1, 2. ¿Imaraykun Jehová Diospa testigonkuna allinta p’achakunanchis? (Kay paginapi fotota qhaway.)

HOLANDA nacionmanta periodicon willasqa religionpi wakin umalli runakuna juñunakuyninkuman imayna p’achasqa risqankumanta. Paykunaqa común p’achallawansi risqaku, astawanqa ruphayasqanraykus chhaynata risqaku. Chay periodicoqa willallasqataqmi Jehová Diospa testigonkuna asambleankuman imayna p’achasqa risqankumantapas, paykunaqa allin p’achasqas risqaku, qhari wawakunapas kuraq qharikunapas llapallankus allin corbatasqa sacoyoq ima risqaku. Warmi wawakunapas kuraq warmikunapas allin jap’iq p’achawansi risqaku, faldankupas munaysi rikukuq. Sapa kutillanmi runakunaqa chhayna allinta rimanku Jehová Diospa testigonkunaq imayna p’achakusqankumanta. Apóstol Pablon cristianokunata niran “p’enqakuywan, allin yuyaywan ima” p’achakunankupaq (1 Tim. 2:9, 10). Chay nisqanqa manan warmikunallapaqchu qharikunapaqwanmi.

 ² ¿Imaraykun llapa cristianokuna allin jap’iq p’achawan churakunanchis? Jehová Dios chayta kamachiwasqanchisraykun (Gén. 3:21). Jehová Diosninchisqa tukuy munayniyoq kayninpin ña Bibliapi kamachikunña imaynatachus serviqninkuna p’achakunanchis chayta. Chayrayku, imayna p’achakunapaqqa manan munayninchistachu ñaupaqtaqa maskhana, aswanpas Diospa munaynintan.

3. ¿Imatan yachasunman Israel llaqtaman Diospa qosqan kamachikuykunamanta?

³ Diosqa Israel llaqtaman qosqan kamachikuykunawanmi serviqninkunata cuidaran ama wakin nacionkuna jina qhelli kausaypi puriq kanankupaq. Chay kamachikuykunaman jinaqa manas qharikunaqa warmikuna jinachu p’achakunanku karan, ni warmikunapas qharikuna jinachu p’achakunanku karan. Kay tiempopin ichaqa askha runakuna jujnirayta p’achakunku, chaymi mana alayrichu rikukun warmichus qharichus kanku chayta (leey Deuteronomio 22:5). Diospa qosqan kamachikuyninkunaman jinaqa, manan allinchu kanman chhaynata p’achakuyqa.

4. ¿Iman yanapawasunchis Diospaq jina p’achakunanchispaq?

⁴ May llaqtamantaña kanchis chaypas, maypiña tiyanchis chaypas, llaqtanchista nishutaña chirimun otaq ruphamun chaypas, Bibliaq imachus yachachisqanmi yanapawasunchis Diospaq jina allinta p’achakunanchispaq. Ichaqa manan Bibliaqa niwasunchu ima sayayniyoq ima colorniyoq p’achawan churakunata, aswanpas wakin yachachikuykunallatan qowasunchis, chaykunawanmi allinta reparasunchis imayna p’achakunanchistachus Dios munan chayta (Rom. 12:1, 2).

5, 6. ¿Imaynatan runakuna qhawariwasunchis sumaqta p’achakuqtinchis?

⁵ Diosmi apóstol Pablowan qelqachiran juj importante yachachikuyta, chay yachachikuymi tarikun 2 Corintios 6:4 textopi (leey). Chaypi nisqan jinaqa, imayna p’achasqa kasqanchista rikuspan runakunaqa allinpaq otaq mana allinpaqpas qhawariwasunman (1 Samuel 16:7). Noqanchisqa Diostataq servinchis chayqa, manan gustawasqanchisraykullachu ima p’achawanpas churakunanchis. Manan churakunanchischu t’eqe p’achakunawan, nitaqmi cuerponchista munapayachinapaq jinachu p’achakunanchispas.  Aswanpas allin jap’iq p’achawanmi churakunanchis, chhaynapi mana rikuna partenchiskuna ama rikukunanpaq. Chhaynapin mana pipas rikuwaspanchis p’enqakunqachu.

