1, 2. ¿Imatan ruwana manaraq bautizakushaspa?

 KAY pisqa watakunapin juj millón más runakunaña bautizakushanku Testigo jina. Paykunamanta wakinqa Timoteo jinan wawachankumantapacha Diosta reqsirqanku (2 Tim. 3:​14, 15). Wakintaq kuraq kaspankuña reqsirqanku, wakinqa aswan kuraqñan reqsirqanku. Qaynallan Biblia estudiaq juj kuraq señorapas 97 watanpi bautizakurqan.

² Yaqapaschá personaykiqa chayraq Bibliata estudiashanki. Waynallaraq sipasllaraq kanki chayqa, papaykipas mamitaykipas Testigo kanku chayqa yaqapaschá paykuna Bibliamanta yachachisunkiku. Imaynaña chaypas yaqapaschá bautizakuyta munashanki. ¡Chayqa ancha allinpunin! Ichaqa manaraq bautizakushaspaqa Jehová Diosmanmi entregakunayki. ¿Imaynataq chayri? Chaytan kaypi yachasunchis. Yachallasuntaqmi imaraykus mana manchakunaykichu Diosman entregakuyta bautizakuytapas chayta, jinallataq ñachus listoña kashanki icha manaraqchu chaytapas.

¿IMAN JEHOVÁ DIOSMAN ENTREGAKUY?

3. Bibliaq willasqanman jina, ¿pikunan Diosman entregasqa karqanku?

³ Bibliaq nisqanman jinaqa, Diosman entregakuq runaqa, Diospa munayninta ruwananpaqmi t’aqasqa kashan. Ñaupa tiempo Israel llaqtapas Diosman entregasqan karqan. Chaywanpas chay llaqtapi wakin Israel runakunaqa jujniraymantan Diosman entregasqa karqanku. Paykunamanta jujninmi kashan Aarón, paytaqa Dios kikinmi ajllarqan uma sacerdote kananpaq. Chaymi uma k’uyunanpi juj llaflla qori tablillata aparqan. Chaymi karqan, “Diospaq t’aqasqa kasqanmanta señal” (Lev. 8:9). Nazareo nisqa runakunapas jujniraymantan  Jehová Diosman entregakuqku. Nazareo nisqa simiqa “t’aqasqa” “qosqa” “sapaqchasqa” ninantan nin. Moisespa chaskisqan leyman jinaqa chay runakunaqa imaymana kamachikuykunatan junt’ananku karqan (Núm. 6:​2-8).

4. a) ¿Iman Jehová Diosman entregakuy? b) ¿Iman noqanchis kikinchista negakuy? (Qhaway kay parrafopaq dibujota).

⁴ Noqanchispaqri, ¿imataq Diosman entregakuyri? Pipas Diosman entregakuqqa, Jesusta qatikunanpaq Diospa munayninta ñaupaqman churananpaq iman promesata ruwashan. Pipas chayta ruwaqqa Jesuspa nisqantan kasukunan, paymi nirqan: “Pipas qhepayta jamuyta munaqqa pay kikinta negakuchun” nispa (Mat. 16:24). Chaypi nisqan jina, pipas Jesusta qatikuqqa “pay kikintan negakunan”, cuerponpa imachus munasqantan “manan” ninan. Jehová Diosman entregakunki chayqa, imachá payman mana gustanchu chaykunatan “mana” ninayki (2 Cor. 5:​14, 15). Chaykunamanta wakinmi kanman “aychaq munasqan millay ruwaykuna”, llapa qhelli ruwaykuna (Gál. 5:​19-21; 1 Cor. 6:18). ¿Sasachu kanman chayta ruway? Manan. Sichus tukuy sonqo Jehová Diosta munakunki, allintataq reparanki kamachikuyninkunaqa qanpa allinniykipaq kasqanta chayqa, faciltan paytaqa kasukunki (Sal. 119:97; Isa. 48:​17, 18). Nicolás sutiyoq hermanon nin: “Qanmantan imapas kanqa. Diospa kamachikuyninkunata cárcel rejakunata jina, libre kanaykita jark’aq rejakunata jina rikuyta munanki chayqa, chhaynan kanqa. Sinchi manchakuy leonmanta jark’asuqniyki rejata jinachus rikuyta munanki chayqa, chhaynan kanqa”, nispa.

5. a) ¿Imaynatan pipas Jehová Diosman entregakunman? b) ¿Imaynapin jujniray Diosman entregakuy, bautizakuywan? (Qhaway kay parrafopaq fotokunata).

