1, 2. ¿Imatan yachanchis juj waynata pasasqanmanta?

¿JEHOVÁ DIOSPA testigonchu tayta-mamayki kanku? Chhayna kaqtinqa, manan paykuna Diosta servisqankuraykuchu qanpas Diosta servinki. Aswanpas sapankanchismi kallpachakunanchis Jehová Dioswan amigontin kananchispaq.

² Rimasun juj waynamanta, paypa familianqa Testigokunan kanku. Wayna kashaspan reparakuran Jehová Diosta pisita munakusqanta. Paymi nin: “Jehová Diostaqa servirani familiaypa ruwasqanta qatikuspallan”, nispa. Chay qhepamanmi ichaqa tiempota orqoran Bibliata leenanpaq yachasqanpi piensananpaq, sapa kutilla Diosmanta mañakunanpaqpas. Jinan payqa niran: “Munakuq Diosniyta astawan munakunaypaqqa allintan payta reqsinay karan”, nispa. Chaymi kunanqa iskay tapuykunata kutichisunchis: ¿Kaqllachu kanman Jehová Diosmanta chikanta yachay payta allinta reqsiywan? ¿Imatan ruwananchis Jehová Diosta allinta reqsinanchispaq?

3. ¿Imaraykun mana kaqllachu Jehová Diosmanta chhikanta yachay payta allinta reqsiywan?

³ Yaqapaschá piensasunman Jehová Diosta reqsinanchispaq sutinta yachasqanchisrayku imachus ruwasqanmanta chikanta yachasqanchisrayku ima. Ichaqa Jehová Diosta allinta reqsinapaqqa ñaupaqtan yachananchis imayna Dios kasqanta. Chhaynapin allinta entiendesun imaraykuchus imatapas nisqanta ruwasqantapas. Jinaspa  reparasun piensasqanchispas ruwasqanchispas sonqonpaq jinachus kashan icha manachus chayta, chayman jinataq ruwananchis.

4. Bibliaqa willanmi wakin runakuna Diosta allinta reqsisqankumanta, ¿imaynapin chay yanapawanchis?

⁴ Yaqapaschá wakin runakunaqa burlakunqaku Jehová Dios serviy munasqanchismanta, astawanqa noqanchis contra jatarinkuman juñunakuykunaman riqtinchis. Sichus Jehová Diospi confiasun chayqa, manan jayk’aqpas saqerpariwasunchu. Jehová Diospi confiasqanchismi yanapawasun paywan wiñaypaq amigontin kananchispaq. ¿Atisunmanchu Jehová Diosta allinta reqsiyta? Arí. ¿Imaynapin chayta yachanchis? Chaypaq yachasun Moisesmanta rey Davidpa ruwasqanmantawan. Jinaspa kay tapuykunata kutichisunchis: ¿Imatan ruwaranku Jehová Diosta allinta reqsinankupaq? ¿Imatan ruwasqankumanta yachasunman?

5. ¿Imata ruwananpaqmi Moisés decidikuran?

⁵ Moisesqa Jehová Dios serviytan decidikuran. 40 watanpi kashaspan Moisesqa mana munaranchu “Egipto reypa ususinpa wawan” nisqa kayta, aswanmi decidikuran Jehová Diospa llaqtanmanta kananpaq (Heb. 11:24). Saqepurantaqmi Egipto llaqtapi autoridadniyoq kasqanta. Moisesqa yacharanmi Israel runakunata yanapaqtin rey faraón paywan sinchita phiñakunanta, chay reyqa ancha atiyniyoqmi karan, Egipto runakunapas diosta jinan rikuranku. Chayta ruwasqanwanmi Moisesqa rikuchisharan Jehová Diospi confiasqanta. Jehová Diospi confiasqanmi Moisesta yanaparan paywan amigontin kananpaq (Prov. 3:5).

6. ¿Imatan Moisespa ruwasqanmanta yachanchis?

⁶ ¿Imatan chaymanta yachanchis? Moisés jinan noqanchispas decidinanchis kanqa Jehová Dios serviyta otaq mana serviytapas. Jehová Diosta servispaqa imaymana sasachakuykunapipaschá tarikusunchis, familianchiskunapas manan munankumanchu servinanchista. Chhaynaña kaqtinpas Diospi confiashallasun chayqa, payqa yanapawasunpunin.