⁶ Allin p’achasqa, allin ñaqch’asqa, limpio ima purisunchis chayqa, astawanmi runakuna respetawasunman, allinpaqtaq qhawarinkuman Dios serviq kasqanchistapas. Chaymantapas yaqapaschá allin willakuykuna willasqanchista uyariyta munankuman, Diospa llaqtan reqsiytapas munankumanmi.

7, 8. ¿Maykunapin astawan qhawarikunanchis imayna p’achasqachus kashanchis chayta?

⁷ Allinta p’achakusqanchiswanmi rikuchisunchis ch’uya Diosninchista, iñiqmasinchiskunata, predicay llank’ayninchista, lliu runamasinchiskunatapas respetasqanchista (Rom. 13:8-10). Chayrayku, juñunakuyman rinapaq predicacionman lloqsinapaqpas Diospaq jinapunin p’achakunanchis (1 Tim. 2:10). Wakin ladokunapiqa allinpaqmi wakin p’achakuna rikukunman, wakin ladopin ichaqa mana allinpaqchu rikukunman. Chayrayku,  maypiña tarikuspapas Jehová Diospa testigonkunaqa allintan p’achakunanchis, chhaynapin mana pipas p’achanchismanta mana allinta rimanqachu.

⁸ Leey 1 Corintios 10:31. Asambleanchiskunaman rinapaqpas allin yuyaywanmi p’achakunanchis. Manan Diosta mana manchakuq runakuna jinachu p’achakunanchis. Chaymantapas asamblea manaraq qallarishaqtinpas, asamblea tukuytapas allin p’achasqan kashananchis. Alojakusqanchis hotelman jaykunapaqpas chaymanta lloqsipunapaqpas manan común p’achasqachu kashananchis, chhaynapin mana p’enqakusunchu Jehová Diospa testigon kasqanchista reqsichikuyta, listotaqmi kashasunchis ima ratopipas mana manchakuspa predicananchispaq.

9, 10. ¿Imaynatan Filipenses 2:4 texto yanapawasunman?

⁹ Leey Filipenses 2:4. Yachasqanchis jina, Biblian llapanchista kamachiwanchis: “Wañuchiychis aycha cuerpoykichista, chhaynapi ama qhelli juchaman urmanaykichispaq, ama millakunapaq kaqkunata ruwanaykichispaq, ama sinchi warminayachikuywan otaq qharinayachikuywan vencechikunaykichispaq”, nispa (Col. 3:2, 5). Wakin iñiqmasinchiskunapaqqa sinchi sasan chay kamachikuyta kasukuyqa manaraq Jehová Diosta reqsishaspa qhelli kausaypi purisqankurayku. Paykunaqa sapa p’unchaymi maqanakushanku mana allin munayninkuwan, chaymi allin yuyaywan p’achakunanchis, mana chayqa aswan sasaraqmi paykunapaq kanman chay kamachikuyta kasukuy (1 Cor. 6:9, 10).

¹⁰ Iñiqmasinchiskunaqa manan qhelli juchaman tanqawasunmanchu imaynan Diosta mana serviq runakuna ruwanku jinataqa. Chayraykun noqanchispas allin p’achakuyninchiswan paykunata yanapananchis piensayninkupi, rimayninkupi, ruwayninkupipas limpio kanankupaq (1 Ped. 1:15, 16). Chhaynapin munakuq kasqanchista rikuchisunchis. Bibliaq nisqan jina, munakuqqa “manan mana respetoyoqchu, manan paypa allinnillantachu maskhan” (1 Cor. 13:4, 5).