⁵ ¿Imaynatan pipas Jehová Diosman entregakunman? Paymi sapallanpi Jehová Dioswan parlan, chaypin juj promesata ruwan payllata adorananpaq, paypa munayninta imamantapas ñaupaqman churananpaq. Jujpiqa nisunman, chaypin promesata ruwan Jehová Diosllata tukuy sonqonwan, tukuy  almanwan, tukuy yuyayninwan, tukuy kallpanpiwan munakunanpaq (Mar. 12:30). Jehová Diosman entregakunki chayqa, manan jujraqchu chaypiqa yanapanasuyki; chaypiqa qanmi sapallaykipi paywan rimanakunayki. Bautizakunaykin ichaqa lliupa rikusqan, chhaynapin paykunaqa yachanqaku qanqa Jehová Diosman entregasqa runa kasqaykita. Jehová Diosman entregakuyqa payman ima promesatapas ruwayqa manan común ruwaychu. Chaytaqa junt’aytapunichá munanki. Jehová Diospas chaytan munan (Ecl. 5:​4, 5).

¿IMAN TANQASUNKI JEHOVÁ DIOSMAN ENTREGAKUNAYKIPAQ?

6. ¿Iman pitapas yanapanman Jehová Diosman entregakunanpaq?

⁶ Jehová Diosman entregakunapaqqa paytan munakuna. Chay munakuyqa manan yanqa munakuyllachu ni juj ratullapaqchu. Bibliata estudiasqaykiman jinachá paypa munayninmanta “allinta yacharqanki” chhaynapitaq Jehová Diostaqa pisi-pisimanta astawan munakurqanki (Col. 1:9). Estudiasqaykiman jinachá, allinta yacharqanki 1) Jehová Diosqa cheqaq Dios kasqanta, 2) Bibliaqa espiritunwan ruwasqa kasqanta, 3) kay pachapi llaqtan kasqanta, chay llaqtanwan munaynin ruwachisqantapas.

7. Pipas Jehová Diosman entregakuyta munashan chayqa, ¿imatan ruwanan?

⁷ Pipas Jehová Diosman entregakuqqa allintan yachanan Bibliapi wakin yachachikuykunallatapas; kasukushananmi Diospa kamachikuyninkunata, atisqanman jinan jujkunaman willashanan Diospa simintapas (Mat. 28:​19, 20). Chaymantapas, tukuy sonqon Jehová Diostaqa munakunan payllatan yupaychanan. ¿Ima niwaqmi qanmanta?  ¿Ñachu chayta ruwashankiña? Sichus Jehová Diosta tukuy sonqo munakunki chayqa, manan Bibliamanta yachachiqniykita kusichinaykiraykullachu bautizakunki. Waynachus sipaschus kanki chayqa, manan paypaykita mamitaykita kusichinaykiraykullachu chaytaqa ruwanki, nitaqmi amigoykikunaq bautizakusqanraykullachu qanpas “bautizakusaq” ninki.

8. ¿Imaraykun nisunman “agradecido kasun chayqa entregakusunmi Jehová Diosman” nispa? (Salmos 116:​12-14).

⁸ ¿Imakunatan Jehová Dios qanpaq ruwarqan? Chaykunapi piensay, chaymi tanqasunki qanllamanta payman entregakunaykipaq (leey Salmos 116:​12-14). Bibliapin willashan “imaynas tukuy allin kaqkunapas, tukuy junt’asqa kaqkunapas” Jehová Diosmanta jamun chayta (Sant. 1:17). Jehová Diospa ima regalonmantapas aswan jatun regaloqa kashan wawan Jesusta noqanchisrayku wañunanpaq kachamusqanmi. Chayta ruwasqanraykun llapanchispas atisunman paypa amigon kayta wiñaypaq kausaytapas (1 Juan 4:​9, 10, 19). Chaykunatataq Jehová Dios ruwarqan chayqa, ¿imatan qan ruwawaq payta munakusqaykita rikuchinaykipaq? Vidaykitan payman entreganayki (Deut. 16:17; 2 Cor. 5:15). Chaymantan rimashan Kusisqa Kausay nisqa libropi, 46 yachachikuypi, tawa kaq puntopi, chaypin kashan ¿Imatan Diosman qosunman? nisqa videopas.

¿LISTOCHU KASHANKI DIOSMAN ENTREGAKUSPA BAUTIZAKUNAYKIPAQ?

9. ¿Imaraykun mana pipas obligasqa jinachu qhawarikunan Diosman entregakunanpaq?

