Pisi tiempollamantan Diospa gobiernonqa janaq pachamanta kay pachata kamachimunqa, chaypiqa llapa runakunan thajpi kausanqaku, llank’aspankupas kusikunqakun. Diosmi señorninchis Jesucristota kay pachata kamachimunanpaq churaran. Payqa manan runakuna jinachu kamachimunqa, allinninchispaqmi imatapas ruwanqa. Jesusqa munakuqmi, khuyapayakuqmi, chanillantan imatapas ruwan, chaymi sumaqta kamachiwasun (Isaías 11:4).

Llapa nacionkunamanta runakunan juj nisqalla kausasunchis, manañan kanqachu cheqninakuypas qhawanakuypas (Apocalipsis 7:9, 10). Llapa runakunan Diosta munakunqaku, noqanchispurapas sumaqtan kausasunchis. Llapallanchismi juj nisqalla Diospa munasqanman jina kausasunchis, tiyasqanchis allpatapas sumaqtan cuidasunchis (Salmos 115:16).

Diospa gobiernon kay pachata kamachimuqtinqa, Diosninchismi kay allpanchista allinta controlanqa (Salmos 24:1, 2). Kay pachapi kashaspan Jesusqa qochaq aytikusqanta thanichiran, chaywanmi rikuchiran Diospa atiyninwan imaymanakuna ruwananta (Marcos 4:39, 41). Jesucristo kamachimuqtinqa manañan pipas manchakunqachu terromokuna, lloqllakuna, juj llakikunapas kananmanta. Animalkunapas manañan runakunata imananqakupaschu, manañataqmi pipas kay allpata qhellichanqañachu nitaq malogranqañachu (Oseas 2:18).

Paraisopiqa manañan onqokusunchu, nitaq machuyasunchu nitaq wañusunpaschu (Isaías 35:5, 6). Tiyasqanchis allpaqa limpion kanqa manañan pipas qhellichanqañachu, Adanwan Evawan tiyasqanku allpa jinan kanqa. Chay mosoq pachapiqa askhallañan mijuykuna kanqa, Edén huertapi jinan imaymana mijuykuna wiñanqa (Génesis 2:9). Paraisopiqa Israel runakunaman Diospa prometesqanmi junt’akunqa, Diosmi paykunata niran: “Askha mijunayoqmi kankichis”, nispa (Levítico 26:4, 5).

Diospa gobiernon kay pachata kamachimuqtinqa llapa runakunan thajpi kausasun, manañan pipas millaykunata ruwanqañachu, llapanchistaq sumaqta yanapanakusun. Manañan guerrakuna kanqachu, manañataqmi pipas runamasinta sarunchanqachu. Bibliapin nishan: “Sapanka runan tiyaykunqa uvas yuran k’uchupipas higos sach’an k’uchupipas, manataqmi pipas manchachiqninku kanqañachu”, nispa (Miqueas 4:3, 4).

Llapa runakunan wasiyoq kanqaku, llapanchistaqmi imachus ruwasqanchiswan kusikusun. Chaymi Bibliapi nin: “Manan yanqachu llank’anqaku”, nispa (Isaías 65:21-23).

Bibliapin nishan: “Kay pachaqa Señor Diosta reqsiq runakunawan junt’a kanqa”, nispa (Isaías 11:9). Imaymanatan Diosninchismanta yachasun, kamasqankunata qhawarispapas imaymanatan yachasun. Yachayninchistaqa manan armakunata ruwananchispaqchu nitaq runamasinchista mana allinta ruwananchispaqchu usasunchis, aswanpas chaytaqa usasunchis runamasinchista yanapananchispaq, kay allpata cuidananchispaq iman (Isaías 2:4; Salmos 37:11).

Diosninchisqa allintan tiyasqanchis allpataqa ruwaran, chaymi kusisqa wiñaypaq chaypi tiyasunchis (Salmos 37:29; Isaías 45:18). Chayta junt’ananpaqmi Diosqa ‘wiñaypaq wañuyta chinkachipunqa’ (Isaías 25:8). Bibliapin nishan: “Manan wañuypas kanqañachu, manañataqmi llakikuypas, waqaypas, ni nanaypas kanqañachu”, nispa (Apocalipsis 21:4). Diospa juicionpi salvakuqkunapas, paraisopi kausarinpuqkunapas atinqakun wiñaypaq kausayta (Juan 5:28, 29; Hechos 24:15).

 Kunan tiempopiqa askha runakunañan preparakushanku paraisopi kausanankupaq. Paykunaqa juchayoqña kanku chaypas tukuy atisqankutan ruwashanku Diospa munasqanman jina kausanankupaq. ¿Iman paykunata yanapan chayta ruwanankupaq? Paykunaqa allintan reqsishanku Jehová Diosta, kachamusqan Jesucristotapas (Juan 17:3).

Pisi tiempollamantan millay runakunaqa chinkachisqa kanqaku. Chay tiempopi salvakunaykipaq, paraisopi kausanaykipaqpas imachus ruwanaykita astawan yachayta munanki chayqa, Jehová Diospa testigonkunamanta jujnintan niwaq Bibliamanta gratislla Kusisqa kausay nisqa qelqawan yachachinasuykipaq.