RUNAKUNA

Bibliapin nin: ‘Diosmi kay pachata ruwaran, manan yanqa kananpaqchu chaytaqa kamaran, aswanpas runaq tiyananpaqmi kamaran’, nispa (ISAÍAS 45:18).

TIYASQANCHIS ALLPA

Bibliapin nin: “Wakinmi wañupushan, wakintaq paqarimushan, allpanchismi ichaqa kaqllapuni kanqa”, nispa (ECLESIASTÉS 1:4, Traducción del Nuevo Mundo).

¿IMATAN CHAYWAN NISHAN? Chaywanqa niwashanchis tiyasqanchis allpa mana jayk’aqpas chinkanantan, runakunapas wiñaypaq kay allpapi tiyanankutan. Chhaynaqa kay pacha chinkapunanmanta rimaspari, ¿imamantan rimashanchis?

KAYPI PIENSAY: Bibliapin willan Noepa tiemponpi kay pacha chinkachisqa kasqanmanta. Chayqa pasaran mana chanin kausay kay pachaman junt’aykusqanraykun (Génesis 6:13). Diosmi ichaqa Noeta familiantawan salvaran kamachisqanman jina kausasqankurayku, ichaqa mana kasukuq runakunatan wañuchiran. Biblian nin: ‘Diosqa chay tiempopi runakunatan wañuchipuran. Chaymi pasaran llapa kay pachata unu millp’uqtin’, nispa (2 Pedro 3:6). Chhaynaqa manan tiyasqanchis allpachu chinkachisqa karan, aswanpas millay runakunan chinkachisqa karanku. Chhaynallataqmi jamuq tiempopipas manan allpanchischu chinkachisqa kanqa, aswanpas millay runakunan chinkachisqa kanqaku.

MANA ALLIN RUWAYKUNA, LLAKIKUYKUNA

Bibliapin nin: “Pisi tiempomantaqa chinkapullanqan millay runakunaqa, maskhaspaykipas manañan tarinkichu. Llamp’u sonqokunan ichaqa kay allpata chaskinqaku, sumaq thaj nisqataq tiyakunqaku”, nispa (SALMOS 37:10, 11).

¿IMATAN CHAYWAN NISHAN? Diosqa millay runakunatan Noepa tiemponpi chinkachiran, chaywanpas runakunaqa jujmantan mana allinkunata ruwashanku. Diosmi ichaqa pisi tiempollamanta wiñaypaq mana allin ruwaykunata chinkachipunqa. Salmos libropi nisqan jina, “millay runakunaqa” chinkapunqakun. Diosmi janaq pachapi gobiernonta churan pachantinta kamachimunanpaq, chay gobiernowanmi Diosqa millay ruwaykunata chinkachipunqa, kasukuq runakunatataq yanapanqa.

KAYPI PIENSAY: ¿Iman pasanqa kay pachapi kamachikuqkunawan? ¿Yanapanqakuchu Diospa gobiernonta? Manan yanapanqakuchu. Aswanpas paykunaqa Diospa gobiernon contran jatarinqaku (Salmos 2:2). Chaymi Diospa gobiernonqa kay pachapi llapa gobiernokunata chinkachipunqa, jinaspa Diospa gobiernollan wiñaypaq kamachinqa (Daniel 2:44). Ichaqa tapukushankipaschá: “¿Imaraykutaq runakunari manaña kamachikunankuchu?”, nispa.

Bibliapin nin: “Runaqa manan yachakunchu imayna kanantapas”, nispa (JEREMÍAS 10:23).

¿IMATAN CHAYWAN NISHAN? Diosqa manan runataqa paykunapura kamachikunankupaqchu kamaran. Chaymi mana allintachu kamachinku, manataqmi atinkuchu jujkunaq llakikuyninkunatapas allichayta.

KAYPI PIENSAY: Britannica Academic libropin kayta nin: “Iskay kinsa gobiernokunallaqa manan tukuchiyta atinkumanchu pachantinpi kashaq yarqayta, wajchayayta, onqoykunata, guerrakunata, wañuchinakuykunata, jujkunatapas. Chaymi wakinqa ninku: ‘Pachantinta juj gobiernolla kamachiqtinchus jina chaykunataqa chinkachisunman’”, nispa. Ichaqa llapa kamachikuqkunaña juj nisqalla llank’ankuman chaypas manapunin chaykunataqa chinkachiyta atinkumanchu juchayoq kasqankurayku. Diospa gobiernonmi ichaqa chaykunata wiñaypaq chinkachipunqa.

Bibliaq nisqanman jina allin sonqoyoq runakunaqa manan manchakunankuchu kay pacha chinkachisqa kananmantaqa. Aswanpas kusikunankun, yachasqanchis jina millay runakunan wañuchisqa kanqaku, chay qhepamantaq sumaq kausay kanqa.

¿Jayk’aqmi chaykuna pasanqa? Qatimuqpi chaymanta yachasun.