1. ¿Imaraykun preparakunanchis qatikachayta aguantanapaq?

WAÑUPUNANPAQ juj p’unchayllaña faltashaqtinmi Jesusqa willaran discipulonkuna qatikachasqa kanankuta (Juan 17:14). Chay tiempomantapachan Jehová Diosta mana adoraq runakuna cheqaq cristianokunata qatikacharanku (2 Tim. 3:12). Millay runakunaq tukukuynin cercaykamusqanman jinan chayqa astawanraq yapakunqa (Mat. 24:9).

2, 3. a) ¿Iman pasawasunman manchakuq kaqtinchis? b) ¿Imakunamantan kay estudiopi yachasun?

² ¿Imaynatan preparakunanchis qatikachayta aguantananchispaq? Manan piensananchischu mana allinkunata ruwawananchispiqa. Chaykunapi piensasunman chayqa manchakuymantan manaraq qatikachasqa kashaspa Jehová Dios serviyta saqepusunman (Prov. 12:25; 17:22). Enemigonchis Saqraqa yachanmi manchakuqqa pisipasqanta, chaymi manchakunanchista munan (1 Ped. 5:8, 9). Chhaynaqa, ¿imatan ruwananchis mana manchakuspa qatikachayta aguantanapaq?

³ Kay estudiopin kay tapuykunamanta yachasun: ¿Imatan ruwananchis Jehová Diosman astawan jujllachakunanchispaq? ¿Imaraykun Jehová Dioswan amigontin kay ancha importante? ¿Imatan ruwananchis mana manchakuq kananchispaq? ¿Imatan ruwananchis runakuna cheqnikuwaqtinchis?

4. ¿Imatan Hebreos 13:5, 6 textopi niwanchis? ¿Imaraykun chaymanta convencesqa kananchis?

⁴ Jehová Diosqa munakuwanchismi manataqmi jayk’aqpas saqewasunchu, chaymantaqa manan iskayananchischu (leey  Hebreos 13:5, 6). Unayñan Qhawaq revista niran: “Diosta allinta reqsiqqa ima pruebapi tarikuspapas astawanmi paypi confianqa”, nispa. Chhaynaqa qatikachayta aguantanapaqqa Jehová Diostan munakunanchis, tukuy sonqonchiswantaq paypi confiananchis, manataq jayk’aqpas iskayanachu munakuwasqanchismanta (Mat. 22:36-38; Sant. 5:11).

5. ¿Imatan ruwananchis Diospa munakuwasqanchista rikunanchispaq?

⁵ Diosta astawan munakunapaq jinan Bibliata leenanchis (Sant. 4:8). Leeshaspaqa reparananchismi Jehová Dios imayna kasqanta, reparananchistaqmi munakuyninta rimasqanpi ruwasqanpipas (Éx. 34:6). Yaqapaschá wakinninchistaqa mana pipas munakuwaranchischu, chaymi mana creesunmanchu Jehová Dios munakuwananchispi. Sichus chhayna sientekunki chayqa, sapa p’unchay qelqay Jehová Dios munakuyninta rikuchisqasuykita (Sal. 78:38, 39; Rom. 8:32). Bibliata leespapas piensanaykin imaynatas Jehová Dios munakuyninta rikuchirasunki chaypi. Sichus Diosta astawan agradecekunki yanapasqasuykimanta chayqa, astawanmi paywan amigontin kanki (Sal. 116:1, 2).

6. Salmos 94:17-19 textopi nisqanman jina, ¿imaynatan yanapawanchis sonqomanta mañakusqanchis?

⁶ Diosmantan mañakushanallanchis. Juj wawa taytanpa marq’ayninpi munasqa sientekuspaqa llapantan willan chay p’unchaypi imachus paywan pasasqanta. Chay wawa jinan noqanchispas sapa p’unchay sonqomanta Jehová Dioswan rimananchis (leey Salmos 94:17-19). ‘Ukhu sonqonchispi’ kaqtan llapanta payman willakunanchis imachus manchachiwasqanchista llakichiwasqanchistapas (Lam. 2:19). Jinaspa Bibliaq willasqan jina “Diosqa runaq mana entiendey atisqan thaj kayta” qowasunchis (Filip. 4:6, 7). Jehová Dioswan astawan rimaspaqa astawanmi paypa amigon kasunchis (Rom. 8:38, 39).

