Llapa religionkunapin kan allin sonqoyoq huch’uyaykukuq runakuna. Diosqa interesakunmi paykunapi ancha valorniyoqpaqmi qhawarinpas. Chaywanpas religionpa sutinpin sinchi mana allinkunata ruwanku (2 Corintios 4:3, 4; 11:13-15). Noticiakunapin uyarinchis wakin religionkuna guerrakunapi, terrorismo nisqapi chaqrukusqankumanta, askhanpi runakuna wañuchisqankumanta, wawakuna ñak’arichisqankumanta, abusasqankumanta ima. Chaykunata uyarispan allin sonqoyoq runakuna manaña religionmanta imatapas yachayta munankuchu.​—Leey Mateo 24:3-5, 11, 12.

Cheqaq religionqa Diostan hatunchan, pantasqa religionkunan ichaqa Diosta phiñachinku. Paykunaqa mana kaqtan Diosmanta willanku, pantasqatan wañupuqkunamanta yachachinku, nitaq huk yachachikuyninkunapas Bibliawan tupanchu. Jehová Diosmi ichaqa munan runakuna paymanta cheqaq kaqta yachanankuta.​—Leey Eclesiastés 9:5, 10; 1 Timoteo 2:3-5.

Jehová Diosqa reqsinmi, “Diostan munakuyku” nishaspa Satanaspa kamachisqan pachata munakuqkunata (Santiago 4:4). Llapa pantasqa religionkunatan Biblia sutichan: “Hatun Babilonia”, nispa. Chhayna sutiyoq llaqtapin pantasqa religión paqarirqan Noepa tiemponpi Hatun Para kasqan qhepaman. Pisi tiempollamantan Diosqa llapa pantasqa religionkunata qonqaylla chinkachinqa, runakunata engañaspa mana allinkunata ruwasqankurayku.​—Leey Apocalipsis 17:1, 2, 5, 16, 17; 18:8.

Diosqa reqsinmi pantasqa religionkunapi kashaq allin sonqoyoq runakunata. Paykunatan cheqaq kaqta yachachispa chay religionkunamanta horqomushan.​—Leey Miqueas 4:2, 5.

Jehová Diosqa interesakunmi cheqaq kaqta yachaspa allin kaqta ruway munaq runakunapi. Paykunatan nin pantasqa religionmanta lloqsipunankupaq. Diosta tukuy sonqowan munakuqkunaqa, kallpachakunqakun kawsayninkuta cambianankupaq.​—Leey Apocalipsis 18:4.

Ñawpa tiempopipas allin sonqoyoq runakunan apostolkunaq willasqanta sumaqta uyarikurqanku. Jehová Diosmi paykunaman yachachirqan allin kawsayta suyakuyniyoq kaytapas. Chay runakuna hinan ñoqanchispas allin willakuykunata uyarikuspa Diospa munayninta ñawpaqta ruwananchis.​—Leey 1 Tesalonicenses 1:8, 9; 2:13.

Diosqa sumaqtan chaskin pantasqa religionta saqespa cheqaq religionman haykuqkunata. Paykunaqa Diospa amigonmi kapunku, lliw iñiqmasikunan munakunku, wiñay kawsaytan suyakunkupas. ¿Manachu qanpas chayta munawaq?​—Leey Marcos 10:29, 30; 2 Corintios 6:17, 18.

Jehová Dios llapa pantasqa religionkunata chinkachipuqtinqa, thakpin llapa runakuna kawsanqaku. Manañan runakunata engañaspa t’aqanachiq religionkuna kanqañachu. Llapa runakunan sapallan cheqaq Diosta yupaychanqaku. ¿Manachu chayqa allin willakuykuna?​—Leey Apocalipsis 18:20, 21; 21:3, 4.