Rehoboamqa rey Salomonpa wawanmi karan. Salomonqa 40 watan gobiernaran Israel llaqtapi (1 Rey. 11:42). Paypa wañupusqan qhepallatan Rehoboamqa Shehem llaqtata riran reypaq nombrasqa kananpaq (2 Crón. 10:1). Papanqa allin yachayniyoqtaq allin yuyayniyoqtaq karan chayqa, yaqapaschá Rehoboamqa manchasqa kasharan. Paypas rikuchinanmi karan allin yuyayniyoqchus karan icha manachus chayta.

Israel llaqtapi runakunaqa manan contentochu kasharanku, chaymi llapa llaqtantinmanta juj comisionta Rehoboamman kacharanku, paykunan niranku: “Taytaykiqa sinchitan llank’achiwaranku, chay jinaqa pisiyarichiyyá kay sasa llank’ayniykuta, [...] jinan noqayku servisaykiku”, nispa (2 Crón. 10:3, 4).

Rehoboamqa manachá imayna kutichiyta atiranchu. “Imanasaqtaq kunanri” nisharanpaschá. Llaqtaq nisqanta kasunman karan chayqa pisiyanmanpachá karan qolqenpas imanpas. Manachus kasunman karan chayqa llaqtapaschá pay contra jatarinman karan. Chaymi payqa manaraq imatapas nishaspa taytanpa yuyaychaqnin kuraq runakunata tapukuran: “Ima niymanmi chay runakunata”, nispa. Tapukullarantaqmi wiñaymasinkunatapas. Jinan payqa wiñaymasinkunata kasuspa niran: “Taytaychus sinchi sasa llank’anata qorasunkichis chayqa, noqaqa aswan sasataraqmi llank’achisaykichis. Paychus jasut’iwan soq’arasunkichis chayqa, noqaqa fierro kiskayoq jasut’iwanñan soq’asaykichis”, nispa (2 Crón. 10:6-14).

¿Imatan chaymanta yachasunman? Kuraq hermanokunaqa allinta yachanku imaynas kay vida chayta imakunas pasawasunman chaytapas chaymi kasukunanchis paykunaq consejo qowasqanchista (Job 12:12).

Chay runakunata jujmanta payman kutichimunanpaqmi Rehoboamqa juñuran askha ejercitota.  Jehová Diosmi ichaqa profeta Semayawan willachiran: “Ama wayqeykichis Israel runakunawan maqanakuq riychischu, wasiykichista llapaykichis kutipuychis. Suyuq t’aqanakunantaqa noqan unancharani”, nispa (1 Rey. 12:21-24). *

Manachá chay reyqa piensaranpaschu chay pasanantaqa. ¿“Noqaqa fierro kiskayoq jasut’iwanñan soq’asaykichis” nishaspachu kunan mana imatapas ruwanman karan? ¿Jinatachu qhawanman karan chay runakunaq t’aqakunanta? (Tupanachiy 2 Crón. 13:7.) Bibliaq willasqan jina ‘paykunaqa Diospa nisqanta uyarispan, kutipuranku Diospa kamachisqanman jina’.

¿Imatan chaymanta yachasunman? Imataña jujkuna ninkuman chaypas Diostan ñaupaqtaqa kasukunanchis. Chayta ruwasun chayqa munakuwasunmi Diosqa (Deut. 28:2).

Kaypi yachasqanchis jina Rehoboamqa Diosta kasukuspan mana maqanakuranchu t’aqakuq runakunawan. Aswanmi payqa Judapi wakin llaqtakunata Benjaminpi wakin llaqtakunatawan allin perqasqa llaqtakunaman tukuchiran (2 Crón. 11:5-12). Chaymantapas, payqa allintan kasukusharan Diospa kamachisqankunata. T’aqakuq chunka ayllukunan ichaqa mana. Paykunataqa gobiernaqninku Jeroboanmi idolokuna adorayman tanqasharan. Chaymi wakin Dios sonqo runakunaqa Jerusalenta viajamuqku Rehoboamta apoyaq Diosta adoraq ima (2 Crón. 11:16, 17). Chaywanmi Rehoboampa gobiernonqa aswan allinman tukusharan.