7. ¿Imaraykun mana iskayananchischu Diospa promesankuna junt’akunanmanta?

⁷ Manan iskayananchischu Diospa gobiernon bendicionkuna apamunanmanta (Núm. 23:19). Sichus iskayasun Diospa promesankuna junt’akunanmanta chayqa, Satanaspas runankunapas facil-llatan manchachiwasunman (Prov. 24:10; Heb. 2:15). ¿Imatan ruwananchis Diospa gobiernonpi astawan confiananchispaq? Diospa gobiernonmanta rimaq promesakunatan estudiananchis, imaraykus seguro kashanchis junt’akunanmanta chaytapas. Chayta entiendenapaq rimasun Stanley Jones hermanonchismanta, payqa qanchis watan carcelpi karan Diospi iñisqanrayku. * ¿Iman yanaparan  aguantananpaq? Paymi nin: “Manan jayk’aqpas iskayaranichu Diospa gobiernonmanta, imatachus ruwananmantapas, chaymi yanapawaran allin iñiyniyoq kanaypaq. Manataqmi pipas Diosmanta karunchawayta atiranchu”, nispa. Sichus allinta iñisun Diospa promesankunapi chayqa, astawanmi Diosta munakusun, mana manchakuspataq servisun (Prov. 3:25, 26).

8. ¿Imaraykun juñunakuykunaman mana faltakuspa rinanchis?

⁸ Ama juñunakuykunaman faltakusunchu. Juñunakuykunan yanapawanchis Jehová Diosta astawan munakunanchispaq. Sichus tukuy sonqomanta juñunakuykunaman rishanchis chayqa jamuq tiempopi qatikachaytaqa aguantasunmi (Heb. 10:24, 25). Ichaqa sichus imaraykullapas juñunakuyman mana rishanchischu chayqa, qatikachasqa kaqtinchisqa manchakusunpaschá juñunakuykunaman riyta. Ichaqa sichus decidisqa kashanchis juñunakuykunaman ama faltakuspa rinapaq chayqa, manan pipas jark’ayta atiwasunchu. Chhaynaqa kunanmi astawan valorananchis juñunakuyninchiskunata. Chayta ruwaspaqa Diostan ñaupaqta kasukusun, manan gobiernokunatachu nitaq runakunatachu (Hech. 5:29).

9. ¿Imaraykun askha textokunata umanchispi jap’inanchis?

⁹ Umanchispin textokunata jap’inanchis (Mat. 13:52). Manaña allin umayoqchu kanchis chaypas, Jehová Diosmi espiritunwan yanapawasun textokunata yuyarinanchispaq (Juan 14:26). Juj hermanonchistan Alemania nacionpi carcelpi sapallanta wisq’aranku mana piwanpas rimananpaq, paymi nin: “Maytan kusikurani askha textokunata umaypi jap’isqaymanta, chay textokunaq nisqanpin piensarani carcelpi kashaspa. Chaymi yanapawaran Jehová Diosta munakushanallaypaq junt’aq kanaypaqpas”, nispa.

10. ¿Imaraykun umanchispi jap’inanchis Jehová Diosta jatunchanapaq takikunata?

¹⁰ Umanchispin jap’inanchis Diosta jatunchanapaq takikunata. Pablowan Silaswan Filipos llaqtapi carcelpi kashaqtinkun Jehová Diosman takiranku yuyarisqanku takikunata (Hech. 16:25). Ñaupaq Unión Soviética nacionpi hermanonchiskunan Siberia ladoman apasqa karanku, paykunapas chaytan ruwaranku. Mariya Fedun hermananchismi nin: “Libroykumanta llapa yuyarisqayku takikunatan takirayku”, nispa. Chay takikunaqa llapankutas kallpachasqa yanapasqataq  Jehová Diosta astawan munakunankupaq. Gustawasqanchis takikunata takiyqa kallpachawanchismi. Chaymi umanchispi chay takikunata jap’inanchis (qhaway “ Manan manchapakusaqchu” nisqa recuadrota).

