QHAWARIY kaypi sucedesqanta. Adanta Evatawanmi Edén huertamanta qarqomushanku. ¿Ima rayku?

Mana allin ruwasqankumantan Jehová Dios paykunata qarqoshan. ¿Yachankichu imatan Adán Evawan ruwaranku?

Diospa mana munasqanta ruwaranku. Diosmi paykunata niran huertapi llapa sach’akunamanta mikhunankupaq. Huk sach’aq rurullanmantan mana mikhunankuchu karan; chayta mikhuspaqa wañunkumanmi. Diospaqmi chayqa karan. Manan allinchu hukpa kaqninta hoqariyqa, ¿riki? Chhaynaqa, ¿iman sucederan?

Huk p’unchaymi huertapi Eva sapallan kashaqtin huk mach’aqway rimapayasqa. Diospa hark’asqan sach’aq rurunmanta mikhunanpaqmi rimapayaran. ¡Yuyaykuy chaypi! Jehová Diosqa manan rimananpaqchu mach’aqwaytaqa ruwaran. Hukmi rimachiran. ¿Pin karan?

Manan Adanchu. Manaraq Allpata ruwashaspa Jehová Diospa kamasqan huknin espiritun karan. Chaykunaqa angelkunan karan, manan paykunataqa rikusunmanchu. Chay angelqa sinchi hatunchakuqmanmi tukusqa. Dios hina kamachiq kaytan munasqa, Jehová Dios kasukunankutaqa payta kasukunankuta munaran. Paymi mach’aqwayta rimachiran.

Kay angelqa Evatan q’oturan. Chay sach’aq rurunta mikhuspaqa Dios hinan kanki, nispa. Chay nisqanta kasuspan Evaqa mikhusqa, Adanpas kaqta ruwallasqataq. Adanpas Evapas Diostan mana kasukurankuchu, chay raykun qarqochikuranku Edén huertapi sumaq tiyasqankumanta.

Hamuq tiempopin Diosqa, Edén hina sumaq huertaman kay Allpata tukuchinqa. Chaymantañan yachasun qanpas imayna yanapanaykita. Kunanqa yachasun Adantapas Evatapas ima sucedesqanta.