¿Seguropunichu kashanchis Dios tukuy promesankunata cumplinanmanta? Jesuspas seguron kasharan, chaymanta yachachispan uyariqninkunata kallpacharan iñiyninkupi. Orqo patapi juj comparacionwan yachachisqanpi piensay, chayqa kashan Mateo 5:18 textopin, nin: “Cheqaqtan niykichis: Cielopas kay pachapas tukukapunmanmi, kamachikuy simimantan ichaqa manapuni juj letrachallapas ni juj letraq imachallanpas tukukunqachu llapan junt’akunankama”, nispa.

Hebreo simipi aswan juch’uy letraqa rijurin khaynan: י (yod), Tetragrámaton nisqapi primera letra, Diospa ch’uya sutin, Jehová nisqapi. * Escribakunapas fariseokunapas nishu importantepaqmi qhawariqku, manan palabrakunallatachu nitaq Diospa kamachikuy qosqanpi letrakunallatachu, ‘juj letraq imachallantapas’ qhawaqku.

Jesusqa nishanman karan cielopas kay pachapas tukukapunmanmi nispaqa, Diospa nisqan simikuna llapallanpuni cumplikunanmantan. Biblian ichaqa cielopas kay pachapas wiñaypaq kanqa nishan (Salmos 78:69). Jesuspa nisqanwanqa allintan entiendechiwanchis Diospa nisqan simikunaqa llapachallanpuni cumplikunanta.

Jehová Diospaqqa importanten imapas. Chaypaq pascua fiestapaq nak’asqanku corderomanta yachasun. Chay Corderoq tulluntaqa manan jujtapas p’akinankuchu karan, chaytan Dios israelitakunaman kamachiran (Éxodo 12:46). Chayqa manapaschá importantechu kanman karan. Israelitakunapas manapaschá entienderankuchu imapaqchus Dios chay kamachisqanta. Jehová Diospaqmi ichaqa nishu importante karan. Chaywanmi rikuchisharan Mesiasta k’aspipi warkuspaqa mana mayqen tullullantapas p’akinankuchu kasqanta (Salmos 34:20; Juan 19:31-33, 36).

Jesusqa seguron kasharan Jehová Dios promesankunata llapallantapuni cumplinanmanta, chaytan noqanchispas yachanchis. ¡Hebreo simipi aswan juch’uy letraqa jatun garantiatan qowanchis!