Chay revistapi yachasqanchis jina llapanchismi runakunapas angelkunapas rikuchinanchis kashan, Diospa sutinta ch’uyanchasunchus manachus chayta. Jehová Diosllachus gobernante kanan icha manachus chaypas chaywanmi tupashan. Runakuna Dios sonqochus kasun manachus chaypas chaywanmi tupashallantaq.

¿Ichaqa imaraykutaq nisunman “Diospa sutin ch’uyanchasqa kananmi imamantapas aswan importante” nispa? Chaypaq kinsa razonmanta yachasunchis.

Ñaupaq kaq, Edén huertapiqa, Diospa sutinmanta otaq imayna Dioschus kasqanmantan Satanasqa mana allinta rimarqan. Evata imaynatachus tapusqanpin Diostaqa rikuchisharqan maqllata jina, imatapas jark’akuqta jina. Chaymantapas Diospa imachus nisqan contrapin rimarqan, chhaynapin paytaqa rikuchisharqan llullata jina. Chhayna mana kaqta rimaspaqa Diospa sutintan mana allinta rikuchisharqan, chayraykun paytaqa nikun “Saqra” nispa, chayqa “yanqa tumpaq” ninantan nin (Juan 8:44). Kay tiempopipas Satanasqa jatarishallanmi Diospa contranpi (Gén. 3:1-6). Imaymana cuentotan rijurichin chhaynapi Diosta mana allinta qhawarichinanpaq. Chay cuentokunata creeqkunaqa manañan Diostaqa kasukuyta munankuñachu. ¿Imaynan Dios sonqo runakuna tarikunkuman Diospa sutin contrapi yanqa rimaykunata uyarispa? May llakisqan. Chay yanqa rimaykunaq kasqanwanmi mana allin kausaypas astawanraq yapakushan.

Iskay kaq, Jehová Diosqa llapa kamasqankunaraykun jujmanta sutinta altoman churanqa ch’uyanchanqa ima. Chaytaqa ruwanqapunin payqa, pay kikinmi nirqan: “Jatun sutiytaqa ch’uyanchasaqpunin”, nispa (Ezeq. 36:23). Jesuspas mañakuyta yachachishaspan nirqan: “Sutiyki ch’uyapaq jap’isqa kachun”, nispa; chhaynata nispan rikuchisharqan ima ruwakunanpaqsi masta mañakunanchis chayta (Mat. 6:9). Bibliapiqa askha kutitan rimashan Diospa sutinta jatunchaymanta. Chaykunamanta wakinta qhawarisun: “Jehová Diospa sutinta jatunchaychis” (1 Crón. 16:29; Sal. 96:8). “Jatun sutinman jatunchay takikunata takiychis” (Sal. 66:2). “Sutiykitapas wiñay wiñaypaqmi jatunchasaq” (Sal. 86:12). Chaymantapas juj kutinmi Jesusqa Jerusalén templopi kashaspa, Jehová Dios cielomanta rimaykamuqtin nirqan: “Sutiykita jatunchay”, nispa. Jehová Diostaq nimurqan: “Jatunchaniñan, wajmantataqmi jatunchasaqpas”, nispa (Juan 12:28). a

Kinsa kaq, Jehová Diosqa sutin wiñaypaq jatunchasqalla kanantan munan. Cristo waranqa wata gobiernayta tukusqan qhepaman Jehová Diospa sutinmanta imachus kanqa, chaypi piensasun. ¿Ima ninqakun chay tiempopi runakuna angelkunapas Diospa sutin ch’uyanchaymanta? Chaypaq yuyarisun qallariypi rimamusqanchista. Atinkumanchus runakuna Diospaq junt’aq sonqo kayta icha manachus, Diosllachus kamachikunanpaq  derechoyoq icha manachus chaykunamanta rimamusqanchista. Chay tiempopiqa manañan pipas pruebaman churanqachu runakuna atinkumanchus Diospaq junt’aq sonqo kayta icha manachus chayta, ¿imarayku? Llapa runakunan ch’uya kapunqaku, pasanqakuñan último pruebatapas. Chaymanta pachaqa wiñay-wiñaypaqmi kausapunqaku. ¿Imataq kanqa Jehová Diosllachus allin gobernante icha manachus chaymantari? Chaypas sut’inchasqañan kapunqa, manañan imatapas chaymantaqa rimakunan kanqañachu. ¿Imarayku? Allintan yachakunqa imaynas Jehová Diospa gobiernollan allin chayta. Runakunapas angelkunapas gustowanmi chay gobiernoman k’umuykunqaku. Diospa sutinmantarí, ¿imataq kanqa?

Chay tiempopaqqa paypa sutinqa ch’uyanchasqañan kapunqa, manañan pipas chay sutitaqa qhellichanqañachu. Diospa sutin Jehová sutiqa llapa serviqninkunapaqmi ancha jatun kanqa. ¿Imarayku? Jehová Diosqa ruwashallanqan imaymana admirana ruwaykunata. Bibliapi willasqan jina, Jesusqa kaqtan Jehová Diosman kutichipunqa gobiernonta, chhaynapin Dioslla “lliupa kamachiqnin kanqa” (1 Cor. 15:28). Chaymantataq kay pachapi tiyaqkunaqa “Diospa wawankuna jina libre kapunqaku” (Rom. 8:21). Chhaynapin Jehová Diospa munayninqa llapan junt’akapunqa, janaq pachapi wawankuna kay pachapi wawankunapiwanmi juj familialla kapunqaku (Efes. 1:10).

Llapa chaykuna qhepamanrí, ¿imatataq Diospa familian ruwanqa? Llapankun janaq pachapipas kay pachapipas Diospa sutin Jehová sutita jatunchanqaku, chay ruwayqa nina jinaraqmi sonqonkupi raurarinqa. Salmos librota qelqaq runan nirqan: “Jatunchasqa kachun Israelpa Diosnin Jehová Diosqa […]. Jatun sutinpas wiñay-wiñaypaq jatunchasqa kachun”, nispa (Sal. 72:18, 19). Tukuy kausasqanchis tiempon imaymanata tarisun, chhaynapin Jehová Diosta jatunchasun.

Diospa sutin Jehová sutiqa imaynapunichus pay chaytan sut’ita rikuchin. Paypa sutinpi piensaspaqa, munakuq kasqanpin piensallanchistaq ¿riki? (1 Juan 4:8). Sapa kutillanmi yuyarisun imaynas Jehová Diosqa munakuq kayninpi kamawarqanchis chayta, imaynas munakuq kayninpi wawanta kachamurqan, gobiernontapas apamurqan chayta. Allintan rikusun imaynas payqa munakuq kayninpi imaymana bendicionta qowanchis chaytapas. Chaymantapas wiñaypaq kausaspanchisqa imaymanatan tarisun kamaqninchis Diosman astawan jujllachakunanchispaq, tukuy sonqowan jatunchay takikunata takinanchispaqpas (Sal. 73:28).