Israel llaqtamanta sipaschan Siria nacionpi tiyarqan, familianqa karupin tarikurqan. Paytaqa Siria ejerciton apapurqan jinaspa Naamanpa esposanpa esclavan kapurqan. Naamanqa Siria ejercitopin umalli karqan. Chay sipaschaqa Jehová Diostan adorarqan, chaypi tiyaq runakunan ichaqa mana adorarqankuchu.

Naamanqa sinchi millay onqoywanmi onqorqan, jinan sipaschaqa payta yanapananpaq esposanta nirqan: “Qosaykitaqa juj runan qhaliyachinman. Payqa Israel nacionpi Jehová Diospa profetanmi, sutinmi Eliseo”, nispa.

Jinan Naamanpa esposanqa sipaschaq nisqanta willarqan. Naamanqa qhaliyaytapunin munarqan, chaymi Israel nacionman rirqan Eliseoq wasinman. Naamanqa nisharqanchá: “Importante runata jinachá chaskiwanqa”, nispa. Eliseon ichaqa kamachinta kacharqan payta nimunanpaq: “Jordán mayupi qanchis kutita chinkaykuy, jinan qhaliyapunki”, nispa.

 Chay nisqanqa manan gustarqanchu, jinan nirqan: “Noqaqa nisharqanin kikin profetachá lloqsimuspa Diosninta wajakunqa, jinaspa makinkunata altoman oqarispa qhaliyachiwanqa. Chay ruwananmantaqa aswanpas chay mayupi bañakunaypaq niwan. Siriapiqa aswan sumaq mayukunan kan”, nispa. Jinan phiñakuspa Eliseoq wasinmanta ripurqan.

Naamanpa kamachinkunan ichaqa payta nirqanku: “Imatapas ruwawaqmi qhaliyanaykipaqqa ¿riki? Manan sasachu chay profetaq nisqanta kasukuyqa”, nispa. Jinan Naamanqa paykunata kasuspa Jordán mayuta rirqan, jinaspa qanchis kutita unuman chinkaykurqan, qanchis kaq kutipitaq qhaliyapurqan. Chaymi kusikuymanta Naamanqa profeta Eliseoman kutispa nirqan: “Kunanqa yachanin Jehová Dios cheqaq Dios kasqanta”, nispa. Jinan Naamanqa wasinman kutipurqan. Sipaschaqa anchatachá kusikurqan qhaliyasqanta rikuspaqa ¿riki?