yaqapaschá urmanki, ichaqa jujmanta jatarispan phawashallanki. Kaqllataqmi masturbakuyta saqeywanpas, jujmantaña urmawaq chaypas kallpachakushanallaykin chay ruwayta saqepunaykipaq