Manan llapa runachu igualta qhawarinku ujaytaqa. Wakinqa amigonkuwan, compañeronkuwanpas juñunarikuspan maynillan juj chhikanta tomarinku, wakintaq mana ni pisillatapas tomankuchu, wakinñataq yuyayninku chinkanankama tomanku. Ichaqa, ¿imaninmi Biblia trago ujaymanta?

1. ¿Juchachu kanman juj chhikanta ujariy?

Bibliaqa manan juchachanchu juj chhikan tomaytaqa. Aswanmi Diospa qowasqanchis regalokunamanta rimaspa nishan: “Sonqota kusichiq vino”, nispa (Salmos 104:14, 15). Chhaynaqa vinopas Diospa regalonmi. Chaymantapas Bibliapiqa willashanmi imaynas Diosta serviq runakunaqa vinotaqa ujarikuqku chayta (1 Timoteo 5:23).

2. ¿Imaninmi Biblia ujayman qokuqkunata?

Jehová Diosqa cheqnikunmi machaytapas sinchi ujaytapas (Gálatas 5:21). Biblian nin: “Ama askha vinota ujaqkunawanqa juñukuychu”, nispa (Proverbios 23:20). Chhaynaqa, Diosta serviqkunaqa sapallanchispiña kashaspapas jujkunawanña kashaspapas manapunin jayk’aqpas yuyayninchis chinkanankamaqa ima ujanatapas tomananchischu. Nishuta ujaspaqa manan allintachu piensasunman ni rimasunmanpas; onqoyta iman tarisunman. Manachus cuerponchista kamachiyta atinchis chayqa manañan ima ujanatapas tomananchischu.

3. ¿Imaynatan rikuchisunman jujkuna respetasqanchista?

Sapankamantan kanqa tomanqachus manachus chayqa. Pipas juj chhikanta tomarikun chayqa manan chayraykuchu paytaqa malpaq qhawarinanchis. Manataqmi mana tomaqtapas mana munashaqtinqa tomachinachu (Romanos 14:10). Tomasqanchista jujkuna malta qhawarinkuman chayqa, sientesqapas chaywan kankuman chayqa manan tomananchischu (leey Romanos 14:21). Sapankanchismi jujpa allinninta maskhananchis, manataq noqanchispa allinninchistachu (leey 1 Corintios 10:23, 24).

 ASTAWAN YACHASUNCHIS

4. ¿Imaynatan reparawaq ujawaqchus manachus chayta?

¿Imaynatan Jesús qhawarirqan ujayta? Chayta yachanapaq leesun Jesuspa ñaupaq milagro ruwasqanmanta. Leeychis Juan 2:1-11 textota, jinaspa jamuq tapuykunaman jina parlariychis:

• Chaypi leesqanchisman jinaqa, ¿imaynatan Jesús qhawarisqa vino ujayta? ¿Imaynatan pay qhawarin juj chhikan tomaqkunata?

• Jesusqa manataq juchacharqanchu juj chhikan tomariyta chayqa, ¿imaynatan qhawarinchis pipas chhikan tomaqta?

Diosta serviqkuna atinchisña juj chhikan ujayta chaypas manan chayraykuchu comunta tomananchis. Leeychis Proverbios 22:3 textota, jinaspa jamuq tapuykunaman jina parlariychis:

• ¿Allinchu kanman carrota manejanayki kashaqtin tomay?

• ¿Allinchu kanman onqoq kashaspayki tomay?

• ¿Allinchu kanman doctor prohibishaqtin tomay?

• ¿Allinchu kanman ñaupaqpi tomay vicioyoq kashaspa ima tomanatapas malliykuy?

• ¿Allinchu kanman gobierno prohibishaqtin tomay?

• ¿Allinchu kanman machayta saqepuy munaq runawan tomay?

¿Allinchu kanman casarakuypipas, ima juñurikuypipas alcoholniyoq ima tomanatapas serviy? Chayta yachanapaq VIDEOTA qhawaychis.

Leeychis Romanos 13:13; 1 Corintios 10:31, 32 textokunata. Sapanka textota leesqaykichis qhepaman jamuq tapuyman jina parlariychis:

• ¿Imaynatan kay leesqanchis texto yanapasunkiman Jehová Diosta kusichinapaq jina imatapas ruwanaykipaq?

 5. ¿Askhatachu tomanki icha pisillatachu?

Jehová Diosqa manaña prohibinchu juj chhikan ujariyta chaypas cheqnikunmi nishu ujaytaqa, ¿imarayku? Leeychis Oseas 4:11, 18 textota, jinaspa jamuq tapuyman jina parlariychis:

• ¿Iman pasanman juj runa nishuta ujaqtin?

¿Iman yanapawasunman ama nishuta ujananchispaq? Juch’uyaykukuqmi kananchis, chaymantapas allintan reparakunanchis maykamallas tomayta atisunman chayta. Leeychis Proverbios 11:2 textota, jinaspa jamuq tapuyman jina parlariychis:

• ¿Imaraykun manaraq tomashaspa ñaupaqta qhawarinanchis maykamas ujasunchis chayta?

6. Tomay viciomanta ayqekuy

 IMATAN YACHAMURQANCHIS

Jehová Diosmi qowarqanchis vinotapas chhayna juj ujanakunatapas chaykunawan juj chhikanta kusirikunanchispaq, ichaqa payqa cheqnikunmi sinchi ujaytapas machaytapas.

Yuyarisun

• ¿Imaninmi Biblia trago ujaymanta?

• ¿Imapin tarikusunman nishuta ujaspanchis?

• ¿Imaraykun respetananchis juj chhikan ujaqtapas mana ujaqtapas?