MARCELOWAN, Yomarawan, Hiverwanqa kinsantinkun hermanontinkama kanku, paykunaqa Guatemala nacionmantan kanku. Yomaran ñaupaqtaqa testigokunawan Bibliata estudiarqan, chay qhepamantaq iskaynin hermanonkuna Biblia estudiayta qallarirqanku. Kinsantinkun ñausa kanku, chaymantapas manan paykunaqa braille nisqataqa leeyta yacharqankuchu. Chaymi yachachiqnin hermanoqa Bibliatapas qelqanchiskunatapas leespalla yachachiq.

Juñunakuykunaman rinankupaqpas sasan karqan. Juñunakuna wasiqa yaqa juj hora viajanapaq jinaraqmi karqan, chaymi paykunaqa mana sapallankuqa chaykamaqa puriyta atiqkuchu. Chaymi iñiqmasinchiskunaqa turnanakuspa riqku juñunakuyman apamunankupaq. “Allin yachachiq kasun” nisqa juñunakuypi participanankupaqpas hermanokunan yanapaqku, paykunan imachus ninankutapas yachachiqku.

Chaymantaqa mayo 2019 watamantapachan paykunaq tiyasqanku llaqtapi juñunakuykunata ruwakurqan, chaypi yanapakunankupaqtaq juj casarasqa iñiqmasinchiskuna astakurqanku. Paykunaqa maytan munarqanku chay kinsantin hermanokuna braille nisqata leeyta yachanankuta. Ichaqa paykunapas manan braille nisqataqa yacharqankuchu. Chaymi juj bibliotecaman rispa braille nisqata leeytapas qelqaytapas yachamurqanku, chay yachasqankuwantaq chay ñausa iñiqmasinchiskunata yanaparqanku.

Marcelopas, Yomarapas, Hiverpas pisi tiempollapin braille nisqata leeyta yacharqanku, chaymi paykunata yanaparqan iñiyninkupi wiñarinankupaq. a Kunanqa kinsantinkun precursor regular jina llank’ashanku. Marceloqa iñiq t’aqapi yanapakuq kamachin kapun. Mana faltaytan paykunaqa sapa semana juñunakuykunaman rinku, Diosmantapas willaq lloqsinku; chayta ruwaspan jujkunatapas kallpachanku.

Marcelowan, Yomarawan, Hiverwanqa ancha agradecesqan hermanokunapaq kashanku, munakuyninta rikuchisqankumanta. Yomaran nin: “Hermanokunaqa reqsisqaykumantapachan may munakuwasqankuta rikuchiwarqanku”, nispa. Marcelopas nillantaqmi: “Iñiq t’aqapiqa askha amigokunayoqmi kayku. Diospa llaqtanpi kasqaykumantan kunanqa ancha kusisqa kashayku, hermanokunaqa sonqomantapunin munanakunku”, nispa. Yomarapas hermanonkunapas maytan munashanku kay pacha sumaq paraisoman tukupunanta, chhaynapi ñawinkuwanpuni chayta rikunankupaq (Sal. 37:10, 11; Isa. 35:5).