“[Diospa profetan] Danielqa puñushaspa mosqokurqan [...]. Rikch’arispataq mosqokusqankunata qelqarqan” (Daniel 7:1)

¿IMA NINMI BIBLIA?

Diosqa runakunamanqa willaqmi importante willakuykunata. Ñawpa tiempopiqa mosqoykunapin mayninpi chayta willaq. Ichaqa chay mosqoykunaqa manan puñuspa mosqokusqanchispi hina mana entiendenachu karqan. Diosmanta hamuq mosqoykunaqa entiendekuqmi, sut’itan reparakuq imatachus Diospa willasqan. Danielqa huk mosqoypin rikurqan manchakunapaq animalkunata, chaykunaqa atiyniyoq gobiernokunawanmi tuparqan (Daniel 7:1-3, 17). Diosqa huk mosqoypin Joseman willarqan familianpiwan Egiptoman ayqekunanpaq. Chhaynapin Jesusqa mana wañuchisqachu karqan rey Herodeswan. Chay rey wañupusqan qhepamanmi Diosqa huk mosqoypi Joseman willallarqantaq llaqtanman kutipunanpaq (Mateo 2:13-15, 19-23).

“Diospa Simin Qelqaq nisqanmantaqa manan astawan yuyaykunaykichischu” (1 Corintios 4:6)

¿IMA NINMI BIBLIA?

Diosqa manan mosqoykunallapichu runakunaman willarqan, hukniraykunamantapas willarqanmi. Chaykunamantan 2 Timoteo 3:16, 17 texto nin: “Diospa Simin Qelqakunaqa llapallanmi Diospa yuyaychasqan, chayraykun allinpuni yachachinapaq, anyanapaq, wanachinapaq, chanin kawsayta yachachinapaq. Ahinapin Dios sonqo runaqa allin yachachisqa kanqa, tukuy allin kaqkunata ruwananpaqpas allin-allin wakichisqa”, nispa.

¿Imakunatan Biblia allin-allinta willawanchis? Willawanchismi Diosmanta yachay munasqanchiskunata, kamachikuyninkunata, kay pachapaq imatachus ruway munasqantapas. Chayraykun kunanqa manaña mosqoykunawanchu willawanchis. Kunanqa Bibliapin tarikun hamuq tiempomanta willakuykuna Diospa munayninkunapas.

“Paykunaqa Santo Espirituq yuyaychasqan kaspan Diosmanta rimarqanku” (2 Pedro 1:21)

¿IMA NINMI BIBLIA?

Bibliapi tarikuq mosqoykunapas rikhuriykunapas yaqa llapanmi profeciakuna karqan, chaykunaqa imachus sucedenan kaqkunatan willarqan. Chay profeciakunaq kasqanwanmi sut’ita yachasunman Bibliata qelqaqkuna sut’itachus willarqanku icha manachus chayta. ¿Hunt’akurqanchu chay profeciakuna? Chaypaq t’aqwisun Daniel 8:1-7 textota, chaypin willashan manaraq Babilonia atipasqa kashaqtin Danielpa rikhuriypi rikusqankuna.

Danielmi rikurqan huk orqo cabra huk anejota atipasqanta. Danielqa manan watunanchu karqan chaytaqa, Diospa huk angelninmi sut’incharqan, nirqanmi: “Iskay waqrayoq anejo rikusqaykiqa Media suyu Persia suyu reykunan. Orqo cabraqa Grecia suyu reymi”, nispa (Daniel 8:20, 21). Runakunaqa sut’itan yachanku Babilonia atipasqa kasqan qhepaman Medopersia atiyniyoq kapusqanta. 200 watakuna hina qhepamanmi Medopersia suyuta Grecia suyu atiparqan, Alejandro Magno runataqmi chaypi umallirqan. Danielpa rikusqan k’apakta hunt’akusqanmi reparachiwanchis Bibliapi profeciakuna confianapaqpuni kasqanta. Chaywanmi yachanchis huk librokunamanta aswan allin kasqanta.