Pisillaña wañupunanpaq kashaqtinmi Jesús nirqan: “Qhapaqsuyumanta allin willakuykunan kay pachantinpi willasqa kanqa, llapa suyukunaq yachananpaq, hinaqtinmi p’uchukayqa chayamunqa”, nispa (Mateo 24:14). ¿Imaynatan predicacionta Hallp’antinpi aparikunman? Jesuspa yachachisqanta hina ruwaspan (Lucas 8:1).

Runakunaq wasintan riyku. Jesusmi qatikuqninkunata yachachirqan wasin-wasinta predicanankupaq (Mateo 10:11-13; Hechos 20:20). Paykunaqa yacharqankun may cheqaskunallapi predicanankuta (Mateo 10:5, 6; 2 Corintios 10:13). Kay tiempopipas manan comunllatachu predicayku, sapanka iñiq t’aqan yachan maymanta maykama predicananta. Chay hinapin Jesuspa kamachisqanta hinapuni “llapa runaman allin willakuykunata” willayku (Hechos 10:42).

Kallpachakuykun llapa runakunaman predicanaykupaq. Jesusqa qocha patapi, p’uytuq qayllanpi otaq maypichus runakunaq kasqanpin predicaq (Marcos 4:1; Juan 4:5-15). Ñoqaykupas Bibliamantan runakunawan willayku callekunapi, mercadokunapi, parquekunapi, telefonopi otaq may tarikusqaykupipas. Atikuqtin hinan iñiyniykumanta willayku vecinoykuman, llank’aqmasiykuman, estudiaqmasiykuman, familiaykuman ima. Chaymi waranqa-waranqanpi runakunamanña ‘qespichiq [...] willakuykunata’ willashayku (Salmo 96:2).

¿Pimanmi qan willariyta munawaq Diospa Gobiernonmanta, qhepaman imatachus ruwananmantapas? Ama sonqollaykipichu hap’ikuy chay allin willakuykunata. Atikuqtin hina hukkunaman willay.

• ¿Ima allin ‘willakuykunatan hukkunaman willananchis’?

• ¿Imaynatan Jehová Diospa testigonkuna predicacionta apariyku?