1, 2. ¿Imapaqmi 2018 watapi askha runakuna juñukunqaku? ¿Imaraykun chay p’unchay munay p’unchay kanqa? (Kay paginapi fotokunata qhaway.)

DIOSTA serviqkunaqa sapa watanmi Jesuspa wañusqan p’unchayta yuyarinku. 2018 watapiqa 31 marzo killapin chayta yuyarikunqa. Chay p’unchaymi lliu mundontinpi askha runakuna juñunakunqaku Jesuspa wañusqanta yuyarinankupaq. Chay p’unchayqa jatun p’unchaymi kanqa.

² Jehová Diospas Jesuspas maytachá kusikunku chay p’unchayta yuyarinankupaq askha runakunaq juñunakusqanta rikuspaqa. Bibliapas willaranñan “lliu nacionkunamanta, lliu ayllukunamanta, lliu llaqtakunamanta, lliu rimaykunamantawan” askha runakuna juñukunanmanta. Paykunan ninanku karan: “Salvacionninchisqa tronopi tiyaq Diosmanta corderomantawanmi jamun”, nispa (Apo. 7:9, 10). Kusikunapaqpunin Jesuspa wañusqanta  yuyarinapaq askha runakunaq juñukusqanqa.

3. ¿Imakunamantan kay estudiopi yachasun?

³ ¿Imaynatan preparakusunman Jesuspa wañusqanta yuyarina p’unchaypaq? ¿Imaynatan Jesuspa wañusqanta yuyariy yanapawasunman juj nisqalla kausananchispaq? ¿Imaynatan yanapakusunman Diospa llaqtanpi juj nisqalla kausay kananpaq? ¿Jayk’aqkaman yuyarisun Jesuspa wañusqanta? Chay tawantin tapuykunamantan kay estudiopi yachasun.

4. ¿Imaraykun mana faltakunanchischu Jesuspa wañusqanta yuyarinapaq juñunakuyman?

⁴ Jesuspa wañusqanta yuyarinapaq juñunakuymanqa manan faltakunanchischu. ¿Imarayku? Chay juñunakuykunapin Jehová Diosta adorallanchistaq. Chaymantapas chay juñunakuyman mana faltakuspanchisqa Jehová Diosta Jesustawanmi kusichisun. Manapunin imawanpas jark’achikunanchischu chay juñunakuyman rinanchistaqa. Onqorusunmanpas ima desgraciapipas tarikusunman chayllañachá mana riytaqa atisunmanchu. Chay juñunakuyman mana faltakuqtinchisqa aswan ganaswanraqmi Diospas libronpi sutinchista qelqanqa. Chay librotan nikullantaq “kausay libro” nispa. Chay libropi anotasqa runakunaqa wiñay kausaytan chaskinqaku (Mal. 3:16; Apo. 20:15).

5. ¿Imatan ruwasunman allinchus iñiypi kashanchis icha manachus chayta yachananchispaq?

⁵ Manaraq chay p’unchay chayamushaqtinmi Dioswan rimananchis chaykunamanta. Chaymantapas allintan qhawarikunanchis imaynas Dioswan kashanchis chayta (leey 2 Corintios 13:5). ¿Imaynatan chayta ruwasunman? Pabloq nisqan jina noqanchis kikinchistan allinta t’aqwikunanchis allinchus iñiypi kashanchis icha manachus chayta. Chaypaqqa yaqapaschá tapukusunman: “¿Confianichu Jehová Diospa llaqtanpi? ¿Tukuy atisqaytachu ruwashani Diospa gobiernonmanta jujkunaman yachachinaypaq? ¿Convencesqapunichu kashani Satanaspa gobiernon tukupunanmanta? ¿Bautizakusqay p’unchaypi jinachu Jehová Diospi Jesuspipas confiashani?”, nispa (Mat. 24:14; 2 Tim. 3:1; Heb. 3:14). Chaykunapi allinta piensasun chayqa allintan yachasun imaynas Dioswan kashanchis chayta.

6. a) ¿Imatan ruwananchis wiñay kausayta chaskinanchispaq? b) ¿Imaynatan juj umalliq preparakun Jesuspa wañusqanta yuyarina p’unchaypaq? c) ¿Imaynatan ejemplonta qatikusunman?