7, 8. ¿Imatan Moisés yachashallaran?

⁷ Moisesqa yachashallaranmi Diosmanta, munaynintataq ruwaran. Jehová Diosmi Moisesta kamachiran Israel llaqtanta orqomunanpaq, Moisesmi ichaqa chay ruwayta mana atinanpaq piensaspa Diosta askha kutipi niran paypa rantinpi jujta kachananpaq. Diosmi ichaqa Moisesta anchata khuyapayaspa yanaparan (Éx. 4:10-16). Jinan Moisesqa mana manchakuspa faraonman willaran Diospa castigon chayamunanta. Jinaspan rikuran Jehová Diospa atiyninta Israel llaqtanta salvasqanta rikuspa, faraonta ejercitontawan lamar-qochapi wañuchiqtin ima (Éx. 14:26-31; Sal. 136:15).

⁸ Egipto llaqtamanta lloqsimusqanku qhepamanmi israelitakunaqa sapa kutilla rimapakuranku. Moisesmi ichaqa rikuran Jehová Dios llaqtanwan pacienciakusqanta (Sal. 78:40-43). Chaymantapas Diosqa manan israelitakunata castigaranchu Moisesta uyarisqankurayku, chaypin Moisesqa rikuran Jehová Dios k’umuykukuq kasqanta (Éx. 32:9-14).

9. Hebreos 11:27 textopi nisqanman jina, ¿imaynatan Moisés Jehová Dioswan kausaran?

⁹ Egipto llaqtamanta Israel runakunata  orqomusqan qhepamanmi Moisesqa Jehová Dioswan allin amigontin karan, mana rikuna Diostan rikushanmanpas jinata qhawariran (leey Hebreos 11:27). Chaymi Biblia niran: ‘Jehová Diosmi Moiseswan uya pura rimaq, imaynan pipas runamasinwan riman jinata’, nispa (Éx. 33:11).

10. ¿Imakunatan ruwananchis Jehová Diosta allinta reqsinanchispaq?

¹⁰ ¿Imatan chaymanta yachanchis? Jehová Diosta allinta reqsinapaqqa imayna Dios kasqantan yachananchis, munaynintataqmi ruwananchis. ¿Imatan Jehová Dios munan ruwananchista? Biblian nin: “Payqa llapa runapas salvasqa kanantan munan, cheqaq kaqtapas allinta yachanankutan munan”, nispa (1 Tim. 2:3, 4). Chaytaqa kasukunchis runakunaman Jehová Diosmanta yachachispan.

11. ¿Imaraykun Jehová Diosta aswan allinta reqsinchis runakunaman yachachispa?

¹¹ Runakunaman Jehová Diosmanta yachachispaqa astawanmi payta reqsinchis. Jehová Diosmi pusariwanchis allin sonqoyoq runakunaman, chaypin rikunchis runakunata khuyapayasqanta (Juan 6:44; Hech. 13:48). Bibliamanta yachachisqanchis runakunaqa imayna kasqankuta costumbrenkuta iman cambianku, chaypin sut’ita rikunchis Diospa palabran atiyniyoq kasqanta (Col. 3:9, 10). Jehová Diospa pacienciakusqantataq rikunchis yapa-yapamanta tiyasqanchis llaqtapi runakunaman paymanta willaqtinchis (Rom. 10:13-15).

12. Éxodo 33:13 textopi nisqanman jina, ¿imatan Moisés Jehová Diosmanta mañakuran? ¿Imaraykun chayta mañakuran?

¹² Moisesqa ancha allinpaqmi qhawariran Dioswan amigontin kasqanta. Moisesmi Diospa yanapayninwan askha milagrokunata ruwaran. Chaykunataña ruwaran chaypas Jehová Diostan mañakuran astawan reqsinanpaq (leey Éxodo 33:13). Moisesqa 80 watanpiñan kasharan chayta mañakushaqtinqa, chaywanpas reparakuranmi aswan allinta janaq pacha taytanta reqsinan kasqanta.