11, 12. a) 1 Samuel 17:37, 45-47 textopi nisqanman jina, ¿imaraykun David mana manchakuq karan? b) ¿Imatan Davidpa ejemplonmanta yachanchis?

¹¹ Qatikachayta aguantanapaqqa mana manchakuqmi kananchis. ¿Imatan ruwasunman manchali runapaq qhawarikuqtinchis? Manan kayta qonqananchischu: Mana manchakuq kanapaqqa manan kallpayoq, jatun runa otaq allin ruwaq kasqanchismantachu dependen. Davidmanta rimasun, waynallaraq kashaspan jatun runa Goliatwan maqanakuran. Davidqa paypa ladonpiqa juch’uyllan karan pisi kallpayoqtaq karanpas. Chaymantapas payqa manan soldadochu karan, chaymi mana espadanpas karanchu. Ichaqa mana manchakuspan phawaykuran Goliatwan maqanakuq.

¹² Davidqa manan iskayaranchu Jehová Dios yanapananmanta, chaymi mana manchakuranchu (leey 1 Samuel 17:37, 45-47). Goliatqa paymanta aswan kallpayoqmi karan, ichaqa manan imapaschu karan Jehová Diospaqqa. Chhaynaqa mana manchakuq kanapaqqa Jehová Diospin confiananchis, yuyarinanchistaqmi enemigonchiskunaqa Diospaqqa mana imapaschu kasqankuta (2 Crón. 20:15; Sal. 16:8). ¿Imatan ruwasunman manaraq qatikachasqa kashaspa mana manchakuq kananchispaq?

13. ¿Imatan ruwananchis mana manchakuq kananchispaq?

¹³ Diospa gobiernonmanta predicayqa yanapawasunmi mana manchakuq kananchispaq. ¿Imarayku? Predicaspaqa Jehová Diospi confiaytan yachanchis, runakuna manchakuytataq atipanchis (Prov. 29:25). Ejerciciota ruwaqtinchisqa cuerponchisqa aswan fuerten kapun, chhaynallatataqmi wasin-wasinta, callekunapi, negociokunapi predicaspa manaña runakunata manchakunchischu. Sichus mana manchakuspa kunan predicasun chayqa, qhepamanpas predicashallasunmi autoridadkunaña jark’awaqtinchispas (1 Tes. 2:1, 2).

14, 15. ¿Imatan yachanchis Nancy Yuen, Valentina Garnovskaya hermananchiskunamanta?

¹⁴ Iskay hermananchiskunan valiente karanku, jujninmi Nancy Yuen hermananchis. Payqa juj metro y medio sayaynillayoqmi  karan, chaywanpas mana manchakuqmi karan. * Diospa gobiernonmanta predicashallasqanraykun iskay chunka watakuna jina China nacionpi carcelpi wisq’asqa karan. Chaypi autoridadkunan niranku: “Manan payta jinaqa aswan k’ullu runataqa reqsiraykuchu”, nispa.

¹⁵ Juj kaq hermananchistaq Valentina Garnovskaya. Paytaqa Unión Soviética nacionpin kinsa kutipi carcelpi wisq’aranku, 21 watakuna jinan wisq’asqa karan. * Hermananchisqa mana manchakuspan predicashallaran, chaymi autoridadkunaqa niranku: “Payqa nishu peligrosan”, nispa. ¿Imaraykun chay hermananchiskuna mana manchakuq karanku? Manan iskayarankuchu Jehová Dios yanapasqanmanta.

16. ¿Imatan ruwananchis mana manchakuq kananchispaq?

¹⁶ Rikusqanchis jina, mana manchakuq kanapaqqa manan kallpanchispichu nitaq ima ruway atisqanchispichu confiakunanchis. Aswanpas Jehová Dios yanapawananchispin confiananchis, noqanchisrayku maqanakunanpipas (Deut. 1:29, 30; Zac. 4:6). Chayta ruwaspan mana manchakuq kasunchis.

