Cigarro pitay saqeytaqa atiwaqmi

KUNANQA manan pisipanaykichu aswanpas kallpachakunaykin cigarro pitayta saqepunaykipaq (1 Crónicas 28:10). ¿Imakunatawanmi ruwawaq cigarro pitayta saqepunaykipaq?

Anotakuy ima p’unchaymanta qallarinki saqepuyta. Estados Unidosmanta Departamento de Salud y Servicios Humanos nisqanman jinaqa “cigarro pitayta saqepunaykipaq decidikusqaykimantapacha juj fechata churakuy amaña cigarrota llaminaykipaq, chaytaqa ruwanayki manaraq iskay semana pasashaqtinmi, mana chayqa manañan munawaqchu cigarro pitayta saqepuyta. Chay p’unchaytataq almanaquepi anotay, amigoykikunamanpas willay decidikusqaykita. Amataq qhepaman kutiychu imaña pasaqtinpas”.

Juj tarjetata ruwakuy. Chaypi qelqay imakunachus yanapasunkiman chayta, chaymantapas kaykunatawan qelqay.

● Qelqay imaraykun cigarro pitayta saqepuyta munanki chayta

● Qelqay celularninpa numeronta pikunachus yanapasunkikuman cigarro pitayman jujmanta ama urmanaykipaq chayta

● Qelqay kallpachaq simikunata, yaqapaschá Bibliapi kaq kay textokunata jina Gálatas 5:22, 23

Chay tarjetataqa mayman rispaykipas apallaypuni jinaspa p’unchaypi askha kutita leey. Cigarro pitayta saqepurqankiña chaypas leellaypuni sapa cigarrota pitay ganas jap’isuqtiyki.

Ñaupaqmanta preparakuy. Cigarrota pitayta saqepunaykipaq anotakusqayki p’unchay manaraq chayamushaqtin, ima ruwaykunas jujmanta urmachisunkiman chay vicioman chaykunata amaña ruwaychu. Yaqapaschá cigarrota jap’ichiq kanki puñunamanta jatarishaspapacha, kunanqa juj horata jina suyakuy jap’ichinaykipaq. Otaq sichus cigarrota pitaq kanki mijushaspa otaq mijuyta tukuspa chayqa kunanqa amaña chay horaskunapi pitaychu. Amataq riychu maypichus cigarrota pitanku chay lugarkunamanqa. Chaymantapas alto kunkawan sapallaykipi kay simikunata practicay: “Manan munanichu. Manañan cigarrotaqa pitanichu”, nispa. Chaykunan preparasunki jayk’aqmantas manaña cigarrota pitankichu chay anotakusqayki p’unchaypaq, chaymantapas chaykunan yuyarichisunki pisi tiempollamanta manaña cigarro pitaq kanaykita.

Kaykunatawan ruwawaq. Cigarrota manaña pitanaykipaq decidikusqayki p’unchay manaraq chayamushaqtin kaykunata alistakuwaq: Picasqa zanahoriakunata, chiclekunata, pasaskunata, manikunata, juj rurukunatawan khamunaykipaq. Chaymantapas familiaykiman amigoykikunamanwan yuyarichiy ima p’unchaymanta cigarrota saqepunaykipaq anotakusqaykita, imaynata yanapasunkikuman chayta ima. Chay p’unchay manaraq chayamushaqtin wijch’upuy cigarrokunata wasiykimanta, carroykimanta, bolsilloykikunamanta, llank’anaykipi kaq cigarrokunata ima. Chaymantapas wijch’upuy cigarroq usphanta churanapaq kaqkunata, cigarrota jap’ichinapaq kaqkunata, ima cosaskunachus cigarrota pitayman urmachisunkiman chaykunatapas. Wasipi mana ima cigarropas kaqtinqa aswan sasan rantiq riyqa otaq juj amigomanta mañakuyqa. Chaymantapas Diosmanta mañakushallay, cigarro pitayta saqepusqaykimantapacha masta mañakuy (Lucas 11:13).

Askha runakunan cigarrota juj amigota jina qhawarirqanku kunanmi ichaqa manaña amigontinñachu cigarrowan kapunku, mana allin amigo kasqanrayku. Qanpas librakapuwaqmi cigarromanta jinaspa manaña cigarroq esclavon jinachu kawaq. Saludniykipipas allinmi kawaq.

[Foto]

Chay tarjetata mayman rispaykipas apallaypuni jinaspa p’unchaypi askha kutita leey