13. ¿Imatan ruwaspan rikuchinchis Jehová Dioswan amigontin kasqanchista?

¹³ ¿Imatan chaymanta yachanchis? Unayña Jehová Diosta servishasunman chaypas, ancha allinpaqmi qhawarinanchis Dioswan amigontin kasqanchista. Chaytaqa rikuchinchis paywan rimaspanchismi.

14. ¿Imatan ruwananchis Diosta allinta reqsinapaq?

¹⁴ Sichus piwanpas amigontin kayta munanchis chayqa sapa kutillanmi paywan rimananchis. Chaymi Jehová Dioswanqa sapa kutilla rimananchis, mana manchakuspataq imachus sientesqanchista piensasqanchista willakunanchis (Efes. 6:18). Turquía nacionmanta Krista sutiyoq hermananchismi nin: “Jehová Diosmanmi sapa kutilla willakuni imachus piensasqayta, jinaspa rikuni paypa yanapayninta, chaymi yanapawan payta astawan munakunaypaq paypi confianaypaqpas. Mañakusqayman kutichimusqanta rikuspaymi Jehová Diosta Papayta amigoyta jina rikuni”, nispa.

15. ¿Imaniranmi Jehova Dios rey Davidmanta?

¹⁵ Rey David naceqtinqa familianpas llaqtanpi tiyaq runakunapas Jehová Diostan adoraranku. Davidmi ichaqa mana chayraykullachu Diostaqa adoraran, aswanmi payqa kallpachakuran Dioswan amigontin kananpaq, chaymi Jehová Diosqa anchata  munakuran, nirantaq: “Davidtan tarini sonqoypaq jina runata”, nispa (Hech. 13:22). ¿Imaynapin David Jehová Diosta munakuran?

16. ¿Imatan David yacharan Jehová Diosmanta kamasqankunata qhawarispa?

¹⁶ Davidqa Jehová Diosmantan yacharan kamasqankunata qhawaspa. Wayna kashaspan Davidqa tuta-p’unchay papanpa ovejankunata michiq. Yaqapaschá chay tiempopi Jehová Diospa ruwasqankunapi piensaran. Chaymi tutakunaqa cielota qhawarispa waranqanpi ch’askakunata rikuspa niran: “Diospa qhapaq atiyninmantan janaq pachaqa sut’ita willakun, kamasqanmantan janaq pachaqa sut’inchan”, nispa (Sal. 19:1, 2). Chaymantapas Davidqa rikuranmi runakuna may munay kamasqa kasqanchista, chaypin rikuran Jehová Dios ancha yachayniyoq kasqanta (Sal. 139:14). Jehová Diospa kamasqankunapi piensaspan Davidqa reparakuran Diospa ñaupanpi mana imapaschu kasqanta (Sal. 139:6).

17. ¿Iman pasanqa Diospa kamasqankunapi piensaqtinchis?

¹⁷ ¿Imatan chaymanta yachanchis? Diospa kamasqankunatan qhawarinanchis. Reparananchismi kay allpanchis may munay kamasqa kasqanta. Sapa p’unchaymi tiempota orqonanchis plantakunapas, animalkunapas, runakunapas imayna kamasqa kasqankuta qhawananchispaq, jinaspa tapukunanchis: “¿Imatan Jehová Diosmanta yachachiwan?”, nispa. Chayta ruwaspan allinta reqsisunchis munakuq Papanchista astawantaq munakusun (Rom. 1:20).

18. Salmos 18 capítulo nisqanman jina, ¿imatan David reparakuran?

¹⁸ Davidqa repararanmi Jehová Dios yanapasqanta. Papanpa ovejankunata michishaspanmi leonpas osopas ovejankunata mijuyta munaranku, jinan Davidqa Jehová Diospa yanapayninwan chay animalkunata wañuchiran. Jatunkaray Goliat-ta wañuchiqtinpas Diosmi yanaparan, chaymi Davidqa sut’ita niran Jehová Dios yanapasqanta (1 Sam. 17:37). Chaymantapas willaranmi Jehová Diospa yanapayninwan envidiakuq rey Saulmanta ayqekusqanta ( Sal. 18, qallariyninpi titulota qhaway). Sichus David orgulloso kanman karan chayqa, ninmanpaschá karan: “Noqan chaykunataqa ruwarani”, nispa. Paymi ichaqa k’umuykukuq runa karan, chaymi niran: “Diosmi yanapawaran”, nispa (Sal. 138:6).

