¿IMA NINMI BIBLIA?
Razakuna cheqnikuymanta
¿Maymantan paqarimurqan razakuna?
“Qhariqa warmintan suticharqan Evata, payqa llapa kawsaqkunaq maman kasqanrayku” (Génesis 3:20)
¿IMA NINKUN YACHAQKUNA?
Organización de las Naciones Unidas para la Educación, la Ciencia y la Cultura (UNESCO) nisqanman hinaqa “llapa runakunan kaqlla kanku, maymanta paqarimusqankupas kaqllan” (Declaración sobre la Raza y los Prejuicios Raciales, de 1978).
¿IMA NINMI BIBLIA?
Diosmi kamarqan Adantawan Evatawan, paykunatan kamachirqan: “Askhata miraychis, kay pachamanpas hunt’aykuychis, chaypi munayniyoq kaychis”, nispa (Génesis 1:28). Chhaynaqa Adanwan Evawanmi llapa runakunaq tayta-maman kanku. Askha watakuna qhepamanmi huk sinchi para yaqa llapa runakunata wañuchipurqan, pusaq runakunallan mana wañurqankuchu: Noé, esposan, kinsa wawankuna esposankunantin. Llapanchismi Noepa wawankunamanta hamunchis, chaytan Biblia yachachin (Génesis 9:18, 19).
¿Kanchu hukkunamanta aswan allin razakuna?
“[Diosqa] ch’ulla runallamantan lliw runakunatapas mirachirqan kay pachantinpi tiyanankupaq” (Hechos 17:26)
¿IMATAN NINKU WAKIN RUNAKUNA?
1900 watakunapin askha t’aqa runakuna piensarqanku razanku aswan allin kasqanta. Hukninmi karqan Nazi nisqa t’aqa, paykunan nirqanku imayna kasqankurayku aswan allin raza kasqankuta. UNESCO nisqanman hinan ichaqa llapa razakunaqa kaqlla kanku, maymanta paqarimusqanku kaqlla kasqanrayku.
¿IMA NINMI BIBLIA?
Hechos 10:34, 35 texton nin: “Diosqa manan mayqen runatapas rikch’ayninta qhawaspachu akllan, aswanpas may suyupipas payta yupaychaspa chanin-kayta ruwaqtaqa chaskinmi”, nispa. Chaypi nisqanman hinaqa manan aswan allin razakunaqa kanchu.
Jesusmi nirqan: “Llapaykichismi wawqellantin kankichis”, nispa (Mateo 23:8). Cristianokunaqa chay nisqanman hinan kawsanku. Jesusmi Taytanta nirqan qatikuqninkuna ‘hukllapuni kanankupaq’, chaywanmi nisharqan hukkunata mana pisichaspa huk-nisqalla kanankupaq (Juan 17:20-23; 1 Corintios 1:10).
¿Hayk’aqllapas llapa runakuna munanakunqakuchu?
“Hamuq p’unchaykunapin Señor Diospa wasin orqo aswan hatunkaray kanqa [...]. Llapa suyu runakunan chayman qhochurikamunqaku” (Isaías 2:2)
¿IMATAN NINKU WAKIN RUNAKUNA?
Askha runakunan huk nacionniyoq runakunata cheqnikunku, chayrayku askha runakuna ninku chayta chinkachinapaq kallpachakusqanchisqa yanqa kasqanta. Wakinqa ninkun “manan hayk’aqpas chayqa chinkanqachu” nispa.
¿IMA NINMI BIBLIA?
Jehová Diosqa manan chaykunataqa hinallatachu qhawanqa. Aswanpas Gobiernon kamachimuqtinqa, “llapa suyukunamanta, ayllukunamanta, llaqtakunamanta, tukuy rimaykunamantawan” kaq runakunan huk-nisqalla payta servinqaku, munanakusqankutapas rikuchinqaku (Apocalipsis 7:9). Diospa Reinonqa manan sonqonchis ukhupichu kashan, aswanpas chayqa huk cheqaq gobiernon. Diosmi munarqan kay pachapi llapa runakuna huk-nisqalla kawsanankuta, chaytan chay gobierno hunt’anqa. *
^ párr. 15 Astawan yachayta munanki chayqa, leey ¿Imatapunin Biblia yachachin? nisqa libropi 3 capitulota, chaytaqa Jehová Diospa testigonkunan ruwanku. Internetpipas tariwaqmi www.dan124.com/quz nisqapi.