Gobiernon allin kashaqtinmi Rehoboamqa idolokuna adorayta qallariran, manataqmi Diospa leyninkunatapas kasukuranchu. ¿Imaraykun chay pasanman karan? Yaqapaschá maman chayman aysaran. Payqa Ammón llaqtamantan karan (1 Rey. 14:21). Rehoboamta qatikuspan llaqtantin runakunapas mana allinkunata ruwaranku. Chaymi Diosqa jinallata qhawaran Egiptopi rey Sisaq Judapi askha llaqtakuna thuninanta (1 Rey. 14:22-24; 2 Crón. 12:1-4).

Rey Sisaqqa nishutañan llaqtakunata thunisharan. Ñan Jerusalén llaqtamanña chayasharan. Jinan Diosqa profeta Semayawan Rehoboamman juj umallikunamanwan willachiran: “Qankunaqa saqerpariwarankichismi, chayraykun noqapas qankunata Sisaqman jap’ichisaykichis”, nispa. ¿Imatan ruwaran Rehoboam? Payqa arrepientekuranmi mana allinkuna ruwasqanmanta. Chaymi Israel umallikunapiwan niranku: “¡Chaninmi Señor Diosqa!”, nispa. Chayta rikuspan Diosqa yanaparan Rehoboamta manataqmi dejaranchu Jerusalén llaqta thunisqa kanantapas (2 Crón. 12:5-7, 12).

Rehoboamqa unaytan gobiernaran Judá llaqtapi. Manaraq wañupushaspaqa imaymana regalokunatan qoran wawankunaman. Yaqapaschá chayta ruwaran wawan Abías contra mana pipas jatarinanpaq, paymi rey kanan karan (2 Crón. 11:21-23). Chaywanmi payqa rikuchiran allin yuyayniyoq kasqanta.

Kaypi yachasqanchis jina Rehoboamqa kallpachakuranmi imatapas allinta ruwananpaq. Chaywanpas Diosqa manan allinpaqchu qhawariran paytaqa. ¿Imarayku? Bibliaq nisqan jina “manan tukuy sonqochu Señor Diosta maskharan” (2 Crón. 12:14).

Mayninpi allintaña imatapas ruwaran chaypas manan jayk’aqpas tukuy sonqowanchu Diosta maskharan. Chaychá falso dioskunatapas adoraran. Arrepientekushaspapas, ¿imaraykun arrepientekunman karan? ¿Cheqaqtapuni Diosta manchakusqanraykuchu icha jujkunata kasukuspallachu? (2 Crón. 11:3, 4; 12:6). Qhepakunamanpas Rehoboamqa juchapakushallaranmi. Abuelon Davidmi ichaqa mana chhaynachu karan. Payqa juchallikuranña chaypas tukuy sonqomantan arrepientekuran. Tukuy tiempon Diostapas munakuran (1 Rey. 14:8; Sal. 51:1, 17; 63:1).

 ¿Imatan chaykunamanta yachasunman? Yaqapaschá familianchispaq llank’ashanchis, atisqanchisman jinapaschá Diostapas servishanchis. Chaywanpas allin chaskisqa kananchispaqqa tukuy sonqomantan Diosta servinanchis; allin amigontinmi paywan kananchis.

¿Imatan chaypaq ruwasunman? Chaypaq kaypi piensasun. ¿Imatan ruwana nina mana wañunanpaq? Llant’atan ninaman yapashanalla ¿riki? Diosta munakuyninchis mana wañunanpaqpas sapa kutillanmi Bibliata leenanchis, chay leesqanchispitaqmi allinta piensananchis. Chaymantapas sapa kutillanmi papanchis Jehová Dioswan parlananchis (Sal. 1:2; Rom. 12:12). Chaykunata ruwasun chayqa manan sonqonchispi chiriyanqachu Diosta munakuy. Juchallikuqtinchispas chay munakuymi tanqawasun arrepientekunanchispaq. Manataqmi Rehoboam jinachu maynillanpi Diosta kasukusun (Jud. 20, 21).