11, 12. ¿Imaynatan yanapawasunman Eclesiastés 3: 1, 17 texto?

¹¹ Bibliaq nisqan jina, “imaymanapaqmi tiempo kan” (Ecl. 3:1, 17). Chaymi noqanchisqa yachananchis maypiña kaspapas imayna p’achakuyta. P’achanchisqa cambianmanmi may llaqtapichus kasqanchisman jina, imaynapichus tarikusqanchisman jinapas. Chaywanpas Diospaq jinan p’achakunanchis, paypa  kamachikuyninkunaqa manan cambianchu (Mal. 3:6).

¹² Q’oñi llaqtakunapiqa aswan sasan kanman allin yuyaywan p’achakuyqa sinchita ruphamusqanrayku. Chhayna llaqtakunapipas allin jap’iq p’achawanmi churakunanchis, arí, manan mana rikuna partenchiskunaqa rikukunanchu, chhaynapin iñiqmasinchiskunapas allinpaq qhawariwasunchis (Job 31:1). Qocha patapi otaq piscinapi kashaspapas yachananchismi allin yuyaywan p’achakuyta (Prov. 11:2, 20). Wakin runakuna p’enqaytaña p’achakunku chaypas, noqanchisqa Jehová Diosninchispaq jinan p’achakunanchis.

13. ¿Imaynatan 1 Corintios 10:32, 33 yanapawasunman p’achakuyninchispi?

¹³ Chaymantapas Bibliaq nisqan jinaqa cuidakunanchismi ama pitapas urmachinanchispaq, chaypaqmi respetananchis concienciankuta (leey 1 Corintios 10:32, 33). ¿Imatan ruwananchis sichus iñiqmasinchiskuna juj runakunapas p’achanchista mana allinpaq qhawariqtinku? Pabloq nisqantan kasukunanchis, paymi niran: ‘Sapankanchismi runamasinchispa allinninpaq kaqkunata, paykunata kallpachaq kaqkunatawan ruwananchis. Cristopas manan kikinpa allinnillantachu maskharan’, nispa (Rom. 15:2, 3). Cristopaqqa Diosta serviy jujkunata yanapay iman aswan importante karan pay kikinpa allinnillanta maskhaymantaqa. Chayraykun noqanchispas mana gustonchistaraqchu maskhananchis p’achakuyninchiswanqa, aswanpas runakuna predicayninchista uyarinankupaq jinan p’achakunanchis.

14. ¿Imaynatan tayta-mamakuna wawankuta yachachinkuman Diospaq jina p’achakuyta?

¹⁴ Cristiano tayta-mamakunapas allintan wawankuta yachachinanku Bibliaq nisqanman jina kausanankupaq. Yachachinankun ch’uya Diospaq jina allin yuyaywan p’achakuyta, chhaynapi paypa sonqonta kusichinankupaq (Prov. 22:6; 27:11). ¿Imaynatan tayta-mamakuna wawankuman chayta yachachinkuman? Allin ejemplota qospan. Chaymantapas munakuywanmi yachachinanku maypichus allin jap’iq p’achata tarinkuman chayta. Wawakunapas manan gustasqanraykullachu ima p’achawanpas churakunanku, aswanpas Diosta jatunchanapaq jinan p’achakuyta yachananku, paypa sutinta apasqankurayku.

15. ¿Iman yanapawasunchis Diospaq jina p’achakunanchispaq?

¹⁵ Biblian yanapawasunchis Diospaq jina p’achakunanchispaq. Bibliaqa manan jark’awanchischu gustonchisman jina p’achakunanchistaqa, chaymi mana kaq p’achawanchu lliupas churakunchis. Ichaqa, ima p’achawanña churakunchis chaypas, chay p’achaqa kanan limpio, allin jap’iq, allin yuyaywan ajllasqa, maypichus tiyanchis chaypaq jina iman.

16. ¿Imanaqtinmi allinta p’achakunanchis?

