1. ¿Imaraykun mana iskayanchischu tukukuy chayamushasqanmanta?

SICHUS 1914 wata pasasqan qhepamanña naceranki chayqa, tukukuy p’unchaykunapiñan tiyashanki (2 Tim. 3:1). Jinaspa rikuranki tukukuy p’unchaykunamanta Jesuspa willasqanta, payqa willaranñan guerrakuna, yarqaykuna, terremotokuna, onqoykuna, mana allin ruwaykuna yapakunanta, Dios serviqkunapas qatikachasqa kanankuta (Mat. 24:3, 7-9, 12; Luc. 21:10-12). Rikullarankitaqchá runakuna imayna kanankumanta Pabloq willasqantapas (qhaway “ Imaynan kay tiempopi runakuna kanku” nisqata). Chaymi mana iskayanchischu Diospa p’unchaynin chayamushasqanmanta.

2. ¿Ima tapuykunamantan kaypi yachasun?

² Askha watañan pasarun 1914 watamantaqa, chaywanmi yachanchis tukukuy p’unchaypa tukuyninpiña kausashasqanchista. Pisi tiempollamantan Diosta mana kasukuqkuna wañuchisqa kanqaku, chaymi kunan kay tapuykunamanta yachasun: ¿Iman pasanqa tukukuy p’unchaykunaq tukuyninpi? ¿Imatan Jehová Dios munan chaykama ruwashananchista?

3. 1 Tesalonicenses 5:1-3 textopi nisqanman jina, ¿imatan nacionkunata kamachiqkuna ninqaku?

³ (Leey 1 Tesalonicenses 5:1-3). Pabloqa rimaranmi “Jehová Diospa p’unchayninmanta”. Chayqa qallarinqa  llapa pantasqa religionkuna contra gobiernokuna phawaykuqtinmi, tukunqataq Armagedón guerrapi (Apo. 16:14, 16; 17:5). Manaraq chay p’unchay qallarishaqtinmi nacionkunata kamachiqkunaqa ninqaku: “Kunanmantaqa thajpin kausasunchis, allin waqaychasqan kasunchispas”, nispa. Kunanpas kamachiqkunaqa chay jinatan rimanku. * Chay willakuymi ichaqa jujniray kanqa. ¿Imarayku? Chay willakuyta uyarispan askha runakuna creenqaku gobiernokuna thaj kausayta apamusqankuta. Ichaqa manan chhaynachu kanqa, aswanpas manchay ñak’ariy tiempo qallarinantan willanqa, ch’usaqyachisqa kanankutawan (Mat. 24:21).

4. a) ¿Imakunatan mana yachanchischu? b) Ichaqa, ¿imatan allinta yachanchis?

⁴ Yachanchismi kamachikuqkuna “kunanmantaqa thajpin kausasunchis, allin waqaychasqan kasunchispas” nispa ninankuta. Ichaqa, ¿iman paykunata tanqanqa chayta ninankupaq? ¿Juj kutillachu ninqaku icha askha kutikunatachu? Manan chaykunataqa yachanchischu. Imaynaña kaqtinpas gobiernokunaqa manan jayk’aqpas thaj kausaytaqa apamunqakuchu, chaymi mana engañawasunchu. Aswanpas chay nisqankuta uyarispan yachasun Jehová Diospa p’unchaynin qallarinanpaqña kashasqanta.

5. ¿Imaynatan 1 Tesalonicenses 5:4-6 texto yanapawanchis Jehová Diospa p’unchayninpaq preparakunanchispaq?

⁵ (Leey 1 Tesalonicenses 5:4-6). Pabloqa niwanchismi Diospa p’unchayninpaq preparakunapaq imachus ruwananchista. Manan jujkuna jinachu puñushananchis aswanpas rijch’asqallan kashananchis. Ejemplopaq, manan mayqen nacionmanpas sayapakunanchischu nitaq politicapi participananchischu. Sichus chaykunata ruwasunman chayqa, kay pacha runakuna jinan kausashasunman (Juan 15:19). Yachasqanchis jina Diospa gobiernollanmi thaj kausaytaqa apamunqa.

