ÑAN 10 wataña pasan allin yachachisqa israelitakunata Babiloniaman Nabucodonosorpa apasqanmanta. ¡Qhawariy kayta! Jerusalenta ruphachishanku, mana wañuchisqanku israelitakunatataqmi Babiloniaman presota apashanku.

Profetakunaqa ñawpaqmantan willaranku, millay ruwasqankuta mana saqeqtinkuqa kaykuna sucedenanta. Israelitakunan ichaqa profetakunata mana uyarirankuchu. Pantasqa dioskunatan yupaycharanku Jehová Diosta yupaychanankumantaqa. Chaymi muchuchisqa karanku. Diospa profetan Ezequielmi willawanchis israelitakunaq millaykuna ruwasqankuta.

¿Pitaq Ezequielri? 10 wata ñawpaqta manaraq Jerusalén thunichisqa kashaqtin, apasqanku waynakunamanta hukninmi. Danielpas, kinsantin amigonkunapas, Ezequielwan kuskan Babiloniaman apasqa karanku.

Babiloniapiraq Ezequiel kashaqtinmi, Jehová Dios rikuchin Jerusalén yupaychana wasipi millaykuna ruwasqankuta. Milagropin Jehová Diosqa chayta rikuchin. Ezequielqa Babiloniapin kashan, chaymantan Jehová Dios rikuchin Jerusalenpi imaymana sucedesqanta. ¡Millaymi rikusqanqa!

Ezequieltan Jehová Dios nin: ‘Qhawariy yupaychana wasipi millaykuna ruwasqankuta. Perqakunapin dibujanku mach’aqwaykunata huk animalkunatapas. ¡Chaykunatan israelitakuna yupaychashanku!,’ nispa. Ezequielqa chaykunatan rikun, chaymi qelqan imaymana rikusqanta.

‘¿Rikushankichu Israelpi umalliqkunaq pakallapi ruwasqankuta?’ nispan tapun Jehová Dios Ezequielta. Arí, payqa chaytapas rikunmi. 70 runakunan yupaychashanku pantasqa dioskunata. Paykunaqa ninku: ‘Jehová Diosqa manan rikumuwanchischu. Ripunmi suyunchismanta,’ nispa.

Chaymantan Jehová Diosqa Ezequielman rikuchin yupaychana wasipi wichay lado punkunpi warmikunaq ruwasqanta. Chaypi tiyaspan pantasqa dios Tamuzta yupaychashanku. ¡Qhawariy Jehová Dios yupaychana wasiman haykunapi runakunata! 25 runakunan chaypi kashanku. Ezequielpas rikushanmi. ¡Intiq lloqsimunan ladomanmi k’umuykushanku Intita yupaychanankupaq!

‘Kay runakunaqa manan respetawankuchu,’ ninmi Jehová Dios. ‘¡Manan millaykunallatachu ruwanku, aswanpas yupaychana wasiyman haykuspan chaykunata ruwashanku!,’ nispa. Chay raykun Jehová Dios nin: ‘Rikunqakun phiñakusqayta. Wañuqtinkupas manan llakikusaqchu,’ nispa.

Ezequielman kaykuna rikuchisqan kinsa wata qhepallamanmi, israelitakunaqa kamachikuq Nabucodonosor contra hatarinku. Chaymi payqa israelitakunawan maqanakun. Wata kuskan qhepatan Babiloniapi runakuna Jerusalenta haykuspa llaqtata ruphachinku. Wakin runakunatan wañuchinku, wakintataq Babiloniaman presota apanku.

¿Ima raykun Jehová Dios qhawallaran israelitakunaq wañunanta? Manan Jehová Diosta uyarirankuchu nitaq kamachisqantapas kasukurankuchu. Kaymi yachachiwanchis Diospa kamachisqanta kasukuyqa allin kasqanta.

Israelpiqa puchuranmi pisi t’aqa runakuna. Chay raykun Nabucodonosorqa churan judío runa Gedaliasta Israelpi runakunata kamachinanpaq. Wakin israelitakunan ichaqa Gedaliasta wañuchinku. Chaymi paykunaqa manchakunku chay ruwasqankumanta Babiloniapi runakuna llapankuta wañuchinanmanta. Chay raykun Jeremiasta obliganku paykunawan kuska Egiptoman ayqekunankupaq.

Israel suyupiqa 70 watan mana pipas tiyanchu. Ch’usaqmi llaqta qhepan. Jehová Diosmi ichaqa prometen 70 wata qhepaman llaqtanta kutichimunanpaq. Chaykama, ¿iman suceden Diospa llaqtanta Babiloniapi? Chaymanta yachasun.