17, 18. Juan 15:18-21 textopi nisqan jina, ¿ima pasawananchistan Jesús niran? ¿Imaraykun chayta niran?

¹⁷ Kusikunchismi runakuna respetawaqtinchisqa, ichaqa manan llakikunanchischu runakuna cheqniwaqtinchisqa. Jesusmi niran: “Kusisqan kankichis runaq Churinrayku runakuna cheqnisuqtiykichis, qarqosuqtiykichis, k’amisuqtiykichis, sutiykichistapas millay runakunaqta jina pisichaqtinkuqa”, nispa (Luc. 6:22). ¿Imatan chaywan nisharan?

¹⁸ Jesusqa manan nisharanchu: “Cristianokunaqa munankun runakunaq cheqnisqan kayta”, nispaqa. Aswanpas imachus pasawananchismantan willasharan. Runakunaqa cheqnikuwanchis Jesuspa yachachisqanman jina kausasqanchisrayku, yachachisqanmanta predicasqanchisrayku  ima. Chaywanmi rikuchinchis mana kay pacha runakuna jinachu kasqanchista (leey Juan 15:18-21). Chhaynaqa manan llakikunanchischu Jehová Diosta munakusqanchisrayku runakuna cheqnikuwaqtinchisqa.

19. ¿Imaynatan apostolkunaq ejemplonta qatikusunman?

¹⁹ Manan jayk’aqpas p’enqakunanchischu Jehová Diospa testigon kasqanchismanta imataña jujkuna ninkuman otaq ruwankuman chaypas (Miq. 4:5). Runakuna manchakuyta atipanapaq yachasun imatas apostolkuna ruwaranku chayta. Apostolkunaqa yacharankun religionpi umalliqkuna paykunata sinchita cheqnikusqankuta (Hech. 5:17, 18, 27, 28). Chaywanpas sapa p’unchaymi temploman rispa Jesusmanta predicaspa reqsichikuranku discipulonkuna kasqankuta (Hech. 5:42). Sichus noqanchispas Jehová Diospa testigon kasqanchista reqsichikusun llank’anapi, escuelapi, vecinonchiskunawanpas chayqa manan runakunata manchakusunchu (Hech. 4:29; Rom. 1:16).

20. ¿Imaraykun apostolkuna kusisqa kasharanku runakunaña cheqnikuqtinkupas?

²⁰ Apostolkunaqa kusisqan kasharanku runakunaña cheqnikuqtinkupas. ¿Imarayku? Paykunaqa yacharankun Jehová Diospa munayninta ruwasqankurayku sufrisqankuta (Luc. 6:23; Hech. 5:41). Chaymi apóstol Pedro qelqaran: “Ñak’ariwaqchisña allin kaqta ruwasqaykichisrayku chaypas, kusisqa kaychis”, nispa (1 Ped. 2:19-21; 3:14). Sichus entiendenchis runakuna allin kaqta ruwasqanchismanta cheqnikuwasqanchista chayqa, manan Jehová Dios serviyta saqesunchu piña jark’awasunman chaypas.

21, 22. a) Jamuq tiempopi qatikachayta aguantanaykipaq, ¿imatan ruwanki preparakunaykipaq? b) ¿Imamantan qatimuq estudiopi yachasun?

²¹ Manan yachanchischu jayk’aqchus runakunapas autoridadkunapas Dios servinanchista jark’awananchista. Ichaqa atinchismi preparakuyta, chaytaqa ruwanchis Jehová Dioswan amigontin kanapaq kallpachakuspa, mana manchakuq kanapaq kallpachakuspa, cheqnikuwaqninchis runakunata mana manchakuspa ima. Kunanmantapacha preparakuspaqa servishallasunmi Jehová Diosta jamuq tiempopipas.

²² Ichaqa, ¿imatan ruwananchis gobiernokuna Dios servinanchista jark’akuqtinku? Qatimuq estudiopin yachasun qatiykachasqaña kashaspapas imaynatas Bibliapi yachachikuykuna yanapawasunman Diosta servishanallapaq chayta.