19. ¿Imatan yachanchis Davidpa ruwasqanmanta?

¹⁹ ¿Imatan chaymanta yachanchis? Jehová Diospa yanapayninta mañakuspaqa reparananchismi ima ratopichus imaynatachus yanapawasqanchista. K’umuykukuq kasun chayqa, reparasunmi noqallanchismantaqa mana imatapas ruway atisqanchista, aswanpas Diospa yanapayninta necesitasqanchista. Diospa yanapayninta rikuspaqa astawanmi payta munakusun. Chaymi Fiyi nacionmanta Isaac hermanonchista pasaran, payqa askha watañan Jehová Diosta servishan, paymi nin: “Imayna kausasqayta yuyarispan reparakuni imaynatachus Jehová Dios Bibliata estudiasqaymantapachá yanapawasqanta, jinan Diostaqa ladoypipas kashanman jinata qhawarini”, nispa.

20. ¿Imaynatan Davidta yanaparan Jehová Dioswan amigontin kasqan? ¿Imatan chaymanta yachanchis?

²⁰ Davidqa Jehová Dios jinan munakuq khuyapayakuq karan. Jehová Diosmi kamawaranchis  pay jina munakuq khuyapayakuq kananchispaq (Gén. 1:26). Imayna Dios kasqanta astawan yachaspaqa astawanmi payman rijch’akusun. Davidqa allintan janaq pacha Papanchista reqsiran, chaymi atiran Dios jina juj runakunata khuyapayayta. Ichaqa juj kutinmi Davidqa Jehová Dios contra juchallikuspa Uriaspa warmin Bat-Sebawan puñuran, kamachirantaq Uriasta wañuchinankupaq. Jehová Diosmi ichaqa Davidta khuyapayaran paypas juj runakunata khuyapayasqanrayku (2 Sam. 11:1-4, 15). Israelitakunaqa anchatan Davidta munakuranku, Jehová Diospas munakuranmi, chaymi Davidqa allin ejemplo karan Israelpi reykunapaq (1 Rey. 15:11; 2 Rey. 14:1-3).

21. Efesios 4:24; 5:1 textopi nisqanman jina, ¿iman kanqa Dios jina munakuq, khuyapayakuq, sumaq sonqo kaqtinchis?

²¹ ¿Imatan chaymanta yachanchis? Kallpachakunanchismi Dios jina munakuq khuyapayakuq sumaq sonqo kananchispaq, chayta ruwayqa allinninchispaqmi kanqa astawantaq Jehová Diosta reqsisun. Jinaspapas sut’ita rikuchisun paypa wawan kasqanchista (leey Efesios 4:24; 5:1).

22, 23. ¿Ima allinkunan kanqa yachasqanchisman jina kausaqtinchis?

²² Yachasqanchis jina Jehová Diostaqa astawan reqsisunman kamasqankunata qhawaspa Bibliata estudiaspa ima. Bibliapin willashan Moisés, David jina askha junt’aq sonqo runakunamanta. Diosqa tukuy necesitasqanchistan qowanchis payta reqsinanchispaq, chay jinaqa noqanchispas kallpachakunanchismi astawanraq Diosta reqsinanchispaq.

²³ Jehová Diosmantaqa wiñay-wiñaypaqmi yachashallasun (Ecl. 3:11). Paymanta yachayqa allinmi, ichaqa aswan allinqa yachasqanchisman jina kausaymi. Sichus yachasqanchisman jina ruwasun, kallpachakusuntaq Jehová Dios jina munakuq kananchispaq chayqa, astawanmi payqa munakuwasun (Sant. 4:8). Bibliapin Diosqa niwanchis maskhaqninkunata mana jayk’aqpas saqerparisqanta.