¹⁶ Kay tiempopiqa manan facilchu Diospaq jina allin p’achata tariyqa. Wakin tiendakunapiqa manan kanchu cristianopaq  jina p’achakunaqa. Chaymi sasa kanman allin p’achata tariy. Chaywanpas kallpachakunanchismi allin jap’iq p’achata maskhananchispaq, arí, manan nishu t’eqe p’achakunawanqa churakunanchischu. Iñiqmasinchiskunaqa allinpaqmi qhawarinqaku Diospaq jina p’achakusqanchista. Chaymantapas anchatan kusichisunchis p’achakuyninchiswan Diosninchista jatunchaspaqa, chaymi aswan allinqa imamantapas.

17. ¿Imaynapin yachasunman sunkhayoq puriy allinchus icha manachus chayta?

¹⁷ ¿Hermanokuna wiñachikunankuchu sunkhankuta? Chaypaq yuyarisunchis ñaupa tiempopi Moisespa chaskisqan kamachikuykunata. Chay kamachikuykunaman jinaqa qharikunaqa wiñachinankun karan sunkhankuta. Cristianokunan ichaqa manaña chay kamachikuykunata kasukunankuchu (Lev. 19:27; 21:5; Gál. 3:24, 25). Chaywanpas wakin llaqkunapiqa normalmi sunkhayoq puriy, manataqmi runakunaqa chayta mana allinpaq qhawarinkuchu. Chaymi chay llaqtakunapi wakin umalliq iñiqmasinchiskunapas sunkhayoq kanku, ichaqa allin rikukunanpaq jinan chayta jap’inku, manan comuntachu wiñachinku (1 Cor. 8:9, 13; 10:32). Wakin llaqtakunapin ichaqa mana allinpaqchu qhawarinku sunkhayoq kayta. Chaymi chay llaqtakunapi tiyaq qharikunaqa allinta k’isukunanku sunkhankuta, mana chayqa manañan ‘mana juchachanachu’ kankuman (1 Tim. 3:2, 7; Rom. 15:1-3).

18, 19. ¿Imaynatan Miqueas 6:8 yanapawasunman?

¹⁸ Rikusqanchis jina, Jehová Diosqa manan juj listataraqchu qelqachiran imayna clase p’achawansi churakunanchis chayta. Aswanmi payqa wakin yachachikuykunallata qowaranchis, chhaynapi sapankanchis allinta piensaykuspa p’achanchista ajllakunanchispaq. ¡Ancha sumaqmi chayqa! Chaywanpas Jehová Diosqa munan p’achakuyninchispipas juch’uyaykukuq kananchistan (Miq. 6:8).

¹⁹ Juch’uyaykukuq kaspaqa tukuy sonqonchiswanmi confiasun Jehová Dios ch’uya kasqanpi, noqanchismanta aswan yachayniyoq kasqanpi ima. Chaymi mana iskayaspa paypa nisqanta kasukunanchis. Chaymantapas juch’uyaykukuq kayqa yanapawasunmi jujkunaq conciencianta respetananchispaq.

20. ¿Ima bendicionkunan kanqa allin yuyaywan p’achakuqtinchis?

²⁰ Imayna p’achakusqanchiswanmi rikuchinanchis Jehová Diosta serviq kasqanchista. Paypa kamachikuyninkunaqa ancha allinmi, chaymi kusisqa payta kasukunanchis. Chaymantapas sumaqtan qhawarinanchis lliu kasukuq iñiqmasinchiskunata. Paykunaqa allin p’achakusqankuwanmi juj runakunata yanapashanku allin willakuykunata uyarinankupaq, chaywantaq Jehová Diosta jatunchashanku kusichishanku ima. Chayrayku, llapanchis allin yuyaywan p’achakusun, chhaynapin Jehová Diosta jatunchasunchis, payqa ‘qhapaq atiywan lliphipipiywan iman p’achakun’ (Sal. 104:1, 2).