6. ¿Imatan ruwananchis runakunata yanapananchispaq? ¿Imaraykun kunan chayta ruwananchis?

⁶ Chaymantapas runakunatan yanapananchis imakunachus pasananta yachanankupaq. Manchay ñak’ariy p’unchay qallariqtinqa manañan tiempo kanqachu Diosta servinankupaq. Chaymi kunan runakunaman Diosmanta willananchis. *

7. ¿Imatan Jehová Dios munan kunan tiempopi ruwananchista?

⁷ Pisi tiempollamantan Diospa p’unchayninqa qallarinqa. Chaymi runakunaman Diosmanta willaspa llank’ashanallanchis. Sapankanchismi tapukunanchis: “¿Tukuy atisqaytachu chay llank’aypi yanapakushani?”, nispa (1 Cor. 15:58). Señorninchis Jesusqa willaranña imachus ruwananchista. Tukukuy p’unchaymanta rimaspan niran: “Ñaupaqtaqa llapa nacionkunamanraqmi allin willakuykuna willasqa kanan”, nispa (Mar. 13:4, 8, 10; Mat. 24:14). Ama qonqasunchu: Runakunaman Diosmanta willaspan chay profecía junt’akusqanpi yanapakushanchis.

8. ¿Imaynapin yachanchis Diospa gobiernonmanta willakuyta askha runakuna uyarishasqankuta?

⁸ Watakunaq pasasqanman jinan askha runakuna Diospa gobiernonmanta allin willakuykunata uyarikushanku. ¿Jayk’a runakunan pachantinpi yapakuran? 1914 watapiqa 5.155 cristianokunan karanku 43 nacionkunapi. Kunanmi ichaqa 8.500.000 cristianokuna jinaña kashanchis 240 nacionkunapi. Llank’ayninchismi ichaqa mana tukunraqchu, chaymi runakunaman willananchis Diospa gobiernollan tukuy llakikuyninchista chinkachinanmanta (Sal. 145:11-13).

9. ¿Imanaqtinmi runakunaman Diospa gobiernonmanta willashanallanchis?

⁹ Jehová Dios “kaykamalla” niwananchiskaman runakunaman willashallasun. ¿Jayk’a tiempotawanraqmi runakunaman qonqa paymanta Jesusmantawan yachanankupaq? (Juan 17:3). Chaytaqa manan yachanchischu. Ichaqa manchay ñak’ariy p’unchay qallarinankaman allin sonqoyoq runakunata yanapashallasun, chhaynapi Diosta servinankupaq (Hech. 13:48). ¿Imaynatan paykunata yanapasunman manaraq tukukuy chayamushaqtin?

10. ¿Ima yanapaykunatan Jehová Dios qowanchis runakunaman yachachinanchispaq?

¹⁰ Jehová Diosqa llaqtanwanmi imachus necesitasqanchista qowanchis runakunaman yachachinanchispaq. Chaupi semana juñunakuypin yachachiwanchis runakunawan imayna rimananchispaq, jujmanta kutispa imata ninanchispaq, estudiantekunaman imaynata yachachinanchispaqpas.  Chaymantapas yachachinapaq herramientakunatan qowanchis. Chaykunan yanapawanchis:

• imayna rimayta qallarinapaq,

• uyariwananchispaq jina rimananchispaq,

• Bibliamanta astawan yachayta munanankupaq,

• cheqaq yachachikuykunata allinta entiendenankupaq

• uyarikuqkunata internetpi paginanchisman invitananchispaq, juñunakuykunaman invitananchispaqpas.

Ichaqa manan chay herramientakunata jap’ispallachu allinta yachachisun, aswanpas yachananchismi chaykunawan imayna yanapachikuyta. * Ejemplopaq, pipas allinta uyarisunki chayqa, saqewaqmi juj revistata otaq juj qelqatapas. Chayta leeshanman juj kutipi visitanaykikama. Sapankanchistaqmi tukuy atisqanchisman jina sapa killa runakunaman Diosmanta willananchis.