⁶ ¿Imaynatan preparakullasunmantaq Jesuspa wañusqanta yuyarina p’unchaypaq? Manaraq chay p’unchay chayamushaqtinmi leenanchis chaymanta rimaq  qelqanchiskunata chaypitaqmi yuyaymanananchis (leey Juan 3:16; 17:3). Yachasqanchis jina wiñay kausayta chaskinapaqqa Jehová Diostan allinta reqsinanchis, wawan Jesuspipas tukuy sonqon iñinanchis. Chaymi manaraq chay jatun p’unchay chayamushaqtin allinta estudiananchis Diosmanta rimaq revistakunata Jesusmanta rimaq revistakunatawan, chhaynapin astawan paykunaman achhuykusun. Juj umalliqmanta yachasun. Payqa unayñas waqaychan Jesuspa wañusqanmanta rimaq Qhawaq revistakunata. Chay revistakunatas sapa watan leen Jesuspa wañusqanta yuyarinapaq cercaña kashaqtin. Chay waqaychasqanmansi mayninpiqa yapan jujta otaq iskay revistata. Chaymantapas sapa watansi leen chay semanapaq textokunata. Chayta ruwaspas payqa sapa watan imaymanakunata yachan, astawansi Jehová Diostapas Jesustapas munakun. Sichus noqanchispas pay jina ruwasun chayqa, astawanmi Jehová Diostapas Jesustapas munakusun. Chhaynapin chay ocasionqa allin noqanchispaq kanqa.

7. a) ¿Imatan Jesús Diosmanta mañakuran? b) ¿Uyariranchu Dios chay mañakusqanta?

⁷ Jesusqa apostolninkunawan cenata ruwasqan tutapin papanmanta mañakuran llapa qatikuqninkuna jujlla kanankupaq (leey Juan 17:20, 21). ¿Uyariranchu Dios chay mañakusqanta? Arí, uyariranmi. Chaytan rikuchin Jesuspa wañusqanta yuyarinapaq sapa watan juj sonqolla juñukusqanchis. Chay p’unchaymi lliu mundopi imaymana clase runakuna juñukunku. Chhaynapin rikuchinku Jehová Diospi Jesuspi ima creesqankuta. Wakin nacionpi runakunaqa mana allinpaqmi qhawanku imaymana clase runakunaq juj nisqalla juñukusqanta. Jehová Dioswan Jesuswanmi ichaqa mana chhaynatachu qhawarinku. Aswanmi paykunaqa kusikunku imayna colorña kanchis chaypas jujlla kasqanchismanta.

8. ¿Imatan Jehová Dios willachiran profeta Ezequielwan?

⁸ Ñaupaqmantapachan Diosqa willachiranña llaqtanqa jujlla kananmanta. Chaypin Diosqa profeta Ezequielwan willachiran Judapaq k’aspi Josepaq k’aspiwan jujllaman tukupunanmanta (leey Ezequiel 37:15-17). Chaymanta rimaspan 2016 watapi julio killapi lloqsimuq Qhawaq revistapi “Leeqkunaq tapukusqan” nisqa partepi niran: “Profeta Ezequielwanmi Jehová Diosqa willachiran paypa serviqninkuna prometesqa allpaman kutimpunankuta, jinaspa juj llaqtallaña kapunankuta. Chay profeciaqa kay tiempopipas junt’akuranmi, chaymi Diosta serviqkuna jujllachasqa kashanku”, nispa.

9. ¿Imaynatan Ezequielpa willasqan profecía junt’akushan?

⁹ Jehová Diosmi 1919 watamantapacha janaq pachapaq ajllasqa cristianokunata juñushan. Paykunatan nikun “Judapaq k’aspi” nispa. Chay ajllasqa cristianokunamanmi juñukullarankutaq kay pachapi tiyayta munaq runakuna. Paykunatan nikun “Josepaq k’aspi” nispa. Chay iskaynin  k’aspikunatan Jehová Diosqa makinpi juñunan karan (Ezeq. 37:19). Ezequielpa willasqanman jinan Diosqa janaq pachapaq ajllasqan cristianokunata, ‘waj ovejakunatawan’ juj t’aqallaman tukuchiran (Juan 10:16; Zac. 8:23). Paykunan juj sonqolla Diosta servishanku. Paykunatataq Jesucristo gobiernashan. Paytan Diosqa Ezequielpa qelqasqan profeciapi nin: “Kamachiy Davidmi”, nispa (Ezeq. 37:24, 25). Jesuspa wañusqanta yuyarinapaq sapa watan juñunakuspaqa Ezequielpa qelqasqan profeciatan junt’ashanchis. Ichaqa, ¿imatan sapankanchis ruwasunman Diospa llaqtan jujllachasqalla kananpaq?

