Salomón Israelpi kamachiyta qallarishaqtinmi Diosqa tapurqan: “¿Imatan munanki qonayta?”, nispa. Salomontaq kutichirqan: “Waynallaraqmi kani, manan imatapas allintaqa ruwanichu. Yachayta qoykuway llaqtaykita cuidanaypaq”, nispa. Diostaq nirqan: “Yachaytaqa qosaykin, jinan llapa runamanta aswan yachayniyoq kanki. Chaymantapas qhapaqyachisaykin, kasuwaspaykiqa askha watan kausanki”, nispa.

Jinan Salomonqa templo jatarichiyta qallarirqan, chaypaqmi allin kaq qorita, qolqeta, maderata, rumikunatapas utilizarqan. Askha runakunan llank’arqanku, jinan templota qanchis watapi ruwayta tukurqanku. Templota inauguranankupaqmi Jehová Diosman sacrificiota jaywarqanku. Salomontaq qonqorikuspa mañakurqan: “Jehová Diosníy, qanqa aswan jatun aswan sumaq templotan merecenki. Chaywanpas, kaypi adorasqaykuta chaskiykuwayku”, nispa. ¿Kusikurqanchu Dios templota ruwasqankumanta? ¿Uyarirqanchu Salomonpa mañakusqanta? Salomón mañakuyta tukuqtinmi cielomanta nina uraykamuspa altarpi kaq llapa ofrendata rupharqan. Chaywanmi Diosqa rikuchisharqan templo ruwasqankumanta kusikusqanta. Chayta rikuspan Israel runakunapas kusikurqanku.

Salomonqa yachayniyoq kasqanraykun lliu nacionpi allin reqsisqa karqan. Runakunan payman riqku ima problemankupipas yanapananpaq. Saba llaqtamanta reinapas sasa tapuykunata ruwananpaqmi rirqan. Salomón llapa tapukuyninta kutichiqtinmi reinaqa nirqan: “Qanmanta willawasqankutaqa manan creerqanichu, kunanqa yachanin ancha yachayniyoq kasqaykita. Diosniykin bendecisunki”, nispa. Runakunaqa kusisqan tiyarqanku. Ichaqa pisi tiempomantan chhayna kausayqa tukupurqan.