LIMOSNA mañakuq iskaynin ñawsakunata hanpisqan qhepamanmi, Jesusqa rin Jerusalenpa qayllanpi huch’uy llaqtaman. Iskay qatikuqninkunatan nin: ‘Chay llaqtachata riychis chaypin tarinkichis malta asnota. Paskaspaykichis apamuychis,’ nispa.

Asnota apamuqtinkun Jesusqa asnopi sillaykun. Asnopi sillaykuspan Jerusalenta haykun, Jerusalenqa sispallapiñan kashan. Llaqtaman chayashaqtinmi askha runakuna lloqsimunku Jesusta chaskinankupaq. Yaqa llapankun hawa p’achankuta ch’ustikuspa ñanpi mast’anku. Wakintaq palmera k’allmata hap’ispa qaparinku: ‘¡Jehová Dios saminchachun sutinpi hamuq kamachikuqta!,’ nispa.

Ñawpa tiempopin Israelpi mosoq kamachiqkunaqa runaq rikunanpaq, asnopi sillaykuspa Jerusalenta haykuranku. Chaytan Jesuspas ruwan. Kay runakunataq rikuchishanku Jesús kamachikuq kananta munasqankuta. Manan ichaqa llapa runachu chayta munanku. Kaytan yachanchis yupaychana wasita Jesús riqtin chaypi sucedesqanwan.

Yupaychana wasipin Jesusqa hanpin ñawsakunata, such’ukunata, ñuk’ukunatapas. Chayta rikuspan wawakunaqa Jesusta hatunchanku. Chaywan phiñakuspan sacerdotekunaqa Jesusta ninku: ‘¿Uyarishankichu kay wawakunaq rimasqanta?,’ nispa.

‘Arí,’ ninmi Jesusqa. ‘¿Manachu hayk’aqpas Bibliapi leerankichis: “Wawakunatan yachachiranki hatunchanankupaq” nisqanta?,’ nispa. Chaymi wawakunaqa hatunchashallanku Diospa qosqan kamachikuqta.

Ñoqanchispas chay wawakuna hinan kayta munanchis, ¿riki? Wakin runakunaqa Diospa kamachikuyninmanta rimasqanchistan upallachiyta munankuman. Ñoqanchisqa willashallasunmi runakunapaq sumaqkunata Jesuspa ruwananmanta.

Allpapi Jesús kashaqtinqa manan tiemporaqchu karan kamachikuy qallarinanpaq. ¿Hayk’aqmi kamachiyta qallarinqa? Chaytan qatikuqninkuna yachayta munaranku. Chaymanta kunan yachasun.