11. ¿Imaraykun internetpi Bibliamanta cursota churakun?

¹¹ ¿Imaynatan Jehová Dios runakunata yanapallantaq cheqaq kaqta yachanankupaq? Bibliamanta yachanankupaq internetpi juj cursota * churaspanmi, chayqa tarikun jw.org^® nisqapin. Sapa killan askha runakuna internetman jaykunku Bibliamanta yachanankupaq. Chaymi Bibliamanta juj cursota churasqanchisqa runakunata yanapan cheqaq kaqta yachanankupaq. Wakin runakunaqa manapaschá noqanchiswan Bibliata estudiayta munanqakuchu. Chhayna kaqtinqa nisunmanmi internetpi paginanchispi chay cursoman jaykunankupaq, rimasqanku simipi.

12. ¿Imakunamantan runakuna chay cursopi yachankuman?

¹² Chay cursopin rimashan Bibliamanta, Jehová Diosmanta, Bibliaq willasqan runakunamanta, suyakuyninchismantawan. Chaypi kaq yachachikuykunata estudiaq runaqa kaykunamantan yachanqa:

• ¿Imaynatan Biblia vidanchispi yanapawanchis?

• ¿Pitaq Jehová Diosri, Jesusri, angelkunapas?

• ¿Imaraykun Dios runata ruwaran?

• ¿Imaraykun kan sufrimientopas millay ruwaykunapas?

Chaypin kaykunamanta yachallanqakutaq:

• ¿Imatan Dios ruwanqa wañuyta sasachakuykunatapas chinkachinanpaq?

• ¿Imaynatan wañupuqkunata kausarichinqa?

• ¿Imaynatan gobiernokunaq rantinpi Diospa gobiernon kamachinqa?

13. ¿Bibliamanta yachanankupaq internetpi curso kasqanwanchu manaña runakunaman sapallankupi Bibliamanta yachachinanchis?

¹³ Chay cursopiña runakuna Bibliata estudianqaku chaypas, juj hermanon sapallanpi Bibliamanta yachachinan. Jesusqa noqanchistan kamachiwaranchis runakunata yachachinanchispaqqa. Chay cursoqa Bibliamanta yachay munaqkunatan yanapanqa yachasqankuta valoranankupaq astawan yachayta munanankupaqpas. Yaqapaschá chhaynapi munankuman juj hermanonchis Bibliamanta yachachinanta. Sapanka yachachikuypa tukuyninpin runakunata invitashan juj hermano visitananpaq. Sapa p’unchaymi 230 runakuna internetpi Bibliamanta yachanankupaq mañakunku. Rikusqanchis jina Bibliamanta juj runata yachachiyqa ancha importanten.

14. Mateo 28:19, 20 textopi nisqanman jina, ¿imata ruwananchispaqmi kallpachakunanchis? ¿Imaraykun chayta ruwananchis?

¹⁴ (Leey Mateo 28:19, 20). Runakunatan yanapananchis Jesuspa discipulon kanankupaq, kamachisqanta kasukunankupaq, Jehová Diosta kasukunankupaq gobiernonta apoyanankupaqpas. Chaypaqqa yanapananchismi Bibliamanta yachasqankuman jina kausanankupaq, Jehová Diosman prometekunankupaq, bautizakunankupaq ima. Chhaynapin Diospa jatun p’unchayninpi salvakunqaku (1 Ped. 3:21).

15. ¿Pikunawanmi mana tiemponchista usuchinanchischu? ¿Imarayku?

¹⁵ Yachasqanchis jina pisillañan tiempo kashan millay kausay tukupunanpaq. Sichus Bibliamanta yachachisqanchis runakuna mana munankuchu Jesuspa discipulon kayta chayqa, saqepunanchismi (1 Cor. 9:26). Askha runakunan Diosmanta manaraq yachankuchu, chaymi paykunata maskhananchis Diospa gobiernonmanta willamunanchispaq manaraq manchay ñak’ariy chayamushaqtin.