⁹ Yaqapaschá nishanki “manaraqmi listochu kashani bautizakunaypaqqa” nispa. Imaymanakunapiraqpaschá cambianayki kashan, astawanpaschá tiempochata necesitashanki Diospi astawan iñinaykipaq (Col. 2:​6, 7). Chaymantapas manan llapa Biblia estudiaqchu igualta ñauparinchis. Waynakunapas sipaskunapas manan llapankuchu igualta iñiyninkupi wiñanku. Chhaynaqa allinta qhawarikuy imaynas kashanki chayta, ichaqa amapunin jujkunawanqa igualakunkichu (Gál. 6:​4, 5).

10. Manaraq bautizakunaykipaq jinachu qhawarikushanki chayqa, ¿imatan ruwawaq? (Qhaway “ ¿Testigochu kanku papaykipas mamitaykipas?” nisqa willakuyta).

¹⁰ Imapas razón kashan Jehová Diosman manaraq entregakunaykipaq chayqa, kallpachakushallay chayta ruwanaykipaq. Paypa yanapayninta mañakuy imapichá cambianayki kashan chayta cambianaykipaq (Filip. 2:13; 3:16). Diosqa uyarimusunkin mañakusqaykitaqa yanapasunkitaqmi (1 Juan 5:14).

¿IMARAYKUN WAKIN MANA MUNANKUCHU DIOSMAN ENTREGAKUYTA?

11. ¿Imaraykun nisunman “Jehová Diosqa yanapawasunpunin pay sonqolla kananchispaq” nispa?

¹¹ Wakinqa listoñan kashanku Diosman entregakuspa bautizakunankupaq, ichaqa manan chayta ruwankuchu. ¿Imaraykun manchakushankuman chay ruwayta? Wakinqa “juchapakuymanpas jinaspa qarqosqa kayman” nispan ninku. Bibliaq nisqanman jinaqa Jehová Diosqa llapa kamachinkunatan yanapanqa paypaq jina kausanankupaq “tukuy allin kaqkunata” ruwanankupaqpas (Col. 1:10). Chhaynaqa chayraykuchus manchakushanki bautizakuyta chayqa, ama kayta qonqaychu Jehová Diosqa yanapasunkipunin allin kaqta ruwanaykipaq. Payqa waranqa-waranqanpi runakunatañan yanapashan (1 Cor. 10:13). Chaymantapas Diospa llaqtanmantaqa manan nishuchu qarqosqa kanku. Jehová Diospa yanapayninwanqa atinkipunin pay sonqolla kayta.

12. ¿Iman yanapawasun ama ima jatun juchamanpas urmananchispaq?

 ¹² Arí, llapanchispas juchasapa runakunan kanchis. Imaymana mana allinmantaqmi cuerponchisqa apayta munawasunman (Sant. 1:14). Ichaqa, ima tentacionpipas tarikunki chayqa, qanmantan kanqa chayta ruwankichus manachus chayqa, sapankamantapunin imatapas ruwanqachus manachus chayqa. Ichaqa yaqapaschá pipas ninman “manan cuerponchistaqa dominayta atisunmanchu” nispa. Chayqa manan cheqaqchu. Lliupas atillasunmanmi imachus piensasqanchista, ruwasqanchistapas dominaytaqa. Chaypaqqa imaymana yanapaykunan kashan. Sapa p’unchaymi Jehová Diosmanta yanapayninta mañakuna, mana faltayta estudiana paypa simintapas, mana faltaytataqmi rina juñunakuymanpas, Diospa siminta willaqpas. Chaykunatachus ruwasun chayqa, kanqan kallpanchis Diosman promesa ruwasqanchista junt’ananchispaq. Amapunin qonqankichu: Manan sapallanchischu kashanchis kay ñanpiqa, Jehová Diosmi noqanchiswan rishan (Gál. 5:16).

13. ¿Imaraykun nisunman “Joseqa allin ejemplon” nispa?

¹³ Ñaupaqtan piensananchis ima tentacionpipas tarikuspa imatas ruwasun chaypi, chayta ruwasun chayqa facilmi kanqa Diospaq jina kausayqa. Bibliapiqa willashanmi chayta ruwaq runakunamanta, paykunamanta jujninmi kashan José. Paytaqa Potifarpa warminmi sapa kutilla nirqan paywan kuska puñunanpaq. Ichaqa Joseqa yacharqanñan imatachus ruwanqa chayta. Bibliaq willasqan jina payqa “manan munaqchu”, chaymantapas “¿imaynapitaq noqari chhayna sinchi mana allinta ruwaspa Dios contra juchallikuyman?” nispan niq (Gén. 39:​8-10). Chaypin kayta sut’ita reparakun: Joseqa manaraq tentasqa kashaspan yacharqanña imatachus ninqa chayta. Chhaynapin tentasqa kasqan ratuqa, mana faciltachu chayman urmaq.

