¿HAYK’AQLLAPAS Lindata hina pasarqasunkichu? Payqa sinchi sonqo nanasqan tarikurqan. Wakinqa iñiqmasinkuq imatapas ruwasqanwanmi sintikapunku. Dios serviyninkutapas saqepunku imaraqmi, chayqa llakikunapaqmi. ¿Hayk’aqllapas chay pasarqasunkichu?

Huk cristianomasinchisqa munakuywanmá riki tratawananchis, chaypaschá huk iñiqmasinchis mana allinta tratawaqtinchisqa sasa kanman perdonay (Juan 13:34, 35). Chayraykun pipas iñiq t’aqanchispi sonqonchista k’iriwaqtinchisqa sinchi sonqo nanasqa tarikusunman (Salmo 55:12).

Bibliaq nisqanman hinaqa, mayninpiqa huk cristianoqa razonwanmi quejakunman huk iñiqmasinmanta (Colosenses 3:13). Sichus mayqenninchispas chhaynapi tarikusunman chayqa sasan kawasunman chayta atipayqa. ¿Iman yanapawasunman? Bibliapi wakin yachachikuykunapi yuyaymanaymi. Kinsamanta yachasun.

Hanaq pacha taytanchisqa qhawamushanmi. Jehová Diosqa tukuytan qhawamushan, mana allinta tratawasqanchisrayku sufrisqanchistapas rikumushanmi (Hebreos 4:13). Ichaqa manan rikumushallanchu, payqa sientenmi nanayninchista (Isaías 63:9). Diosqa manan dejanqachu ni problemakunapas, ni llakikuykunapas, ni pi iñiqmasipas, ni imapas ‘munakuyninmanta t’aqawananchista’ (Romanos 8:35, 38, 39). Ñoqanchispas kaqllatataqmi ruwananchis, manan dejananchischu ni pipas ni imapas Diospa munakuyninmanta t’aqawananchistaqa.

Perdonayqa manan hukpa huchanta allinpaq qhawariychu. Phiñachiwaqninchispa huchanta perdonaspaqa manan chaywanchu nishanchis “allinmi chay ruwasqayki” nispa, nitaqmi nishanchischu “chayraykuchá riki ruwan” nispaqa. Jehová Diosqa manapunin allinpaqchu qhawarin huchataqa, ichaqa perdonanmi sonqomantapuni arrepientekuqtinkuqa (Salmo 103:12, 13; Habacuc 1:13). Jehová Diosqa manan wiñaypaqchu phiñasqalla kashan, payqa munanmi ñoqanchispas chhayna kananchista, chaymi kallpachawanchis perdonaq kananchispaq (Salmo 103:9; Mateo 6:14).

Sintikuyta mana waqaychayqa allinninchispaqmi. ¿Imataq pasanman huk kilo rumita makiykita haywarispa hap’iqtiyki? Ratolla hap’ispaqa manachá sayk’uwaqchu. Ichaqa, ¿unayta chhaynata hap’iwaq chayri? ¿Yaqapas chunka minutota otaq huk horata otaq aswan mastapas chayri? Unayta hap’isqaykiman hinachá astawan llasasunkiman, ichaqa manayá  rumiq peson yapakusqanraykuchu aswanpas makiykiq sayk’upusqanraykun. Kaqllataqmi sintikuypas: Imachallamantaña sintikusunman karqan chaypas unayta sonqonchispi waqaychaspaqa ñoqallanchistaqmi dañota ruwakusunman. Chayraykun Jehová Diosqa niwanchis sintikuyta sonqonchispi ama waqaychanapaq, chayqa allinninchispaqmi (Proverbios 11:17).

¿Imatan Linda ruwarqan phiñachisqan hermanapaq mana sintisqalla kananpaq? Bibliaqa yachachiwanchismi imaraykuchus perdonananchis kasqanta, chaypin allinta yuyaymanarqan (Salmo 130:3, 4). Hukkunata perdonaqtinchisqa Diospas perdonawasunmi, chay yachachikuymi astawanqa sonqonman chayarqan (Efesios 4:32-5:2). Chay textokuna imaynata yanapasqanta yuyarispan nin: “Jehová Diospas rimapayashawanman hinan karqan”, nispa.

Tiempoq pasasqanmanmi Lindaqa manaña sintisqañachu kapurqan. Wiñaypaqmi phiñachiqninta perdonapurqan, kunanqa amigantinmi kapunku. Lindaqa Jehová Diostan servishallan. Jehová Diosqa munanmi wiñaypaq servishanallaykita.