Jesusqa allin reqsisqan kapuran kinsa wata jinaña yachachisqanrayku. Waranqa-waranqa judío runakunan milagrokuna ruwasqantapas rikuranku, chaymi paymanta willakuyqa jinantin chay llaqtakunapi mast’arikuran. Chayraykun Jerusalenpi ch’ujlla ruway fiestapiqa askha runakuna payta rikuyta munasharanku.

Chay fiestapin wakinqa Jesusmanta nisharanku: “Payqa allin runan”, nispa. Wakintaq ichaqa nisharanku: “Manan allin runachu, payqa runakunatan engañan”, nispa (Juan 7:12). Manan pipas alayritaqa Jesusmanta allinta rimaqchu judío umallikunata manchakusqankurayku.

Kuskan fiestatañan Jesusqa temploman jamuran, jinaspa yachachiyta qallariran. Jinan judío runakunaqa admirasqa ninakuranku: “¿Imaynapitaq kay runari Diospa simin qelqakunamanta yachan? ¡Payqa manamá riki yachachiqkunaq risqan escuelakunamanqa riranchu!”, nispa (Juan 7:15).

Jinan Jesusqa niran: “Yachachisqayqa manan noqaqchu, aswanpas kachamuwaqniypan. Pipas paypa munayninta ruwayta munaqqa reparanqan ima yachachisqaypas Diosmantachus icha noqallamantachus kasqanta”, nispa (Juan 7:16, 17). Jesusqa Diospa kamachikuyninman jina yachachispan allinta rikuchiran imapas yachachisqanqa Yayanmanta jamusqanta.

Jesusqa nillarantaqmi: “Moisesmi kamachikuy simitaqa qorasunkichis ¿riki? Chhaynaqa, ¿imanaqtintaq mana mayqenniykichispas kamachikuy simitari kasukunkichischu? ¿Imaraykutaq wañuchiytari munawashankichis?”, nispa. Juj lado llaqtakunamanta jamuq runakunaqa manan yacharankuchu payta wañuchiy munasqankuta, chaymi niranku: “Supaychá qanmanqa jaykusunki. ¿Pitaq qantari wañuchiyta munashasunki?”, nispa (Juan 7:19, 20).

Ichaqa judío umallikunan Jesustaqa wañuchiyta munasharanku juj wata kuskan ñaupaqta sábado p’unchaypi juj runata qhaliyachisqanrayku. Chaymi Jesusqa paykunata niran: ‘Qankunaqa sábado p’unchayña kaqtinpas kuchullankichismi qhari kay qarachataqa ¿riki? Chhaynaqa sábado p’unchaytawantaq qhari kay qarachata kuchunkichis, chhaynapi Moisespa chaskisqan kamachikuy simita mana p’akinaykichispaq chayqa, ¿imanaqtintaq noqapaqri chhaynaniraqtaraq phiñakunkichis juj runata sábado p’unchaypi qhaliyachisqaymanta? Ama jawallanta qhawaspachu juzgaychis, aswanpas chaninta juzgaychis’, nispa (Juan 7:23, 24).

Jerusalenpi tiyaq runakunan ichaqa ninakuranku: “¿Manachu kayqa kashan wañuchiyta munasqanku runa? ¡Qhawariychis, lliu runakunaq rikusqanmi rimashan! Manataq pipas ima ninpaschu. Umallikunaqa, ¿‘paychá Cristoqa’ nishankuchu kanpas? Noqanchisqa yachanchismá riki maymantachus kay runa kasqanta, Cristo jamuqtinmi ichaqa mana pipas yachanqachu maymantachus kasqanta”, nispa (Juan 7:25-27).

Chaymi Jesusqa niran: “Qankunaqa reqsiwankichismi, yachankichistaqmi maymantachus kasqaytapas. Noqaqa manan noqallamantachu jamuni; jinaspapas kachamuwaqniyqa cheqaqmi, manataqmi paytaqa reqsinkichischu. Noqan ichaqa reqsini, paypa sutinpi jamusqayrayku, paymi noqataqa kachamuwan”, nispa (Juan 7:28, 29). Chayta niqtinmi runakunaqa jap’iyta munaranku, ichaqa manan jap’irankuchu; manaraqmi Jesuspa wañunan tiempochu karan.

Chaywanpas askhan Jesuspiqa iñiranku. ¿Imaynataq manari paypi iñinkumanchu karan? Jesusqa sut’itamá pay Cristo kasqanta rikuchiran unu patanta purispa, sinchi wayrata  thanichispa, waranqanpi runakunaman mijuchispa, imaymana onqoyniyoqkunata qhaliyachispa, wañusqakunatapas kausarichispa ima. Chaychá wakinqa nirankupas: “Paypunin Cristoqa kanman; manan pipas paypa ruwasqan milagrokunamanta astawanqa ruwanmanñachu”, nispa (Juan 7:31).

Chayta uyarispan fariseokunaqa umalli sacerdotekunapiwan guardiakunata kacharanku Jesusta jap’imunankupaq.