10. ¿Imatan ruwasunman Diospa llaqtanpi juj nisqalla kausananchispaq?

¹⁰ ¿Imatan ruwasunman Diospa llaqtanpi juj nisqalla kausananchispaq? Ñaupaqtaqa yachanan humilde kayta. Jesuspunin niran: “Jatunchakuqqa k’umuchisqan kanqa, pipas k’umuykukuqtaq jatunchasqa kanqa”, nispa (Mat. 23:12). Kay pachapi runakunaqa nishu jatunchakuqmi kanku. Noqanchismi ichaqa humilde kananchis. Chaymantapas respetananchismi hermanonchiskunata kasukunanchistaqmi umalliqkunatapas. Chayta ruwasun chayqa jujllachasqallan kasunchis.  Astawanqa Jehová Diostan kusichisun, payqa “uma oqariqkunaq contranpin kashan, k’umuykukuq kaqkunamanmi ichaqa ancha sumaq sonqo kayninta rikuchin” (1 Ped. 5:5).

11. ¿Imaraykun t’antapi vinopi ima piensananchis? ¿Imapaqmi chaypi piensay yanapawasun?

¹¹ Iskaypi. Jujllachasqa kausananchispaqqa t’antapi vinopi iman piensananchis. Manaraq chay jatun p’unchay chayamushaqtinmi chaypi piensashananchis, astawanqa chay tutan allinta chaypi piensananchis (1 Cor. 11:23-25). Yachasqanchis jina mana levadurayoq t’antaqa Jesuspa ch’uya cuerpontan representan vinotaq yawarninta. Ichaqa manan chaykunallatachu yuyarinanchis. Jehová Diosqa anchata munakuwasqanchisraykun Jesusta kachamuran. Jesuspas munakuwasqanchisraykun vidanta entregaran. Chaykunapin allinta piensananchis, chhaynapin tukuy sonqonchiswan paykunata munakusun. Jehová Diosta tukuy sonqowan munakusun chayqa, faciltan noqanchispurapas munanakusun, chhaynapin jujllachasqalla kausasun.

12. Mateo 18:23-34 textopi Jesuspa willasqan jina, ¿ima ruwananchistan Jehová Dios munan?

¹² Kinsapi. Jujllachasqa kananchispaqqa sonqomantan perdonanakunanchis. Jujkunata perdonaspan rikuchisun Jehová Dioswan agradecido kasqanchista. Payqa juchanchis perdonasqa kananpaqmi Jesusta kachamuran. Perdonay ancha allinpuni kasqanta rikuchinanpaqmi Jesusqa willaran juj reymanta willakuyta. Chaymi kashan Mateo 18:23-34 textopi. Chay textota leespa tapukuy: “¿Kaypi Jesuspa yachachisqanman jinachu ruwashani? ¿Pacienciakunichu iñiqmasiykunawan? ¿Sonqomantachu perdonani ofendewaqniy hermanota?”, nispa. Yaqapaschá pipas nishuta k’iriruwanchis, manapaschá chayta qonqayta atishanchischu. Ichaqa, Jesuspa willasqan jina, perdonananchismi hermanonchistaqa. Manachus perdonasun chayqa manan noqanchispas perdonasqachu kasun (leey Mateo 18:35). Chaypin allinta piensanallanchistaq. Sichus Jesusta kasukusun perdonanakusuntaq chayqa thajpin kausasun.

13. ¿Imapin allinta piensananchis?