14. ¿Imatan ruwasunman Jehová Diospa cheqnisqankunata ama ruwananchispaq?

¹⁴ ¿Imaynatan qatipasunman Josepa ejemplonta? Kunanmantapachan piensananchis, imatas ruwasunman tentacionpi tarikuspanchis chaypi. Yachananchismi Diospa cheqnisqankuna cheqnikuyta. Manan piensananchisraqchu chaykunamanta karunchakunanchispaqqa (Sal. 97:10; 119:165). Chayta ruwasun chayqa manan ima jatun juchamanpas urmasunchu. Chaymantapas ima tentacionpas chayamuwasun chayqa, allintañan yachasun imachus ruwananchista, ch’uyañan chayqa yuyayninchispi kanqa.

15. ¿Imaynatan rikuchiwaq Diosta tukuy sonqowan maskhaq runa kasqaykita? (Hebreos 11:6).

¹⁵ Yaqapaschá allinta reparanki imaynas Diospa cheqaq llaqtanpi kashanki chayta.  Diostapas tukuy sonqopaschá serviyta munashanki. Ichaqa imapaschá jark’ashasunki Diosman entregakunaykita bautizakunaykitapas. Chhaynapi tarikushanki chayqa David jina Jehová Diosta niy: “Diosnilláy, allinta t’aqwiriway, sonqoytapas allinta qhawaykuy. Sonqoyta t’aqwiriway, qhawaykuy imakunatachus yuyaykushan chayta. Allinta qhawariway. Mana allin ñanmanpaschá jaykushani. Mana tukukuq wiñay ñanninta pusaway”, nispa (Sal. 139:​23, 24). Kallpachakunkichus Diosman entregakunaykipaq bautizakunaykipaqpas chayqa, Diosta tukuy sonqo maskhasqaykitan rikuchinki. Bibliaq willasqanman jinaqa Diosqa bendecinmi chayta ruwaqkunataqa (leey Hebreos 11:6).

QAYLLAYKUSHALLAY JEHOVÁ DIOSMANQA

16, 17. ¿Imaynatan Jehová Dios llaqtanman pusamun Testigokunaq wawankunata? (Juan 6:44).

¹⁶ Jesuspa nisqan jina, Jehová Diosmi pitapas llaqtanmanqa pusamun (leey Juan 6:44). ¡May munaymi chayqa ¿riki?! ¿Jayk’aqllapas chay simikunapi piensarqankichu? Jehová Diosqa sapanka runaq sonqontan qhawarin, jinaspa ima allintapas tarispa llaqtanman pusamun. Paypaqqa sapanka kamachinpas paypa kaqninmi, ancha munakusqan runan (Deut. 7:6). Qanpas paypa kaqninmi kanki.

¹⁷ Qan wayna qanpas sipas, ¿papaykichu mamitaykichu yachachishasunki Jehová Diosmanta? Chhayna chayqa yaqapaschá nishanki “paykuna Diospa llaqtanpi kallaqtinmi noqapas chaypi kashani” nispa. Ichaqa Bibliapin khaynata nin: “Diosman asuykuychis, jinan paypas asuykamusunkichis”, nispa (Sant. 4:8; 1 Crón. 28:9). Chaypi nisqan jina, sichus qan Diosman asuykunki chayqa paypas asuykamusunkin. Jehová Diosqa manan juj montonpi runakunata jinachu rikusunki. Llaqtanpi kaqkunataqa paymi sapankankuta ch’ulla-ch’ullamanta pusamurqan. Chhaynatan pusamun Testigonkunaq wawankunatapas. Santiago 4:8 textopi nisqan jina pipas Diosman qayllaykun chayqa, paypas chay runamanmi qayllaykullantaq (tupanachiy 2 Tesalonicenses 2:13 textowan).

18. ¿Imamantan qatiq yachachikuypi yachasunchis? (Salmos 40:8).

¹⁸ Jesusqa bautizakuspaqa Diosmanmi qayllaykurqan llapa imachus kamachisqanta ruwananpaq (leey Salmos 40:8; Heb. 10:7). Sichus qanpas Diosman entregakuspa bautizakunki chayqa, Jesuspa ruwasqantan ruwanki. Qatiq yachachikuypin yachasun imaynatas bautizakusqanchis qhepamanpas tukuy sonqowan Diosta servisunman chaymanta.