16. Apocalipsis 18:2, 4, 5, 8, textokunapi nisqanman jina, ¿imatan llapanchispas ruwananchis? (Qhaway willakuyta.)

¹⁶ (Leey Apocalipsis 18:2, 4, 5, 8). Chay textokunapi nisqan jina Jehová Diosqa llapa serviqninkunatan kamachiwanchis jatun Babiloniamanta lloqsipunanchista. Chaymi cheqaq cristianokunaqa llapa pantasqa religionkunamanta t’aqakunanchis. Yaqapaschá pipas manaraq Bibliamanta yachashaspa pantasqa religionpi kaspa ruwayninkunapi participaran otaq qolqetapas qoran. Chaymi hermanokunawan kuska Diosmanta willaq lloqsinanpaqqa religionninmanta t’aqakunan. Yaqapaschá juj cartata apachinan kanqa manaña chay religionman pertenecesqanmanta. *

17. ¿Pikunapaqmi mana llank’ananchischu? ¿Imaraykun chayta decidinchis?

¹⁷ Cheqaq cristianokunaqa manan pantasqa religionkunapaqqa llank’ananchischu (2 Cor. 6:14-17). Manan mayqen religionpipas llank’aqnin kasunmanchu. Juj empresapaqña llank’anchis chaypas mana unay tiempoqa llank’asunmanchu juj iglesiaq wasinpiqa. Sichus empresanchismanta jefe kanchis chayqa, manan ima llank’anatapas pantasqa religionkunapaqqa ruwananchischu. ¿Imaraykun chayta decidinchis? Manan munanchischu pantasqa religionkunaq  juchallikuqmasin kayta. Yachasqanchis jina Jehová Diospaqqa chay religionkunaqa sinchi qhellin kanku (Is. 52:11). *

18. ¿Imatan juj hermano ruwaran juj iglesiapi llank’ananpaq niqtinku?

¹⁸ Juj kutinmi llank’aqkunata contrataq runa juj umalliq hermanonchista niran juj iglesiapi juj ratolla llank’ananpaq. Contrataqnin runaqa yacharanmi hermanonchis mana mayqen iglesiapaqpas llank’asqanta. Chay kutipin ichaqa mana pitapas tariranchu, chaymi munaran yanapananta. Hermanonchismi ichaqa Bibliapi yachasqanta kasukuspa mana chay llank’anata ruwaranchu. Qatimuq semanapin juj periodicopi juj foto lloqsiran, chaypin juj carpintero chay iglesiapi cruzta churasharan. Sichus hermanonchis chay iglesiaman llank’aq rinman karan chayqa paypa fotonchá chay periodicopi lloqsinman karan. ¿Imaynan chayta rikuspa iñiq t’aqapi hermanokuna sientekunkuman karan? ¿Imaynan Jehová Diospas sientekunman karan?

19, 20. a) ¿Imatan kay yachachikuypi yacharanchis? b) ¿Imakunamantan yachanallanchistaq?

¹⁹ Bibliapi willasqanman jina, pisillamantan llapa kamachikuqkuna ninqaku: “Kunanmantaqa thajpin kausasunchis, allin waqaychasqan kasunchis”, nispa. Jehová Diosmi ichaqa sut’ita niwanchis kamachikuqkunaqa mana jayk’aqpas thaj kausay apamunankuta. ¿Imatan ruwashananchis chay p’unchay chayamunankama? Diosmi kamachiwanchis paypa gobiernonmanta willashanallanchispaq, Jesuspa discipulon kanankupaq runakunata yanapananchispaqpas. Jinaspapas llapa pantasqa religionkunamantan t’aqakunanchis. Chaytaqa ruwanchis ruwayninkunapi mana participaspa, chay religionkunapaq mana llank’aspa ima.

²⁰ Imaymanaraqmi kay tukukuy p’unchaykunapi pasanqa. Jehová Diospas niwanchismi imachus ruwananchista. ¿Imakunan pasanqa? ¿Imakunatan Jehová Dios munan ruwananchista? ¿Imaynatan preparakusunman jamuq tiempopaq? Chaykunamantan qatimuq yachachikuypi yachasun.