¹³ Perdonakuq kayta yachasun chayqa, thajmi Diospa llaqtanpi kausay kanqa. Apóstol Pabloq nisqan jina ‘chay jujllachasqa kaytaqa santo espirituraykun chaskiranchis’ (Efes. 4:3). Chaymi manaraq chay jatun p’unchay chayamushaqtin allinta piensananchis imaynas jujkunawan kashanchis chaypi. Sapankanchismi tapukunanchis: “¿Apuraychu imawanpas sintikuni? ¿Imaynatan rikuchishani mana sintipakuq kasqayta? ¿Kallpachakunichu Diospa llaqtanpi sumaq kausay kananpaq?”, nispa. Chay tapuykunapin allinta piensananchis.

14. ¿Imaynatan rikuchisunman jujkuna-jujkunawan munanakusqanchista?

¹⁴ Tawa. Jujllachasqa kananchispaqqa Jehová Dios jinan munakuq kananchis (1 Juan 4:8). Manan jayk’aqpas ninanchischu “imanasaqtaqri, munakunaychá riki” nispaqa. Aswanmi sonqomanta iñiqmasinchistaqa munakunanchis. Imaña kanqa chaypas apóstol Pabloq nisqan jinan ‘munakuywan aguantanakunanchis’  (Efes. 4:2). Arí, manan jawa sonqollachu pitapas aguantananchis aswanpas ‘munakuywanmi’. Chaymantapas manan noqanchischu runakunataqa Diospa llaqtanman pusamunchis, Dios kikinmi paykunataqa pusamushan (Juan 6:44). Chaymi noqanchisqa mana pitapas cheqnipakunanchischu. Aswanmi, imaynan Diospas munakuwanchis chhaynata paykunataqa munakunanchis (1 Juan 4:20, 21).

15. ¿Imaraykun nisunman “Jesuspa wañunanta yuyariyqa tukupunqan” nispa?

¹⁵ Chayamunqan juj tiempo, chaypiqa manañan Jesuspa wañusqanta yuyarisunchu. ¿Maymantan chayta yachakun? Jesuspa wañusqanta yuyarinamanta rimashaspan apóstol Pablo niran: “Señorpa wañusqantan willashankichis, pay jamunankama”, nispa (1 Cor. 11:26). ¿Jayk’aqtaq Jesusri jamunqa? Pay kikinmi jamunan tiempomanta willashaspa niran: “Chayllamanmi runaq Churinpa señalnin cielopi rijurinqa, jinan kay pachapi llapa ayllukuna llakikuymanta sonqonkuta takakunqaku, runaq Churintataq rikunqaku atiywan sinchi lliflli kaywan phuyupi jamushaqta. Paymi angelninkunata kachamunqa, paykunataq trompeta sinchita waqashaqtin llapa ajllasqakunata juñunqaku kay pachaq tawantin ladonmanta, cieloq juj k’uchunmanta juj kaq k’uchunkama”, nispa (Mat. 24:29-31). Chaypi nisqan jina, Jesusmi ‘juñunqa’ kay pachapi qhepaq llapa ajllasqakunata. Chayqa kanqa manchay ñak’ariy qallarisqan qhepatan, armagedón guerrapaq pisillaña faltashaqtin. Chay armagedón guerrapin Jesusqa 144.000 ajllasqa cristianokunawan kuska kay pacha reykunata chinkachinqa (Apo. 17:12-14). Chhaynaqa, Jesuspa wañusqanta yuyariyqa tukupunqa Jesús llapa ajllasqa cristianokunata janaq pachaman apapuqtinmi. Chay qhepamanqa manañan imatapas yuyarisunchu.

16. ¿Imaraykun manapuni faltakunachu Jesuspa wañusqanta yuyarinapaq juñunakuyman?

¹⁶ Kaypi yachasqanchis jina 2018 watapiqa 31 p’unchay marzo killapin Jesuspa wañusqanta yuyarikunqa. Amapuni chaymanqa faltakusunchu. Kallpachakusuntaq Diospa llaqtan jujlla kananpaqpas (leey Salmos 133:1). Chaymantapas kaypi yachasqanchis jina, Jesuspa wañusqanta yuyariyqa tukukapunqan. Chayrayku, tukukunan tiempo chayamunankama kallpachakushallasun chay jatun p’unchayta llapanchis juj nisqalla yuyarinanchispaq.