¿IMATAN kay chikacha amigochankunawan leeshan? Arí, qanpa leesqayki librotan... Bibliamanta willakuq libroy, nisqata. Kay willakuytan leeshanku... “Imata ruwana wiñayta kawsanapaq,” nisqata.

¿Imatan yachashanku? Ñawpaqtaqa, Jehová Diosmanta Churin Jesusmantawanmi yachana wiñay kawsanapaq. Biblian nin: ‘Kaymi wiñay kawsayman apaq ñanqa. Sapallan cheqaq Diosmanta, Churin Jesucristomantawan yachay,’ nispa.

¿Imaynatan yachasunman Jehová Diosmanta Churin Jesusmantapas? Chaytaqa ruwasunman Bibliamanta willakuq libroy nisqata qallariymanta tukukuykama leespan. Kay libroqa allintan willawanchis Jehová Diosmanta, Jesusmantapas. Willawanchismi paykunaq imaymana ruwasqankumanta, hamuq tiempopi ruwanankumantapas. Leenanchismi ichaqa huk librotapas.

¿Rikushankichu pampapi librota? Chayqa Biblian. Pillawanpas leechikuy Bibliata, leesqayki willakuykuna maykunamanta horqosqa kasqanta yachanaykipaq. Biblian llapanta willawanchis Jehová Diosmanta, paypa munasqanman hina servinanchispaq, wiñay kawsayta imayna chaskinanchistapas. Chay rayku Bibliata sapa kutin leenanchis.

Manan ichaqa Jehová Diosmanta Jesusmantapas yachayllachu. Askhatan yachasunman paykunamanta, paykunaq yachachisqanmantapas, chaywanpas manaraqmi wiñay kawsayta chaskisunmanchu. ¿Imatawanmi ruwananchis?

Yachasqanchisman hinan kawsananchis. ¿Yuyashankichu Judas Iscariotemanta? Payqa Jesuspa akllasqan 12 apostolkunamanta hukninmi karan. Judasqa askhatan yacharan Jehová Diosmanta Jesusmantapas. ¿Iman sucederan? Tiempowanmi payllapaq imatapas munaqman tukuran, chaymi 30 qolqeta chaskiran Jesusta traicionananpaq. Judasqa manan chaskinqachu wiñay kawsayta.

¿Yuyashankichu 69 willakuypi Guejazimanta yachasqanchista? Payqa hukpatan munapayaran p’achantapas qolqentapas. Llullakuspan chaykunata chaskiran, chaymi Jehová Diosqa muchuchiran. Ñoqanchistapas muchuchiwasunmanmi kamachikuyninkunata mana kasukuqtinchisqa.

Askha runakunan ichaqa wañunankukama Jehová Diosta serviranku. Paykuna hinan kayta munanchis, ¿riki? Samuel wawan ñoqanchispaq allin ejemplo. 55 willakuypi yachasqanchis hina, payqa tawa otaq pisqa watayoq kashaspallaraq yupaychana karpapi Jehová Diospa munayninta ruwaran. Chay rayku wawaraq kashaspapas atiwaqmi Jehová Diospa munaynin ruwayta.

Llapanchismi munanchis Jesucristo hina kayta. 87 willakuypi yachasqanchis hina, waynachallaraq kashaspan Jesusqa yupaychana wasipi rimasharan hanaq pachapi Taytanmanta. Pay hinan kananchis. Lliw runaman willasun sumaq Jehová Diosmanta, Churin Jesucristomantapas. Chaykunata ruwasun chayqa, atisunmi Diospa qosqan mosoq paraisopi wiñaypaq kawsayta.